{"collection":"Bible & Christianity","html_url":"https://unchartedknowledge.5gfusion.net/browse/bib/vul/act002.htm","path":"bib/vul/act002.htm","source_url":"https://sacred-texts.com/bib/vul/act002.htm","text":"1 Et cum complerentur dies Pentecostes, erant omnes pariter in eodem loco:\n2 et factus est repente de c\u00e6lo sonus, tamquam advenientis spiritus vehementis, et replevit totam domum ubi erant sedentes.\n3 Et apparuerunt illis dispertit\u00e6 lingu\u00e6 tamquam ignis, seditque supra singulos eorum:\n4 et repleti sunt omnes Spiritu Sancto, et c\u0153perunt loqui variis linguis, prout Spiritus Sanctus dabat eloqui illis.\n5 Erant autem in Jerusalem habitantes Jud\u00e6i, viri religiosi ex omni natione qu\u00e6 sub c\u00e6lo est.\n6 Facta autem hac voce, convenit multitudo, et mente confusa est, quoniam audiebat unusquisque lingua sua illos loquentes.\n7 Stupebant autem omnes, et mirabantur, dicentes: Nonne ecce omnes isti qui loquuntur, Galil\u00e6i sunt?\n8 et quomodo nos audivimus unusquisque linguam nostram in qua nati sumus?\n9 Parthi, et Medi, et \u00c6lamit\u00e6, et qui habitant Mespotamiam, Jud\u00e6am, et Cappadociam, Pontum, et Asiam,\n10 Phrygiam, et Pamphyliam, \u00c6gyptum, et partes Liby\u00e6 qu\u00e6 est circa Cyrenen: et adven\u00e6 Romani,\n11 Jud\u00e6i quoque, et Proselyti, Cretes, et Arabes: audivimus eos loquentes nostris linguis magnalia Dei.\n12 Stupebant autem omnes, et mirabantur ad invicem, dicentes: Quidnam vult hoc esse?\n13\u00a0Alii autem irridentes dicebant: Quia musto pleni sunt isti.\n \n14 Stans autem Petrus cum undecim, levavit vocem suam, et locutus est eis: Viri Jud\u00e6i, et qui habitatis Jerusalem universi, hoc vobis notum sit, et auribus percipite verba mea.\n15 Non enim, sicut vos \u00e6stimatis, hi ebrii sunt, cum sit hora diei tertia:\n16 sed hoc est quod dictum est per prophetam Jo\u00ebl:\n17\u00a0[Et erit in novissimis diebus, dicit Dominus,\n effundam de Spiritu meo super omnem carnem:\n et prophetabunt filii vestri et fili\u00e6 vestr\u00e6,\n et juvenes vestri visiones videbunt,\n et seniores vestri somnia somniabunt.\n18\u00a0Et quidem super servos meos, et super ancillas meas,\n in diebus illis effundam de Spiritu meo,\n et prophetabunt:\n19\u00a0et dabo prodigia in c\u00e6lo sursum,\n et signa in terra deorsum, sanguinem, et ignem, et vaporem fumi:\n20\u00a0sol convertetur in tenebras,\n et luna in sanguinem,\n antequam veniat dies Domini magnus et manifestus.\n21 Et erit: omnis quicumque invocaverit nomen Domini, salvus erit.]\n22 Viri Isra\u00eblit\u00e6, audite verba h\u00e6c: Jesum Nazarenum, virum approbatum a Deo in vobis, virtutibus, et prodigiis, et signis, qu\u00e6 fecit Deus per illum in medio vestri, sicut et vos scitis:\n23 hunc, definito consilio et pr\u00e6scientia Dei traditum, per manus iniquorum affligentes interemistis:\n24 quem Deus suscitavit, solutis doloribus inferni, juxta quod impossibile erat teneri illum ab eo.\n25\u00a0David enim dicit in eum: [Providebam Dominum in conspectu meo semper:\n quoniam a dextris est mihi, ne commovear:\n26\u00a0propter hoc l\u00e6tatum est cor meum, et exsultavit lingua mea,\n insuper et caro mea requiescet in spe:\n27\u00a0quoniam non derelinques animam meam in inferno,\n nec dabis sanctum tuum videre corruptionem.\n28\u00a0Notas mihi fecisti vias vit\u00e6:\n et replebis me jucunditate cum facie tua.]\n29 Viri fratres, liceat audenter dicere ad vos de patriarcha David, quoniam defunctus est, et sepultus: et sepulchrum ejus est apud nos usque in hodiernum diem.\n30 Propheta igitur cum esset, et sciret quia jurejurando jurasset illi Deus de fructu lumbi ejus sedere super sedem ejus:\n31 providens locutus est de resurrectione Christi, quia neque derelictus est in inferno, neque caro ejus vidit corruptionem.\n32 Hunc Jesum resuscitavit Deus, cujus omnes nos testes sumus.\n33 Dextera igitur Dei exaltatus, et promissione Spiritus Sancti accepta a Patre, effudit hunc, quem vos videtis et auditis.\n34\u00a0Non enim David ascendit in c\u00e6lum: dixit autem ipse: [Dixit Dominus Domino meo:\n Sede a dextris meis,\n35\u00a0donec ponam inimicos tuos\n scabellum pedum tuorum.]\n36\u00a0Certissime sciat ergo omnis domus Isra\u00ebl, quia et Dominum eum et Christum fecit Deus hunc Jesum, quem vos crucifixistis.\n \n37 His autem auditis, compuncti sunt corde, et dixerunt ad Petrum et ad reliquos Apostolos: Quid faciemus, viri fratres?\n38 Petrus vero ad illos: P\u0153nitentiam, inquit, agite, et baptizetur unusquisque vestrum in nomine Jesu Christi in remissionem peccatorum vestrorum: et accipietis donum Spiritus Sancti.\n39 Vobis enim est repromissio, et filiis vestris, et omnibus qui longe sunt, quoscumque advocaverit Dominus Deus noster.\n40 Aliis etiam verbis plurimis testificatus est, et exhortabatur eos, dicens: Salvamini a generatione ista prava.\n41\u00a0Qui ergo receperunt sermonem ejus, baptizati sunt: et apposit\u00e6 sunt in die illa anim\u00e6 circiter tria millia.\n \n42 Erant autem perseverantes in doctrina Apostolorum, et communicatione fractionis panis, et orationibus.\n43 Fiebat autem omni anim\u00e6 timor: multa quoque prodigia et signa per Apostolos in Jerusalem fiebant, et metus erat magnus in universis.\n44 Omnes etiam qui credebant, erant pariter, et habebant omnia communia.\n45 Possessiones et substantias vendebant, et dividebant illa omnibus, prout cuique opus erat.\n46 Quotidie quoque perdurantes unanimiter in templo, et frangentes circa domos panem, sumebant cibum cum exsultatione et simplicitate cordis,\n47 collaudantes Deum et habentes gratiam ad omnem plebem. Dominus autem augebat qui salvi fierent quotidie in idipsum.","title":"Vulgate: Acts: Acts Chapter 2","type":"page"}