{"collection":"Bible & Christianity","html_url":"https://unchartedknowledge.5gfusion.net/browse/bib/vul/amo001.htm","path":"bib/vul/amo001.htm","source_url":"https://sacred-texts.com/bib/vul/amo001.htm","text":"1\u00a0Verba Amos, qui fuit in pastoribus de Thecue, qu\u00e6 vidit super Isra\u00ebl in diebus Ozi\u00e6, regis Juda, et in diebus Jeroboam, filii Joas, regis Isra\u00ebl, ante duos annos terr\u00e6motus.\n \n2\u00a0Et dixit: [Dominus de Sion rugiet,\n et de Jerusalem dabit vocem suam;\n et luxerunt speciosa pastorum,\n et exsiccatus est vertex Carmeli.\n3\u00a0H\u00e6c dicit Dominus:\n Super tribus sceleribus Damasci,\n et super quatuor non convertam eum,\n eo quod trituraverint in plaustris ferreis Galaad.\n4\u00a0Et mittam ignem in domum Aza\u00ebl,\n et devorabit domos Benadad.\n5\u00a0Et conteram vectem Damasci:\n et disperdam habitatorem de campo idoli,\n et tenentem sceptrum de domo voluptatis:\n et transferetur populus Syri\u00e6 Cyrenen,\n dicit Dominus.\n6\u00a0H\u00e6c dicit Dominus:\n Super tribus sceleribus Gaz\u00e6,\n et super quatuor non convertam eum,\n eo quod transtulerint captivitatem perfectam,\n ut concluderent eam in Idum\u00e6a.\n7\u00a0Et mittam ignem in murum Gaz\u00e6,\n et devorabit \u00e6des ejus.\n8\u00a0Et disperdam habitatorem de Azoto,\n et tenentem sceptrum de Ascalone:\n et convertam manum meam super Accaron,\n et peribunt reliqui Philisthinorum,\n dicit Dominus Deus.\n9\u00a0H\u00e6c dicit Dominus:\n Super tribus sceleribus Tyri,\n et super quatuor non convertam eum,\n eo quod concluserint captivitatem perfectam in Idum\u00e6a,\n et non sint recordati f\u0153deris fratrum.\n10\u00a0Et mittam ignem in murum Tyri,\n et devorabit \u00e6des ejus.\n11\u00a0H\u00e6c dicit Dominus:\n Super tribus sceleribus Edom,\n et super quatuor non convertam eum,\n eo quod persecutus sit in gladio fratrem suum,\n et violaverit misericordiam ejus,\n et tenuerit ultra furorem suum,\n et indignationem suam servaverit usque in finem.\n12\u00a0Mittam ignem in Theman,\n et devorabit \u00e6des Bosr\u00e6.\n13\u00a0H\u00e6c dicit Dominus:\n Super tribus sceleribus filiorum Ammon,\n et super quatuor non convertam eum,\n eo quod dissecuerit pr\u00e6gnantes Galaad\n ad dilatandum terminum suum.\n14\u00a0Et succendam ignem in muro Rabba,\n et devorabit \u00e6des ejus in ululatu in die belli,\n et in turbine in die commotionis.\n15\u00a0Et ibit Melchom in captivitatem,\n ipse et principes ejus simul,\n dicit Dominus.]","title":"Vulgate: Amos: Amos Chapter 1","type":"page"}