{"collection":"Bible & Christianity","html_url":"https://unchartedknowledge.5gfusion.net/browse/bib/vul/act009.htm","path":"bib/vul/act009.htm","source_url":"https://sacred-texts.com/bib/vul/act009.htm","text":"1 Saulus autem adhuc spirans minarum et c\u00e6dis in discipulos Domini, accessit ad principem sacerdotum,\n2\u00a0et petiit ab eo epistolas in Damascum ad synagogas: ut si quos invenisset hujus vi\u00e6 viros ac mulieres, vinctos perduceret in Jerusalem.\n \n3 Et cum iter faceret, contigit ut appropinquaret Damasco: et subito circumfulsit eum lux de c\u00e6lo.\n4 Et cadens in terram audivit vocem dicentem sibi: Saule, Saule, quid me persequeris?\n5 Qui dixit: Quis es, domine? Et ille: Ego sum Jesus, quem tu persequeris: durum est tibi contra stimulum calcitrare.\n6 Et tremens ac stupens dixit: Domine, quid me vis facere?\n7 Et Dominus ad eum: Surge, et ingredere civitatem, et ibi dicetur tibi quid te oporteat facere. Viri autem illi qui comitabantur cum eo, stabant stupefacti, audientes quidem vocem, neminem autem videntes.\n8 Surrexit autem Saulus de terra, apertisque oculis nihil videbat. Ad manus autem illum trahentes, introduxerunt Damascum.\n9\u00a0Et erat ibi tribus diebus non videns, et non manducavit, neque bibit.\n \n10 Erat autem quidam discipulus Damasci, nomine Ananias: et dixit ad illum in visu Dominus: Anania. At ille ait: Ecce ego, Domine.\n11 Et Dominus ad eum: Surge, et vade in vicum qui vocatur Rectus: et qu\u00e6re in domo Jud\u00e6 Saulum nomine Tarsensem: ecce enim orat.\n12 (Et vidit virum Ananiam nomine, intro\u00ebuntem, et imponentem sibi manus ut visum recipiat.)\n13 Respondit autem Ananias: Domine, audivi a multis de viro hoc, quanta mala fecerit sanctis tuis in Jerusalem:\n14 et hic habet potestatem a principibus sacerdotum alligandi omnes qui invocant nomen tuum.\n15 Dixit autem ad eum Dominus: Vade, quoniam vas electionis est mihi iste, ut portet nomen meum coram gentibus, et regibus, et filiis Isra\u00ebl.\n16\u00a0Ego enim ostendam illi quanta oporteat eum pro nomine meo pati.\n \n17 Et abiit Ananias, et introivit in domum: et imponens ei manus, dixit: Saule frater, Dominus misit me Jesus, qui apparuit tibi in via qua veniebas, ut videas, et implearis Spiritu Sancto.\n18 Et confestim ceciderunt ab oculis ejus tamquam squam\u00e6, et visum recepit: et surgens baptizatus est.\n19\u00a0Et cum accepisset cibum, confortatus est.\n Fuit autem cum discipulis qui erant Damasci per dies aliquot.\n20 Et continuo in synagogis pr\u00e6dicabat Jesum, quoniam hic est Filius Dei.\n21 Stupebant autem omnes qui audiebant, et dicebant: Nonne hic est qui expugnabat in Jerusalem eos qui invocabant nomen istud: et huc ad hoc venit, ut vinctos illos duceret ad principes sacerdotum?\n22 Saulus autem multo magis convalescebat, et confundebat Jud\u00e6os qui habitabant Damasci, affirmans quoniam hic est Christus.\n23 Cum autem implerentur dies multi, consilium fecerunt in unum Jud\u00e6i ut eum interficerent.\n24 Not\u00e6 autem fact\u00e6 sunt Saulo insidi\u00e6 eorum. Custodiebant autem et portas die ac nocte, ut eum interficerent.\n25\u00a0Accipientes autem eum discipuli nocte, per murum dimiserunt eum, submittentes in sporta.\n \n26 Cum autem venisset in Jerusalem, tentabat se jungere discipulis, et omnes timebant eum, non credentes quod esset discipulus.\n27 Barnabas autem apprehensum illum duxit ad Apostolos: et narravit illis quomodo in via vidisset Dominum, et quia locutus est ei, et quomodo in Damasco fiducialiter egerit in nomine Jesu.\n28 Et erat cum illis intrans et exiens in Jerusalem, et fiducialiter agens in nomine Domini.\n29\u00a0Loquebatur quoque gentibus, et disputabat cum Gr\u00e6cis: illi autem qu\u00e6rebant occidere eum.\n \n30 Quod cum cognovissent fratres, deduxerunt eum C\u00e6saream, et dimiserunt Tarsum.\n31\u00a0Ecclesia quidem per totam Jud\u00e6am, et Galil\u00e6am, et Samariam habebat pacem, et \u00e6dificabatur ambulans in timore Domini, et consolatione Sancti Spiritus replebatur.\n \n32 Factum est autem, ut Petrus dum pertransiret universos, deveniret ad sanctos qui habitabant Lydd\u00e6.\n33 Invenit autem ibi hominem quemdam, nomine \u00c6neam, ab annis octo jacentem in grabato, qui erat paralyticus.\n34 Et ait illi Petrus: \u00c6nea, sanat te Dominus Jesus Christus: surge, et sterne tibi. Et continuo surrexit.\n35\u00a0Et viderunt eum omnes qui habitabant Lydd\u00e6 et Saron\u00e6: qui conversi sunt ad Dominum.\n \n36 In Joppe autem fuit qu\u00e6dam discipula, nomine Tabitha, qu\u00e6 interpretata dicitur Dorcas. H\u00e6c erat plena operibus bonis et eleemosynis quas faciebat.\n37 Factum est autem in diebus illis ut infirmata moreretur. Quam cum lavissent, posuerunt eam in c\u0153naculo.\n38 Cum autem prope esset Lydda ad Joppen, discipuli, audientes quia Petrus esset in ea, miserunt duos viros ad eum, rogantes: Ne pigriteris venire ad nos.\n39 Exsurgens autem Petrus, venit cum illis. Et cum advenisset, duxerunt illum in c\u0153naculum: et circumsteterunt illum omnes vidu\u00e6 flentes, et ostendentes ei tunicas et vestes quas faciebat illis Dorcas.\n40 Ejectis autem omnibus foras, Petrus ponens genua oravit: et conversus ad corpus, dixit: Tabitha, surge. At illa aperuit oculos suos: et viso Petro, resedit.\n41 Dans autem illi manum, erexit eam. Et cum vocasset sanctos et viduas, assignavit eam vivam.\n42 Notum autem factum est per universam Joppen: et crediderunt multi in Domino.\n43 Factum est autem ut dies multos moraretur in Joppe, apud Simonem quemdam coriarium.","title":"Vulgate: Acts: Acts Chapter 9","type":"page"}