{"collection":"Bible & Christianity","html_url":"https://unchartedknowledge.5gfusion.net/browse/bib/vul/amo002.htm","path":"bib/vul/amo002.htm","source_url":"https://sacred-texts.com/bib/vul/amo002.htm","text":"1\u00a0[H\u00e6c dicit Dominus:\n Super tribus sceleribus Moab,\n et super quatuor non convertam eum,\n eo quod incenderit ossa regis Idum\u00e6\u00e6 usque ad cinerem.\n2\u00a0Et mittam ignem in Moab,\n et devorabit \u00e6des Carioth:\n et morietur in sonitu Moab, in clangore tub\u00e6.\n3\u00a0Et disperdam judicem de medio ejus,\n et omnes principes ejus interficiam cum eo,\n dicit Dominus.]\n \n4\u00a0[H\u00e6c dicit Dominus:\n Super tribus sceleribus Juda,\n et super quatuor non convertam eum,\n eo quod abjecerit legem Domini\n et mandata ejus non custodierit:\n deceperant enim eos idola sua,\n post qu\u00e6 abierant patres eorum.\n5\u00a0Et mittam ignem in Juda,\n et devorabit \u00e6des Jerusalem.\n6\u00a0H\u00e6c dicit Dominus:\n Super tribus sceleribus Isra\u00ebl,\n et super quatuor non convertam eum,\n pro eo quod vendiderit pro argento justum,\n et pauperem pro calceamentis.\n7\u00a0Qui conterunt super pulverem terr\u00e6 capita pauperum,\n et viam humilium declinant:\n et filius ac pater ejus ierunt ad puellam,\n ut violarent nomen sanctum meum.\n8\u00a0Et super vestimentis pignoratis accubuerunt juxta omne altare,\n et vinum damnatorum bibebant in domo Dei sui.\n9\u00a0Ego autem exterminavi Amorrh\u00e6um a facie eorum,\n cujus altitudo, cedrorum altitudo ejus,\n et fortis ipse quasi quercus;\n et contrivi fructum ejus desuper,\n et radices ejus subter.\n10\u00a0Ego sum qui ascendere vos feci de terra \u00c6gypti,\n et duxi vos in deserto quadraginta annis,\n ut possideretis terram Amorrh\u00e6i.\n11\u00a0Et suscitavi de filiis vestris in prophetas,\n et de juvenibus vestris nazar\u00e6os.\n Numquid non ita est, filii Isra\u00ebl? dicit Dominus.\n12\u00a0Et propinabitis nazar\u00e6is vinum,\n et prophetis mandabitis, dicentes:\n Ne prophetetis.\n13\u00a0Ecce ego stridebo subter vos,\n sicut stridet plaustrum onustum f\u0153no.\n14\u00a0Et peribit fuga a veloce,\n et fortis non obtinebit virtutem suam,\n et robustus non salvabit animam suam:\n15\u00a0et tenens arcum non stabit,\n et velox pedibus suis non salvabitur,\n et ascensor equi non salvabit animam suam:\n16\u00a0et robustus corde inter fortes nudus fugiet in illa die,\n dicit Dominus.]","title":"Vulgate: Amos: Amos Chapter 2","type":"page"}