{"collection":"Bible & Christianity","html_url":"https://unchartedknowledge.5gfusion.net/browse/bib/vul/amo007.htm","path":"bib/vul/amo007.htm","source_url":"https://sacred-texts.com/bib/vul/amo007.htm","text":"1 H\u00e6c ostendit mihi Dominus Deus: et ecce fictor locust\u00e6 in principio germinantium serotini imbris, et ecce serotinus post tonsionem regis.\n2 Et factum est, cum consummasset comedere herbam terr\u00e6, dixi: Domine Deus, propitius esto, obsecro; quis suscitabit Jacob, quia parvulus est?\n3 Misertus est Dominus super hoc: Non erit, dixit Dominus.\n4 H\u00e6c ostendit mihi Dominus Deus: et ecce vocabat judicium ad ignem Dominus Deus; et devoravit abyssum multam, et comedit simul partem.\n5 Et dixi: Domine Deus, quiesce, obsecro; quis suscitabit Jacob, quia parvulus est?\n6 Misertus est Dominus super hoc: Sed et istud non erit, dixit Dominus Deus.\n7 H\u00e6c ostendit mihi Dominus: et ecce Dominus stans super murum litum, et in manu ejus trulla c\u00e6mentarii.\n8\u00a0Et dixit Dominus ad me: Quid tu vides, Amos? Et dixi: Trullam c\u00e6mentarii. Et dixit Dominus: [Ecce ego ponam trullam in medio populi mei Isra\u00ebl;\n non adjiciam ultra superinducere eum.\n9\u00a0Et demolientur excelsa idoli,\n et sanctificationes Isra\u00ebl desolabuntur,\n et consurgam super domum Jeroboam in gladio.]\n10 Et misit Amasias, sacerdos Bethel, ad Jeroboam, regem Isra\u00ebl, dicens: Rebellavit contra te Amos in medio domus Isra\u00ebl; non poterit terra sustinere universos sermones ejus.\n11 H\u00e6c enim dicit Amos: In gladio morietur Jeroboam, et Isra\u00ebl captivus migrabit de terra sua.\n12 Et dixit Amasias ad Amos: Qui vides, gradere: fuge in terram Juda, et comede ibi panem, et prophetabis ibi.\n13 Et in Bethel non adjicies ultra ut prophetes, quia sanctificatio regis est, et domus regni est.\n14 Responditque Amos, et dixit ad Amasiam: Non sum propheta, et non sum filius prophet\u00e6: sed armentarius ego sum vellicans sycomoros.\n15 Et tulit me Dominus cum sequerer gregem, et dixit Dominus ad me: Vade, propheta ad populum meum Isra\u00ebl.\n16\u00a0Et nunc audi verbum Domini: [Tu dicis: Non prophetabis super Isra\u00ebl,\n et non stillabis super domum idoli.\n17\u00a0Propter hoc h\u00e6c dicit Dominus:\n Uxor tua in civitate fornicabitur,\n et filii tui et fili\u00e6 tu\u00e6 in gladio cadent,\n et humus tua funiculo metietur:\n et tu in terra polluta morieris,\n et Isra\u00ebl captivus migrabit de terra sua.]","title":"Vulgate: Amos: Amos Chapter 7","type":"page"}