{"collection":"Bible & Christianity","html_url":"https://unchartedknowledge.5gfusion.net/browse/bib/vul/act012.htm","path":"bib/vul/act012.htm","source_url":"https://sacred-texts.com/bib/vul/act012.htm","text":"1 Eodem autem tempore misit Herodes rex manus, ut affligeret quosdam de ecclesia.\n2 Occidit autem Jacobum fratrem Joannis gladio.\n3 Videns autem quia placeret Jud\u00e6is, apposuit ut apprehenderet et Petrum. Erant autem dies Azymorum.\n4 Quem cum apprehendisset, misit in carcerem, tradens quatuor quaternionibus militum custodiendum, volens post Pascha producere eum populo.\n5\u00a0Et Petrus quidem servabatur in carcere. Oratio autem fiebant sine intermissione ab ecclesia ad Deum pro eo.\n \n6 Cum autem producturus eum esset Herodes, in ipsa nocte erat Petrus dormiens inter duos milites, vinctus catenis duabus: et custodes ante ostium custodiebant carcerem.\n7 Et ecce angelus Domini astitit, et lumen refulsit in habitaculo: percussoque latere Petri, excitavit eum, dicens: Surge velociter. Et ceciderunt caten\u00e6 de manibus ejus.\n8 Dixit autem angelus ad eum: Pr\u00e6cingere, et calcea te caligas tuas. Et fecit sic. Et dixit illi: Circumda tibi vestimentum tuum, et sequere me.\n9 Et exiens sequebatur eum, et nesciebat quia verum est, quod fiebat per angelum: existimabat autem se visum videre.\n10\u00a0Transeuntes autem primam et secundam custodiam, venerunt ad portam ferream, qu\u00e6 ducit ad civitatem: qu\u00e6 ultro aperta est eis. Et exeuntes processerunt vicum unum: et continuo discessit angelus ab eo.\n \n11 Et Petrus ad se reversus, dixit: Nunc scio vere quia misit Dominus angelum suum, et eripuit me de manu Herodis, et de omni exspectatione plebis Jud\u00e6orum.\n12 Consideransque venit ad domum Mari\u00e6 matris Joannis, qui cognominatus est Marcus, ubi erant multi congregati, et orantes.\n13 Pulsante autem eo ostium janu\u00e6, processit puella ad audiendum, nomine Rhode.\n14 Et ut cognovit vocem Petri, pr\u00e6 gaudio non aperuit januam, sed intro currens nuntiavit stare Petrum ante januam.\n15 At illi dixerunt ad eam: Insanis. Illa autem affirmabat sic se habere. Illi autem dicebant: Angelus ejus est.\n16 Petrus autem perseverabat pulsans. Cum autem aperuissent, viderunt eum, et obstupuerunt.\n17\u00a0Annuens autem eis manu ut tacerent, narravit quomodo Dominus eduxisset eum de carcere, dixitque: Nuntiate Jacobo et fratribus h\u00e6c. Et egressus abiit in alium locum.\n \n18 Facta autem die, erat non parva turbatio inter milites, quidnam factum esset de Petro.\n19 Herodes autem cum requisisset eum et non invenisset, inquisitione facta de custodibus, jussit eos duci: descendensque a Jud\u00e6a in C\u00e6saream, ibi commoratus est.\n20 Erat autem iratus Tyriis et Sidoniis. At illi unanimes venerunt ad eum, et persuaso Blasto, qui erat super cubiculum regis, postulabant pacem, eo quod alerentur regiones eorum ab illo.\n21 Statuto autem die Herodes vestitus veste regia sedit pro tribunali, et concionabatur ad eos.\n22 Populus autem acclamabat: Dei voces, et non hominis.\n23 Confestim autem percussit eum angelus Domini, eo quod non dedisset honorem Deo: et consumptus a vermibus, expiravit.\n24 Verbum autem Domini crescebat, et multiplicabatur.\n25 Barnabas autem et Saulus reversi sunt ab Jerosolymis expleto ministerio assumpto Joanne, qui cognominatus est Marcus.","title":"Vulgate: Acts: Acts Chapter 12","type":"page"}