{"collection":"Bible & Christianity","html_url":"https://unchartedknowledge.5gfusion.net/browse/bib/vul/act005.htm","path":"bib/vul/act005.htm","source_url":"https://sacred-texts.com/bib/vul/act005.htm","text":"1 Vir autem quidam nomine Ananias, cum Saphira uxore suo vendidit agrum,\n2 et fraudavit de pretio agri, conscia uxore sua: et afferens partem quamdam, ad pedes Apostolorum posuit.\n3 Dixit autem Petrus: Anania, cur tentavit Satanas cor tuum, mentiri te Spiritui Sancto, et fraudare de pretio agri?\n4 nonne manens tibi manebat, et venundatum in tua erat potestate? quare posuisti in corde tuo hanc rem? non es mentitus hominibus, sed Deo.\n5 Audiens autem Ananias h\u00e6c verba, cecidit, et expiravit. Et factus est timor magnus super omnes qui audierunt.\n6 Surgentes autem juvenes amoverunt eum, et efferentes sepelierunt.\n7 Factum est autem quasi horarum trium spatium, et uxor ipsius, nesciens quod factum fuerat, introivit.\n8 Dixit autem ei Petrus: Dic mihi mulier, si tanti agrum vendidistis? At illa dixit: Etiam tanti.\n9 Petrus autem ad eam: Quid utique convenit vobis tentare Spiritum Domini? Ecce pedes eorum qui sepelierunt virum tuum ad ostium, et efferent te.\n10 Confestim cecidit ante pedes ejus, et expiravit. Intrantes autem juvenes invenerunt illam mortuam: et extulerunt, et sepelierunt ad virum suum.\n11\u00a0Et factus est timor magnus in universa ecclesia, et in omnes qui audierunt h\u00e6c.\n \n12 Per manus autem Apostolorum fiebant signa et prodigia multa in plebe. Et erant unanimiter omnes in porticu Salomonis.\n13 Ceterorum autem nemo audebat se conjungere illis: sed magnificabat eos populus.\n14 Magis autem augebatur credentium in Domino multitudo virorum ac mulierum,\n15 ita ut in plateas ejicerent infirmos, et ponerent in lectulis et grabatis, ut, veniente Petro, saltem umbra illius obumbraret quemquam illorum, et liberarentur ab infirmitatibus suis.\n16\u00a0Concurrebat autem et multitudo vicinarum civitatum Jerusalem, afferentes \u00e6gros, et vexatos a spiritibus immundis: qui curabantur omnes.\n \n17 Exsurgens autem princeps sacerdotum, et omnes qui cum illo erant (qu\u00e6 est h\u00e6resis sadduc\u00e6orum), repleti sunt zelo:\n18 et injecerunt manus in Apostolos, et posuerunt eos in custodia publica.\n19 Angelus autem Domini per noctem aperiens januas carceris, et educens eos, dixit:\n20 Ite, et stantes loquimini in templo plebi omnia verba vit\u00e6 hujus.\n21 Qui cum audissent, intraverunt diluculo in templum, et docebant. Adveniens autem princeps sacerdotum, et qui cum eo erant, convocaverunt concilium, et omnes seniores filiorum Isra\u00ebl: et miserunt ad carcerem ut adducerentur.\n22 Cum autem venissent ministri, et aperto carcere non invenissent illos, reversi nuntiaverunt,\n23 dicentes: Carcerem quidem invenimus clausum cum omni diligentia, et custodes stantes ante januas: aperientes autem neminem intus invenimus.\n24 Ut autem audierunt hos sermones magistratus templi et principes sacerdotum, ambigebant de illis quidnam fieret.\n25\u00a0Adveniens autem quidam, nuntiavit eis: Quia ecce viri quos posuistis in carcerem, sunt in templo, stantes et docentes populum.\n \n26 Tunc abiit magistratus cum ministris, et adduxit illos sine vi: timebant enim populum ne lapidarentur.\n27 Et cum adduxissent illos, statuerunt in concilio: et interrogavit eos princeps sacerdotum,\n28\u00a0dicens: Pr\u00e6cipiendo pr\u00e6cepimus vobis ne doceretis in nomine isto, et ecce replestis Jerusalem doctrina vestra: et vultis inducere super nos sanguinem hominis istius.\n \n29 Respondens autem Petrus et Apostoli, dixerunt: Obedire oportet Deo magis quam hominibus.\n30 Deus patrum nostrorum suscitavit Jesum, quem vos interemistis, suspendentes in ligno.\n31 Hunc principem et salvatorem Deus exaltavit dextera sua ad dandam p\u0153nitentiam Isra\u00ebli, et remissionem peccatorum:\n32 et nos sumus testes horum verborum, et Spiritus Sanctus, quem dedit Deus omnibus obedientibus sibi.\n33\u00a0H\u00e6c cum audissent, dissecabantur, et cogitabant interficere illos.\n \n34 Surgens autem quidam in concilio pharis\u00e6us, nomine Gamaliel, legis doctor, honorabilis univers\u00e6 plebi, jussit foras ad breve homines fieri,\n35 dixitque ad illos: Viri Isra\u00eblit\u00e6, attendite vobis super hominibus istis quid acturi sitis.\n36 Ante hos enim dies extitit Theodas, dicens se esse aliquem, cui consensit numerus virorum circiter quadringentorum: qui occisus est, et omnes qui credebant ei, dissipati sunt, et redacti ad nihilum.\n37 Post hunc extitit Judas Galil\u00e6us in diebus professionis, et avertit populum post se: et ipse periit, et omnes quotquot consenserunt ei, dispersi sunt.\n38 Et nunc itaque dico vobis, discedite ab hominibus istis, et sinite illos: quoniam si est ex hominibus consilium hoc aut opus, dissolvetur:\n39 si vero ex Deo est, non poteritis dissolvere illud, ne forte et Deo repugnare inveniamini. Consenserunt autem illi.\n40 Et convocantes Apostolos, c\u00e6sis denuntiaverunt ne omnino loquerentur in nomine Jesu, et dimiserunt eos.\n41 Et illi quidem ibant gaudentes a conspectu concilii, quoniam digni habiti sunt pro nomine Jesu contumeliam pati.\n42 Omni autem die non cessabant in templo et circa domos, docentes et evangelizantes Christum Jesum.","title":"Vulgate: Acts: Acts Chapter 5","type":"page"}