{"collection":"Bible & Christianity","html_url":"https://unchartedknowledge.5gfusion.net/browse/bib/vul/act027.htm","path":"bib/vul/act027.htm","source_url":"https://sacred-texts.com/bib/vul/act027.htm","text":"1 Ut autem judicatum est navigare eum in Italiam, et tradi Paulum cum reliquis custodiis centurioni nomine Julio cohortis August\u00e6,\n2 ascendentes navem Adrumetinam, incipientes navigare circa Asi\u00e6 loca, sustulimus, perseverante nobiscum Aristarcho Macedone Thessalonicensi.\n3 Sequenti autem die devenimus Sidonem. Humane autem tractans Julius Paulum, permisit ad amicos ire, et curam sui agere.\n4 Et inde cum sustulissemus, subnavigavimus Cyprum, propterea quod essent venti contrarii.\n5 Et pelagus Cilici\u00e6 et Pamphyli\u00e6 navigantes, venimus Lystram, qu\u00e6 est Lyci\u00e6:\n6 et ibi inveniens centurio navem Alexandrinam navigantem in Italiam, transposuit nos in eam.\n7 Et cum multis diebus tarde navigaremus, et vix devenissemus contra Gnidum, prohibente nos vento, adnavigavimus Cret\u00e6 juxta Salmonem:\n8 et vix juxta navigantes, venimus in locum quemdam qui vocatur Boniportus, cui juxta erat civitas Thalassa.\n9 Multo autem tempore peracto, et cum jam non esset tuta navigatio eo quod et jejunium jam pr\u00e6teriisset, consolabatur eos Paulus,\n10 dicens eis: Viri, video quoniam cum injuria et multo damno non solum oneris, et navis, sed etiam animarum nostrarum incipit esse navigatio.\n11 Centurio autem gubernatori et nauclero magis credebat, quam his qu\u00e6 a Paulo dicebantur.\n12 Et cum aptus portus non esset ad hiemandum, plurimi statuerunt consilium navigare inde, si quomodo possent, devenientes Ph\u0153nicen hiemare, portum Cret\u00e6 respicientem ad Africum et ad Corum.\n13\u00a0Aspirante autem austro, \u00e6stimantes propositum se tenere, cum sustulissent de Asson, legebant Cretam.\n \n14 Non post multum autem misit se contra ipsam ventus typhonicus, qui vocatur Euroaquilo.\n15 Cumque arrepta esset navis, et non posset conari in ventum, data nave flatibus, ferebamur.\n16 In insulam autem quamdam decurrentes, qu\u00e6 vocatur Cauda, potuimus vix obtinere scapham.\n17 Qua sublata, adjutoriis utebantur, accingentes navem, timentes ne in Syrtim inciderent, summisso vase sic ferebantur.\n18 Valida autem nobis tempestate jactatis, sequenti die jactum fecerunt:\n19 et tertia die suis manibus armamenta navis projecerunt.\n20 Neque autem sole, neque sideribus apparentibus per plures dies, et tempestate non exigua imminente, jam ablata erat spes omnis salutis nostr\u00e6.\n21 Et cum multa jejunatio fuisset, tunc stans Paulus in medio eorum, dixit: Oportebat quidem, o viri, audito me, non tollere a Creta, lucrique facere injuriam hanc et jacturam.\n22 Et nunc suadeo vobis bono animo esse: amissio enim nullius anim\u00e6 erit ex vobis, pr\u00e6terquam navis.\n23 Astitit enim mihi hac nocte angelus Dei, cujus sum ego, et cui deservio,\n24 dicens: Ne timeas, Paule: C\u00e6sari te oportet assistere: et ecce donavit tibi Deus omnes qui navigant tecum.\n25 Propter quod bono animo estote, viri: credo enim Deo quia sic erit, quemadmodum dictum est mihi.\n26 In insulam autem quamdam oportet nos devenire.\n27 Sed posteaquam quartadecima nox supervenit, navigantibus nobis in Adria circa mediam noctem, suspicabantur naut\u00e6 apparere sibi aliquam regionem.\n28 Qui et summittentes bolidem, invenerunt passus viginti: et pusillum inde separati, invenerunt passus quindecim.\n29 Timentes autem ne in aspera loca incideremus, de puppi mittentes anchoras quatuor, optabant diem fieri.\n30 Nautis vero qu\u00e6rentibus fugere de navi, cum misissent scapham in mare, sub obtentu quasi inciperent a prora anchoras extendere,\n31 dixit Paulus centurioni et militibus: Nisi hi in navi manserint, vos salvi fieri non potestis.\n32 Tunc absciderunt milites funes scaph\u00e6, et passi sunt eam excidere.\n33 Et cum lux inciperet fieri, rogabat Paulus omnes sumere cibum, dicens: Quartadecima die hodie exspectantes jejuni permanetis, nihil accipientes.\n34 Propter quod rogo vos accipere cibum pro salute vestra: quia nullius vestrum capillus de capite peribit.\n35 Et cum h\u00e6c dixisset, sumens panem, gratias egit Deo in conspectu omnium: et cum fregisset, c\u0153pit manducare.\n36 Anim\u00e6quiores autem facti omnes, et ipsi sumpserunt cibum.\n37 Eramus vero univers\u00e6 anim\u00e6 in navi ducent\u00e6 septuaginta sex.\n38 Et satiati cibo alleviabant navem, jactantes triticum in mare.\n39 Cum autem dies factus esset, terram non agnoscebant: sinum vero quemdam considerabant habentem littus, in quem cogitabant si possent ejicere navem.\n40 Et cum anchoras sustulissent, committebant se mari, simul laxantes juncturas gubernaculorum: et levato artemone secundum aur\u00e6 flatum, tendebant ad littus.\n41 Et cum incidissemus in locum dithalassum, impegerunt navem: et prora quidem fixa manebat immobilis, puppis vero solvebatur a vi maris.\n42 Militum autem consilium fuit ut custodias occiderent, ne quis cum enatasset, effugeret.\n43 Centurio autem volens servare Paulum, prohibuit fieri: jussitque eos qui possent natare, emittere se primos, et evadere, et ad terram exire:\n44 et ceteros, alios in tabulis ferebant, quosdam super ea qu\u00e6 de navi erant. Et sic factum est, ut omnes anim\u00e6 evaderent ad terram.","title":"Vulgate: Acts: Acts Chapter 27","type":"page"}