{"collection":"Bible & Christianity","html_url":"https://unchartedknowledge.5gfusion.net/browse/bib/vul/amo008.htm","path":"bib/vul/amo008.htm","source_url":"https://sacred-texts.com/bib/vul/amo008.htm","text":"1 H\u00e6c ostendit mihi Dominus Deus: et ecce uncinus pomorum.\n2\u00a0Et dixit: Quid tu vides, Amos? Et dixi: Uncinum pomorum. Et dixit Dominus ad me: [Venit finis super populum meum Isra\u00ebl;\n non adjiciam ultra ut pertranseam eum.\n3\u00a0Et stridebunt cardines templi in die illa,\n dicit Dominus Deus:\n multi morientur;\n in omni loco projicietur silentium.]\n \n4\u00a0[Audite hoc, qui conteritis pauperem,\n et deficere facitis egenos terr\u00e6,\n5\u00a0dicentes: Quando transibit mensis,\n et venundabimus merces?\n et sabbatum, et aperiemus frumentum,\n ut imminuamus mensuram, et augeamus siclum,\n et supponamus stateras dolosas,\n6\u00a0ut possideamus in argento egenos et pauperes pro calceamentis,\n et quisquilias frumenti vendamus?\n7\u00a0Juravit Dominus in superbiam Jacob:\n Si oblitus fuero usque ad finem omnia opera eorum.\n8\u00a0Numquid super isto non commovebitur terra,\n et lugebit omnis habitator ejus,\n et ascendet quasi fluvius universus,\n et ejicicetur, et defluet, quasi rivus \u00c6gypti?\n9\u00a0Et erit in die illa, dicit Dominus Deus:\n occidet sol in meridie,\n et tenebrescere faciam terram in die luminis:\n10\u00a0et convertam festivitates vestras in luctum,\n et omnia cantica vestra in planctum,\n et inducam super omne dorsum vestrum saccum,\n et super omne caput calvitium:\n et ponam eam quasi luctum unigeniti,\n et novissima ejus quasi diem amarum.\n11\u00a0Ecce dies veniunt, dicet Dominus,\n et mittam famem in terram:\n non famem panis, neque sitim aqu\u00e6,\n sed audiendi verbum Domini.\n12\u00a0Et commovebuntur a mari usque ad mare,\n et ab aquilone usque ad orientem:\n circuibunt qu\u00e6rentes verbum Domini,\n et non invenient.\n13\u00a0In die illa deficient virgines pulchr\u00e6 et adolescentes in siti,\n14\u00a0qui jurant in delicto Samari\u00e6,\n et dicunt: Vivit Deus tuus, Dan,\n et vivit via Bersabee;\n et cadent, et non resurgent ultra.]","title":"Vulgate: Amos: Amos Chapter 8","type":"page"}