{"collection":"Bible & Christianity","html_url":"https://unchartedknowledge.5gfusion.net/browse/bib/vul/amo005.htm","path":"bib/vul/amo005.htm","source_url":"https://sacred-texts.com/bib/vul/amo005.htm","text":"1\u00a0[Audite verbum istud,\n quod ego levo super vos planctum:\n domus Isra\u00ebl cecidit,\n et non adjiciet ut resurgat.\n2\u00a0Virgo Isra\u00ebl projecta est in terram suam,\n non est qui suscitet eam.\n3\u00a0Quia h\u00e6c dicit Dominus Deus:\n Urbs de qua egrediebantur mille,\n relinquentur in ea centum;\n et de qua egrediebantur centum,\n relinquentur in ea decem in domo Isra\u00ebl.\n4\u00a0Quia h\u00e6c dicit Dominus domui Isra\u00ebl:\n Qu\u00e6rite me, et vivetis.\n5\u00a0Et nolite qu\u00e6rere Bethel,\n et in Galgalam nolite intrare,\n et in Bersabee non transibitis,\n quia Galgala captiva ducetur,\n et Bethel erit inutilis.\n6\u00a0Qu\u00e6rite Dominum, et vivite\n (ne forte comburatur ut ignis domus Joseph, et devorabit,\n et non erit qui extinguat Bethel:\n7\u00a0qui convertitis in absinthium judicium,\n et justitiam in terra relinquitis):\n8\u00a0facientem Arcturum et Orionem,\n et convertentem in mane tenebras,\n et diem in noctem mutantem;\n qui vocat aquas maris,\n et effundit eas super faciem terr\u00e6;\n Dominus nomen est ejus:\n9\u00a0qui subridet vastitatem super robustum,\n et depopulationem super potentem affert.\n10\u00a0Odio habuerunt corripientem in porta,\n et loquentem perfecte abominati sunt.\n11\u00a0Idcirco, pro eo quod diripiebatis pauperem,\n et pr\u00e6dam electam tollebatis ab eo,\n domos quadro lapide \u00e6dificabitis,\n et non habitabitis in eis;\n vineas plantabis amantissimas,\n et non bibetis vinum earum.\n12\u00a0Quia cognovi multa scelera vestra,\n et fortia peccata vestra:\n hostes justi, accipientes munus,\n et pauperes deprimentes in porta.\n13\u00a0Ideo prudens in tempore illo tacebit,\n quia tempus malum est.\n14\u00a0Qu\u00e6rite bonum, et non malum, ut vivatis;\n et erit Dominus Deus exercituum vobiscum, sicut dixistis.\n15\u00a0Odite malum et diligite bonum,\n et constituite in porta judicium:\n si forte misereatur Dominus Deus exercituum reliquiis Joseph.\n16\u00a0Propterea h\u00e6c dicit Dominus Deus exercituum, dominator:\n In omnibus plateis planctus;\n et in cunctis qu\u00e6 foris sunt, dicetur: V\u00e6, v\u00e6!\n et vocabunt agricolam ad luctum,\n et ad planctum eos qui sciunt plangere.\n17\u00a0Et in omnibus vineis erit planctus,\n quia pertransibo in medio tui,\n dicit Dominus.]\n \n18\u00a0[V\u00e6 desiderantibus diem Domini!\n ad quid eam vobis?\n Dies Domini ista, tenebr\u00e6, et non lux.\n19\u00a0Quomodo si fugiat vir a facie leonis,\n et occurrat ei ursus;\n et ingrediatur domum, et innitatur manu sua super parietem,\n et mordeat eum coluber.\n20\u00a0Numquid non tenebr\u00e6 dies Domini, et non lux;\n et caligo, et non splendor in ea?\n21\u00a0Odi, et projeci festivitates vestras,\n et non capiam odorem c\u0153tuum vestrorum.\n22\u00a0Quod si obtuleritis mihi holocautomata, et munera vestra,\n non suscipiam;\n et vota pinguium vestrorum non respiciam.\n23\u00a0Aufer a me tumultum carminum tuorum;\n et cantica lyr\u00e6 tu\u00e6 non audiam.\n24\u00a0Et revelabitur quasi aqua judicium,\n et justitia quasi torrens fortis.\n25\u00a0Numquid hostias et sacrificium obtulistis mihi\n in deserto quadraginta annis, domus Isra\u00ebl?\n26\u00a0et portastis tabernaculum Moloch vestro,\n et imaginem idolorum vestrorum, sidus dei vestri,\n qu\u00e6 fecistis vobis.\n27\u00a0Et migrare vos faciam trans Damascum, dicit Dominus:\n Deus exercituum nomen ejus.]","title":"Vulgate: Amos: Amos Chapter 5","type":"page"}