{"collection":"Bible & Christianity","html_url":"https://unchartedknowledge.5gfusion.net/browse/bib/vul/bar001.htm","path":"bib/vul/bar001.htm","source_url":"https://sacred-texts.com/bib/vul/bar001.htm","text":"1 Et h\u00e6c verba libri qu\u00e6 scripsit Baruch filius Neri\u00e6, filii Maasi\u00e6, filii Sedeci\u00e6, filii Sedei, filii Helci\u00e6, in Babylonia,\n2 in anno quinto, in septimo die mensis, in tempore quo ceperunt Chald\u00e6i Jerusalem, et succenderunt eam igni.\n3 Et legit Baruch verba libri hujus ad aures Jechoni\u00e6 filii Joakim regis Juda, et ad aures universi populi venientis ad librum,\n4 et ad aures potentium, filiorum regum, et ad aures presbyterorum, et ad aures populi, a minimo usque ad maximum eorum, omnium habitantium in Babylonia, ad flumen Sodi.\n5 Qui audientes plorabant, et jejunabant, et orabant in conspectu Domini.\n6 Et collegerunt pecuniam, secundum quod potuit uniuscujusque manus,\n7 et miserunt in Jerusalem ad Joakim filium Helci\u00e6 filii Salom sacerdotem, et ad sacerdotes, et ad omnem populum qui inventi sunt cum eo in Jerusalem:\n8 cum acciperet vasa templi Domini, qu\u00e6 ablata fuerant de templo, revocare in terram Juda, decima die mensis Sivan, vasa argentea qu\u00e6 fecit Sedecias filius Josi\u00e6 rex Juda,\n9 posteaquam cepisset Nabuchodonosor rex Babylonis Jechoniam, et principes, et cunctos potentes, et populum terr\u00e6, ab Jerusalem, et duxit eos vinctos in Babylonem.\n10 Et dixerunt: Ecce misimus ad vos pecunias, de quibus emite holocautomata et thus: et facite manna, et offerte pro peccato, ad aram Domini Dei nostri:\n11 et orate pro vita Nabuchodonosor regis Babylonis, et pro vita Baltassar filii ejus, ut sint dies eorum sicut dies c\u00e6li super terram:\n12 et ut det Dominus virtutem nobis, et illuminet oculos nostros, ut vivamus sub umbra Nabuchodonosor regis Babylonis, et sub umbra Baltassar filii ejus, et serviamus eis multis diebus, et inveniamus gratiam in conspectu eorum.\n13 Et pro nobis ipsis orate ad Dominum Deum nostrum, quia peccavimus Domino Deo nostro, et non est aversus furor ejus a nobis usque in hunc diem.\n14 Et legite librum istum quem misimus ad vos recitari in templo Domini, in die solemni et in die opportuno:\n15\u00a0et dicetis: [Domino Deo nostro justitia,\n nobis autem confusio faciei nostr\u00e6,\n sicut est dies h\u00e6c omni Juda,\n et habitantibus in Jerusalem:\n16\u00a0regibus nostris, et principibus nostris,\n et sacerdotibus nostris, et prophetis nostris,\n et patribus nostris.\n17\u00a0Peccavimus ante Dominum Deum nostrum,\n et non credidimus, diffidentes in eum:\n18\u00a0et non fuimus subjectibiles illi,\n et non audivimus vocem Domini Dei nostri,\n ut ambularemus in mandatis ejus, qu\u00e6 dedit nobis.\n19\u00a0A die qua eduxit patres nostros de terra \u00c6gypti,\n usque ad diem hanc,\n eramus incredibiles ad Dominum Deum nostrum:\n et dissipati recessimus, ne audiremus vocem ipsius:\n20\u00a0et adh\u00e6serunt nobis multa mala et maledictiones\n qu\u00e6 constituit Dominus Moysi servo suo,\n qui eduxit patres nostros de terra \u00c6gypti,\n dare nobis terram fluentem lac et mel, sicut hodierna die.\n21\u00a0Et non audivimus vocem Domini Dei nostri,\n secundum omnia verba prophetarum quos misit ad nos:\n22\u00a0et abivimus unusquisque in sensum cordis nostri maligni,\n operari diis alienis,\n facientes mala ante oculos Domini Dei nostri.]","title":"Vulgate: Baruch: Baruch Chapter 1","type":"page"}