{"collection":"Bible & Christianity","html_url":"https://unchartedknowledge.5gfusion.net/browse/bib/vul/amo009.htm","path":"bib/vul/amo009.htm","source_url":"https://sacred-texts.com/bib/vul/amo009.htm","text":"1\u00a0Vidi Dominum stantem super altare, et dixit: [Percute cardinem,\n et commoveantur superliminaria:\n avaritia enim in capite omnium,\n et novissimum eorum in gladio interficiam;\n non erit fuga eis.\n Fugient, et non salvabitur ex eis qui fugerit.\n2\u00a0Si descenderint usque ad infernum,\n inde manus mea educet eos;\n et si ascenderint usque in c\u00e6lum,\n inde detraham eos.\n3\u00a0Et si absconditi fuerint in vertice Carmeli,\n inde scrutans auferam eos;\n et si celaverint se ab oculis meis in profundo maris,\n ibi mandabo serpenti, et mordebit eos.\n4\u00a0Et si abierint in captivitatem coram inimicis suis,\n ibi mandabo gladio, et occidet eos:\n et ponam oculos meos super eos in malum,\n et non in bonum.\n5\u00a0Et Dominus Deus exercituum, qui tangit terram, et tabescet,\n et lugebunt omnes habitantes in ea:\n et ascendet sicut rivus omnis,\n et defluet sicut fluvius \u00c6gypti.\n6\u00a0Qui \u00e6dificat in c\u00e6lo ascensionem suam,\n et fasciculum suum super terram fundavit;\n qui vocat aquas maris,\n et effundit eas super faciem terr\u00e6:\n Dominus nomen ejus.\n7\u00a0Numquid non ut filii \u00c6thiopum\n vos estis mihi, filii Isra\u00ebl? ait Dominus.\n Numquid non Isra\u00ebl ascendere feci de terra \u00c6gypti,\n et Pal\u00e6stinos de Cappadocia,\n et Syros de Cyrene?]\n \n8\u00a0[Ecce oculi Domini Dei super regnum peccans:\n et conteram illud a facie terr\u00e6;\n verumtamen conterens non conteram domum Jacob,\n dicit Dominus.\n9\u00a0Ecce enim mandabo ego,\n et concutiam in omnibus gentibus domum Isra\u00ebl,\n sicut concutitur triticum in cribro,\n et non cadet lapillus super terram.\n10\u00a0In gladio morientur omnes peccatores populi mei,\n qui dicunt: Non appropinquabit,\n et non veniet super nos malum.\n11\u00a0In die illa suscitabo tabernaculum David, quod cecidit:\n et re\u00e6dificabo aperturas murorum ejus,\n et ea qu\u00e6 corruerant instaurabo:\n et re\u00e6dificabo illud sicut in diebus antiquis,\n12\u00a0ut possideant reliquias Idum\u00e6\u00e6, et omnes nationes:\n eo quod invocatum sit nomen meum super eos,\n dicit Dominus faciens h\u00e6c.\n13\u00a0Ecce dies veniunt, dicit Dominus,\n et comprehendet arator messorem,\n et calcator uv\u00e6 mittentem semen:\n et stillabunt montes dulcedinem,\n et omnes colli culti erunt.\n14\u00a0Et convertam captivitatem populi mei Isra\u00ebl;\n et \u00e6dificabunt civitates desertas, et inhabitabunt;\n et plantabunt vineas, et bibent vinum earum,\n et facient hortos, et comedent fructus eorum.\n15\u00a0Et plantabo eos super humum suam,\n et non evellam eos ultra de terra sua, quam dedi eis,\n dicit Dominus Deus tuus.]","title":"Vulgate: Amos: Amos Chapter 9","type":"page"}