{"collection":"Bible & Christianity","html_url":"https://unchartedknowledge.5gfusion.net/browse/bib/vul/act007.htm","path":"bib/vul/act007.htm","source_url":"https://sacred-texts.com/bib/vul/act007.htm","text":"1 Dixit autem princeps sacerdotum: Si h\u00e6c ita se habent?\n2 Qui ait: Viri fratres et patres, audite: Deus glori\u00e6 apparuit patri nostro Abrah\u00e6 cum esset in Mesopotamia, priusquam moraretur in Charan,\n3 et dixit ad illum: Exi de terra tua, et de cognatione tua, et veni in terram quam monstravero tibi.\n4 Tunc exiit de terra Chald\u00e6orum, et habitavit in Charan. Et inde, postquam mortuus est pater ejus, transtulit illum in terram istam, in qua nunc vos habitatis.\n5 Et non dedit illi h\u00e6reditatem in ea, nec passum pedis: sed repromisit dare illi eam in possessionem, et semini ejus post ipsum, cum non haberet filium.\n6 Locutus est autem ei Deus: Quia erit semen ejus accola in terra aliena, et servituti eos subjicient, et male tractabunt eos annis quadringentis:\n7 et gentem cui servierint, judicabo ego, dixit Dominus: et post h\u00e6c exibunt, et servient mihi in loco isto.\n8 Et dedit illi testamentum circumcisionis: et sic genuit Isaac, et circumcidit eum die octavo: et Isaac, Jacob: et Jacob, duodecim patriarchas.\n9 Et patriarch\u00e6 \u00e6mulantes, Joseph vendiderunt in \u00c6gyptum: et erat Deus cum eo,\n10 et eripuit eum ex omnibus tribulationibus ejus, et dedit ei gratiam et sapientiam in conspectu pharaonis regis \u00c6gypti: et constituit eum pr\u00e6positum super \u00c6gyptum, et super omnem domum suam.\n11 Venit autem fames in universam \u00c6gyptum et Chanaan, et tribulatio magna: et non inveniebant cibos patres nostri.\n12 Cum audisset autem Jacob esse frumentum in \u00c6gypto, misit patres nostros primum:\n13 et in secundo cognitus est Joseph a fratribus suis, et manifestatum est Pharaoni genus ejus.\n14 Mittens autem Joseph, accersivit Jacob patrem suum et omnem cognationem suam, in animabus septuaginta quinque.\n15 Et descendit Jacob in \u00c6gyptum: et defunctus est ipse, et patres nostri.\n16\u00a0Et translati sunt in Sichem, et positi sunt in sepulchro, quod emit Abraham pretio argenti a filiis Hemor filii Sichem.\n \n17 Cum autem appropinquaret tempus promissionis quam confessus erat Deus Abrah\u00e6, crevit populus, et multiplicatus est in \u00c6gypto,\n18 quoadusque surrexit alius rex in \u00c6gypto, qui non sciebat Joseph.\n19 Hic circumveniens genus nostrum, afflixit patres nostros ut exponerent infantes suos, ne vivificarentur.\n20 Eodem tempore natus est Moyses, et fuit gratus Deo: qui nutritus est tribus mensibus in domo patris sui.\n21 Exposito autem illo, sustulit eum filia Pharaonis, et nutrivit eum sibi in filium.\n22 Et eruditus est Moyses omni sapientia \u00c6gyptiorum, et erat potens in verbis et in operibus suis.\n23 Cum autem impleretur ei quadraginta annorum tempus, ascendit in cor ejus ut visitaret fratres suos filios Isra\u00ebl.\n24 Et cum vidisset quemdam injuriam patientem, vindicavit illum, et fecit ultionem ei qui injuriam sustinebat, percusso \u00c6gyptio.\n25 Existimabat autem intelligere fratres, quoniam Deus per manum ipsius daret salutem illis: at illi non intellexerunt.\n26 Sequenti vero die apparuit illis litigantibus: et reconciliabat eos in pace, dicens: Viri, fratres estis: ut quid nocetis alterutrum?\n27 Qui autem injuriam faciebat proximo, repulit eum, dicens: Quis te constituit principem et judicem super nos?\n28 Numquid interficere me tu vis, quemadmodum interfecisti heri \u00c6gyptium?\n29 Fugit autem Moyses in verbo isto: et factus est advena in terra Madian, ubi generavit filios duos.\n30 Et expletis annis quadraginta, apparuit illi in deserto montis Sina angelus in igne flamm\u00e6 rubi.\n31 Moyses autem videns, admiratus est visum. Et accedente illo ut consideraret, facta est ad eum vox Domini, dicens:\n32 Ego sum Deus patrum tuorum, Deus Abraham, Deus Isaac, et Deus Jacob. Tremefactus autem Moyses, non audebat considerare.\n33 Dixit autem illi Dominus: Solve calceamentum pedum tuorum: locus enim in quo stas, terra sancta est.\n34 Videns vidi afflictionem populi mei qui est in \u00c6gypto, et gemitum eorum audivi, et descendi liberare eos. Et nunc veni, et mittam te in \u00c6gyptum.\n35 Hunc Moysen, quem negaverunt, dicentes: Quis te constituit principem et judicem? hunc Deus principem et redemptorem misit, cum manu angeli qui apparuit illi in rubo.\n36 Hic eduxit illos faciens prodigia et signa in terra \u00c6gypti, et in rubro mari, et in deserto annis quadraginta.\n37 Hic est Moyses, qui dixit filiis Isra\u00ebl: Prophetam suscitabit vobis Deus de fratribus vestris, tamquam me: ipsum audietis.\n38 Hic est qui fuit in ecclesia in solitudine cum angelo, qui loquebatur ei in monte Sina, et cum patribus nostris: qui accepit verba vit\u00e6 dare nobis.\n39 Cui noluerunt obedire patres nostri: sed repulerunt, et aversi sunt cordibus suis in \u00c6gyptum,\n40 dicentes ad Aaron: Fac nobis deos qui pr\u00e6cedant nos: Moyses enim hic, qui eduxit nos de terra \u00c6gypti, nescimus quid factum sit ei.\n41 Et vitulum fecerunt in diebus illis, et obtulerunt hostiam simulacro, et l\u00e6tabantur in operibus manuum suarum.\n42\u00a0Convertit autem Deus, et tradidit eos servire militi\u00e6 c\u00e6li, sicut scriptum est in libro prophetarum: [Numquid victimas et hostias obtulistis mihi\n annis quadraginta in deserto, domus Isra\u00ebl?\n43\u00a0Et suscepistis tabernaculum Moloch,\n et sidus dei vestri Rempham,\n figuras quas fecistis adorare eas:\n et transferam vos trans Babylonem.]\n44 Tabernaculum testimonii fuit cum patribus nostris in deserto, sicut disposuit illis Deus loquens ad Moysen, ut faceret illud secundum formam quam viderat.\n45 Quod et induxerunt, suscipientes patres nostri cum Jesu in possessionem gentium quas expulit Deus a facie patrum nostrorum, usque in diebus David,\n46 qui invenit gratiam ante Deum, et petiit ut inveniret tabernaculum Deo Jacob.\n47 Salomon autem \u00e6dificavit illi domum.\n48 Sed non Excelsus in manufactis habitat, sicut propheta dicit:\n49\u00a0[C\u00e6lum mihi sedes est:\n terra autem scabellum pedum meorum.\n Quam domum \u00e6dificabitis mihi? dicit Dominus:\n aut quis locus requietionis me\u00e6 est?\n50 Nonne manus mea fecit h\u00e6c omnia?]\n51 Dura cervice, et incircumcisis cordibus et auribus, vos semper Spiritui Sancto resistitis: sicut patres vestri, ita et vos.\n52 Quem prophetarum non sunt persecuti patres vestri? et occiderunt eos qui pr\u00e6nuntiabant de adventu Justi, cujus vos nunc proditores et homicid\u00e6 fuistis:\n53\u00a0qui accepistis legem in dispositione angelorum, et non custodistis.\n \n54 Audientes autem h\u00e6c, dissecabantur cordibus suis, et stridebant dentibus in eum.\n55 Cum autem esset plenus Spiritu Sancto, intendens in c\u00e6lum, vidit gloriam Dei, et Jesum stantem a dextris Dei. Et ait: Ecce video c\u00e6los apertos, et Filium hominis stantem a dextris Dei.\n56 Exclamantes autem voce magna continuerunt aures suas, et impetum fecerunt unanimiter in eum.\n57 Et ejicientes eum extra civitatem, lapidabant: et testes deposuerunt vestimenta sua secus pedes adolescentis qui vocabatur Saulus.\n58 Et lapidabant Stephanum invocantem, et dicentem: Domine Jesu, suscipe spiritum meum.\n59 Positis autem genibus, clamavit voce magna, dicens: Domine, ne statuas illis hoc peccatum. Et cum hoc dixisset, obdormivit in Domino. Saulus autem erat consentiens neci ejus.","title":"Vulgate: Acts: Acts Chapter 7","type":"page"}