{"collection":"Bible & Christianity","html_url":"https://unchartedknowledge.5gfusion.net/browse/bib/vul/bar003.htm","path":"bib/vul/bar003.htm","source_url":"https://sacred-texts.com/bib/vul/bar003.htm","text":"1\u00a0[Et nunc, Domine omnipotens, Deus Isra\u00ebl,\n anima in angustiis, et spiritus anxius clamat ad te.\n2\u00a0Audi, Domine, et miserere,\n quia Deus es misericors:\n et miserere nostri, quia peccavimus ante te:\n3\u00a0quia tu sedes in sempiternum,\n et nos, peribimus in \u00e6vum?\n4\u00a0Domine omnipotens, Deus Isra\u00ebl,\n audi nunc orationem mortuorum Isra\u00ebl,\n et filiorum ipsorum qui peccaverunt ante te,\n et non audierunt vocem Domini Dei sui,\n et agglutinata sunt nobis mala.\n5\u00a0Noli meminisse iniquitatum patrum nostrorum,\n sed memento manus tu\u00e6 et nominis tui in tempore isto:\n6\u00a0quia tu es Dominus Deus noster,\n et laudabimus te, Domine:\n7\u00a0quia propter hoc dedisti timorem tuum in cordibus nostris,\n et ut invocemus nomen tuum,\n et laudemus te in captivitate nostra,\n quia convertimur ab iniquitate patrum nostrorum,\n qui peccaverunt ante te.\n8\u00a0Et ecce nos in captivitate nostra sumus hodie,\n qua nos dispersisti in improperium,\n et in maledictum, et in peccatum,\n secundum omnes iniquitates patrum nostrorum,\n qui recesserunt a te, Domine Deus noster.]\n \n9\u00a0[Audi, Isra\u00ebl, mandata vit\u00e6:\n auribus percipe, ut scias prudentiam.\n10\u00a0Quid est, Isra\u00ebl, quod in terra inimicorum es,\n11\u00a0inveterasti in terra aliena,\n coinquinatus es cum mortuis,\n deputatus es cum descendentibus in infernum?\n12\u00a0Dereliquisti fontem sapienti\u00e6:\n13\u00a0nam si in via Dei ambulasses,\n habitasses utique in pace sempiterna.\n14\u00a0Disce ubi sit prudentia,\n ubi sit virtus, ubi sit intellectus,\n ut scias simul ubi sit longiturnitas vit\u00e6 et victus,\n ubi sit lumen oculorum, et pax.\n15\u00a0Quis invenit locum ejus?\n et quis intravit in thesauros ejus?\n16\u00a0Ubi sunt principes gentium,\n et qui dominantur super bestias qu\u00e6 sunt super terram?\n17\u00a0qui in avibus c\u00e6li ludunt,\n18\u00a0qui argentum thesaurizant, et aurum,\n in quo confidunt homines,\n et non est finis acquisitionis eorum?\n qui argentum fabricant, et solliciti sunt,\n nec est inventio operum illorum?\n19\u00a0Exterminati sunt, et ad inferos descenderunt,\n et alii loco eorum surrexerunt.\n20\u00a0Juvenes viderunt lumen, et habitaverunt super terram,\n viam autem disciplin\u00e6 ignoraverunt,\n21\u00a0neque intellexerunt semitas ejus,\n neque filii eorum susceperunt eam:\n a facie ipsorum longe facta est;\n22\u00a0non est audita in terra Chanaan,\n neque visa est in Theman.\n23\u00a0Filii quoque Agar, qui exquirunt prudentiam qu\u00e6 de terra est,\n negotiatores Merrh\u00e6 et Theman,\n et fabulatores, et exquisitores prudenti\u00e6 et intelligenti\u00e6:\n viam autem sapienti\u00e6 nescierunt,\n neque commemorati sunt semitas ejus.\n24\u00a0O Isra\u00ebl, quam magna est domus Dei,\n et ingens locus possessionis ejus!\n25\u00a0magnus est, et non habet finem:\n excelsus, et immensus.\n26\u00a0Ibi fuerunt gigantes nominati illi, qui ab initio fuerunt,\n statura magna, scientes bellum.\n27\u00a0Non hos elegit Dominus,\n neque viam disciplin\u00e6 invenerunt:\n propterea perierunt,\n28\u00a0et quoniam non habuerunt sapientiam,\n interierunt propter suam insipientiam.\n29\u00a0Quis ascendit in c\u00e6lum, et accepit eam,\n et eduxit eam de nubibus?\n30\u00a0Quis transfretavit mare, et invenit illam, et attulit illam super aurum electum?\n31\u00a0Non est qui possit scire vias ejus,\n neque qui exquirat semitas ejus:\n32\u00a0sed qui scit universa novit eam,\n et adinvenit eam prudentia sua\n qui pr\u00e6paravit terram in \u00e6terno tempore:\n et replevit eam pecudibus et quadrupedibus\n33\u00a0qui emittit lumen, et vadit,\n et vocavit illud, et obedit illi in tremore.\n34\u00a0Stell\u00e6 autem dederunt lumen in custodiis suis,\n et l\u00e6tat\u00e6 sunt:\n35\u00a0vocat\u00e6 sunt, et dixerunt: Adsumus,\n et luxerunt ei cum jucunditate, qui fecit illas.\n36\u00a0Hic est Deus noster,\n et non \u00e6stimabitur alius adversus eum.\n37\u00a0Hic adinvenit omnem viam disciplin\u00e6,\n et tradidit illam Jacob puero suo,\n et Isra\u00ebl dilecto suo.\n38\u00a0Post h\u00e6c in terris visus est,\n et cum hominibus conversatus est.]","title":"Vulgate: Baruch: Baruch Chapter 3","type":"page"}