{"collection":"Bible & Christianity","html_url":"https://unchartedknowledge.5gfusion.net/browse/bib/vul/amo006.htm","path":"bib/vul/amo006.htm","source_url":"https://sacred-texts.com/bib/vul/amo006.htm","text":"1\u00a0[V\u00e6 qui opulenti estis in Sion,\n et confiditis in monte Samari\u00e6:\n optimates capita populorum,\n ingredientes pompatice domum Isra\u00ebl!\n2\u00a0Transite in Chalane, et videte,\n et ite inde in Emath magnam,\n et descendite in Geth Pal\u00e6stinorum,\n et ad optima qu\u00e6que regna horum:\n si latior terminus eorum termino vestro est.\n3\u00a0Qui separati estis in diem malum,\n et appropinquatis solio iniquitatis;\n4\u00a0qui dormitis in lectis eburneis,\n et lascivitis in stratis vestris;\n qui comeditis agnum de grege,\n et vitulos de medio armenti;\n5\u00a0qui canitis ad vocem psalterii,\n sicut David putaverunt se habere vasa cantici,\n6\u00a0bibentes vinum in phialis,\n et optimo unguento delibuti,\n et nihil patiebantur super contritione Joseph.\n7\u00a0Quapropter nunc migrabunt in capite transmigrantium,\n et auferetur factio lascivientium.\n8\u00a0Juravit Dominus Deus in anima sua,\n dicit Dominus Deus exercituum:\n Detestor ego superbiam Jacob,\n et domos ejus odi,\n et tradam civitatem cum habitatoribus suis.\n9\u00a0Quod si reliqui fuerint decem viri in domo una,\n et ipsi morientur.\n10\u00a0Et tollet eum propinquus suus, et comburet eum,\n ut efferat ossa de domo;\n et dicet ei, qui in penetralibus domus est:\n Numquid adhuc est penes te?\n11\u00a0Et respondebit: Finis est.\n Et dicet ei: Tace,\n et non recorderis nominis Domini.\n12\u00a0Quia ecce Dominus mandabit,\n et percutiet domum majorem ruinis,\n et domum minorem scissionibus.\n13\u00a0Numquid currere queunt in petris equi,\n aut arari potest in bubalis?\n quoniam convertistis in amaritudinem judicium,\n et fructum justiti\u00e6 in absinthium.\n14\u00a0Qui l\u00e6tamini in nihilo; qui dicitis:\n Numquid non in fortitudine nostra assumpsimus nobis cornua?\n15\u00a0Ecce enim suscitabo super vos, domus Isra\u00ebl,\n dicit Dominus Deus exercituum, gentem,\n et conteret vos ab introitu Emath usque ad torrentem deserti.]","title":"Vulgate: Amos: Amos Chapter 6","type":"page"}