{"collection":"Bible & Christianity","html_url":"https://unchartedknowledge.5gfusion.net/browse/bib/vul/act024.htm","path":"bib/vul/act024.htm","source_url":"https://sacred-texts.com/bib/vul/act024.htm","text":"1 Post quinque autem dies descendit princeps sacerdotum Ananias, cum senioribus quibusdam, et Tertullo quodam oratore, qui adierunt pr\u00e6sidem adversus Paulum.\n2 Et citato Paulo c\u0153pit accusare Tertullus, dicens: Cum in multa pace agamus per te, et multa corrigantur per tuam providentiam,\n3 semper et ubique suscipimus, optime Felix, cum omni gratiarum actione.\n4 Ne diutius autem te protraham, oro, breviter audias nos pro tua clementia.\n5 Invenimus hunc hominem pestiferum, et concitantem seditiones omnibus Jud\u00e6is in universo orbe, et auctorem seditionis sect\u00e6 Nazarenorum:\n6 qui etiam templum violare conatus est, quem et apprehensum voluimus secundum legem nostram judicare.\n7 Superveniens autem tribunus Lysias, cum vi magna eripuit eum de manibus nostris,\n8 jubens accusatores ejus ad te venire: a quo poteris ipse judicans, de omnibus istis cognoscere, de quibus nos accusamus eum.\n9 Adjecerunt autem et Jud\u00e6i, dicentes h\u00e6c ita se habere.\n10 Respondit autem Paulus (annuente sibi pr\u00e6side dicere): Ex multis annis te esse judicem genti huic sciens, bono animo pro me satisfaciam.\n11 Potes enim cognoscere quia non plus sunt mihi dies quam duodecim, ex quo ascendi adorare in Jerusalem:\n12 et neque in templo invenerunt me cum aliquo disputantem, aut concursum facientem turb\u00e6, neque in synagogis, neque in civitate:\n13 neque probare possunt tibi de quibus nunc me accusant.\n14 Confiteor autem hoc tibi, quod secundum sectam quam dicunt h\u00e6resim, sic deservio Patri et Deo meo, credens omnibus qu\u00e6 in lege et prophetis scripta sunt:\n15 spem habens in Deum, quam et hi ipsi exspectant, resurrectionem futuram justorum et iniquorum.\n16 In hoc et ipse studeo sine offendiculo conscientiam habere ad Deum et ad homines semper.\n17 Post annos autem plures eleemosynas facturus in gentem meam, veni, et oblationes, et vota,\n18 in quibus invenerunt me purificatum in templo: non cum turba, neque cum tumultu.\n19 Quidam autem ex Asia Jud\u00e6i, quos oportebat apud te pr\u00e6sto esse, et accusare si quid haberent adversum me:\n20 aut hi ipsi dicant si quid invenerunt in me iniquitatis cum stem in concilio,\n21\u00a0nisi de una hac solummodo voce qua clamavi inter eos stans: Quoniam de resurrectione mortuorum ego judicor hodie a vobis.\n \n22 Distulit autem illos Felix, certissime sciens de via hac, dicens: Cum tribunus Lysias descenderit, audiam vos.\n23 Jussitque centurioni custodire eum, et habere requiem, nec quemquam de suis prohibere ministrare ei.\n24 Post aliquot autem dies veniens Felix cum Drusilla uxore sua, qu\u00e6 erat Jud\u00e6a, vocavit Paulum, et audivit ab eo fidem qu\u00e6 est in Christum Jesum.\n25 Disputante autem illo de justitia, et castitate, et de judicio futuro, tremefactus Felix, respondit: Quod nunc attinet, vade: tempore autem opportuno accersam te:\n26 simul et sperans quod pecunia ei daretur a Paulo, propter quod et frequenter accersens eum, loquebatur cum eo.\n27 Biennio autem expleto, accepit successorem Felix Portium Festum. Volens autem gratiam pr\u00e6stare Jud\u00e6is Felix, reliquit Paulum vinctum.","title":"Vulgate: Acts: Acts Chapter 24","type":"page"}