{"collection":"Bible & Christianity","html_url":"https://unchartedknowledge.5gfusion.net/browse/bib/vul/amo003.htm","path":"bib/vul/amo003.htm","source_url":"https://sacred-texts.com/bib/vul/amo003.htm","text":"1\u00a0[Audite verbum quod locutus est Dominus super vos, filii Isra\u00ebl,\n super omnem cognationem quam eduxi de terra \u00c6gypti, dicens:\n2\u00a0Tantummodo vos cognovi ex omnibus cognationibus terr\u00e6;\n idcirco visitabo super vos omnes iniquitates vestras.\n3\u00a0Numquid ambulabunt duo pariter,\n nisi convenerit eis?\n4\u00a0numquid rugiet leo in saltu,\n nisi habuerit pr\u00e6dam?\n numquid dabit catulus leonis vocem de cubili suo,\n nisi aliquid apprehenderit?\n5\u00a0numquid cadet avis in laqueum terr\u00e6\n absque aucupe?\n numquid auferetur laqueus de terra\n antequam quid ceperit?\n6\u00a0si clanget tuba in civitate,\n et populus non expavescet?\n si erit malum in civitate,\n quod Dominus non fecerit?\n7\u00a0Quia non facit Dominus Deus verbum,\n nisi revelaverit secretum suum ad servos suos prophetas.\n8\u00a0Leo rugiet, quis non timebit?\n Dominus Deus locutus est, quis non prophetabit?\n9\u00a0Auditum facite in \u00e6dibus Azoti,\n et in \u00e6dibus terr\u00e6 \u00c6gypti,\n et dicite: Congregamini super montes Samari\u00e6,\n et videte insanias multas in medio ejus,\n et calumniam patientes in penetralibus ejus.\n10\u00a0Et nescierunt facere rectum, dicit Dominus,\n thesaurizantes iniquitatem et rapinas in \u00e6dibus suis.\n11\u00a0Propterea h\u00e6c dicit Dominus Deus:\n Tribulabitur et circuietur terra:\n et detrahetur ex te fortitudo tua,\n et diripientur \u00e6des tu\u00e6.\n12\u00a0H\u00e6c dicit Dominus:\n Quomodo si eruat pastor de ore leonis\n duo crura, aut extremum auricul\u00e6,\n sic eruentur filii Isra\u00ebl, qui habitant in Samaria\n in plaga lectuli, et in Damasci grabato.\n13\u00a0Audite, et contestamini in domo Jacob,\n dicit Dominus Deus exercituum;\n14\u00a0quia in die cum visitare c\u0153pero pr\u00e6varicationes Isra\u00ebl,\n super eum visitabo, et super altaria Bethel;\n et amputabuntur cornua altaris, et cadent in terram.\n15\u00a0Et percutiam domum hiemalem cum domo \u00e6stiva,\n et peribunt domus eburne\u00e6,\n et dissipabuntur \u00e6des mult\u00e6,\n dicit Dominus.]","title":"Vulgate: Amos: Amos Chapter 3","type":"page"}