{"collection":"Bible & Christianity","html_url":"https://unchartedknowledge.5gfusion.net/browse/bib/vul/ch1012.htm","path":"bib/vul/ch1012.htm","source_url":"https://sacred-texts.com/bib/vul/ch1012.htm","text":"1 Hi quoque venerunt ad David in Siceleg, cum adhuc fugeret Saul filium Cis, qui erant fortissimi et egregii pugnatores,\n2 tendentes arcum, et utraque manu fundis saxa jacientes, et dirigentes sagittas, de fratribus Saul ex Benjamin.\n3 Princeps Ahiecer, et Joas filii Samaa Gabaathites, et Jaziel, et Phallet filii Azmoth, et Baracha, et Jehu Anathotites.\n4 Samaias quoque Gabaonites fortissimus inter triginta et super triginta. Jeremias, et Jeheziel, et Johanan, et Jezabad Gaderothites.\n5 Et Eluzai, et Jerimuth, et Baalia, et Samaria, et Saphatia Haruphites.\n6 Elcana, et Jesia, et Azareel, et Jo\u00ebzer, et Jesbaam de Carehim:\n7\u00a0Jo\u00ebla quoque, et Zabadia filii Jeroham de Gedor.\n \n8 Sed et de Gaddi transfugerunt ad David cum lateret in deserto, viri robustissimi, et pugnatores optimi, tenentes clypeum et hastam: facies eorum quasi facies leonis, et veloces quasi capre\u00e6 in montibus:\n9 Ezer princeps, Obdias secundus, Eliab tertius,\n10 Masmana quartus, Jeremias quintus,\n11 Ethi sextus, Eliel septimus,\n12 Johanan octavus, Elzebad nonus,\n13 Jeremias decimus, Machbanai undecimus.\n14 Hi de filiis Gad principes exercitus: novissimus centum militibus pr\u00e6erat, et maximus mille.\n15\u00a0Isti sunt qui transierunt Jordanem mense primo, quando inundare consuevit super ripas suas: et omnes fugaverunt qui morabantur in vallibus ad orientalem plagam et occidentalem.\n \n16 Venerunt autem et de Benjamin et de Juda ad pr\u00e6sidium in quo morabatur David.\n17 Egressusque est David obviam eis, et ait: Si pacifice venistis ad me ut auxiliemini mihi, cor meum jungatur vobis: si autem insidiamini mihi pro adversariis meis, cum ego iniquitatem in manibus non habeam, videat Deus patrum nostrorum, et judicet.\n18\u00a0Spiritus vero induit Amasai principem inter triginta, et ait: Tui sumus, o David, et tecum, fili Isai. Pax, pax tibi, et pax adjutoribus tuis: te enim adjuvat Deus tuus. Suscepit ergo eos David, et constituit principes turm\u00e6.\n \n19 Porro de Manasse transfugerunt ad David, quando veniebat cum Philisthiim adversus Saul ut pugnaret: et non dimicavit cum eis, quia inito consilio remiserunt eum principes Philisthinorum, dicentes: Periculo capitis nostri revertetur ad dominum suum Saul.\n20 Quando igitur reversus est in Siceleg, transfugerunt ad eum de Manasse, Ednas, et Jozabad, et Jedihel, et Micha\u00ebl, et Ednas, et Jozabad, et Eliu, et Salathi, principes millium in Manasse.\n21 Hi pr\u00e6buerunt auxilium David adversus latrunculos: omnes enim erant viri fortissimi, et facti sunt principes in exercitu.\n22\u00a0Sed et per singulos dies veniebant ad David ad auxiliandum ei, usque dum fieret grandis numerus, quasi exercitus Dei.\n \n23 Iste quoque est numerus principum exercitus qui venerunt ad David cum esset in Hebron, ut transferrent regnum Saul ad eum, juxta verbum Domini.\n24 Filii Juda portantes clypeum et hastam, sex millia octingenti expediti ad pr\u00e6lium.\n25 De filiis Simeon virorum fortissimorum ad pugnandum, septem millia centum.\n26 De filiis Levi, quatuor millia sexcenti.\n27 Jojoda quoque princeps de stirpe Aaron, et cum eo tria millia septingenti.\n28 Sadoc etiam puer egregi\u00e6 indolis, et domus patris ejus, principes viginti duo.\n29 De filiis autem Benjamin fratribus Saul, tria millia: magna enim pars eorum adhuc sequebatur domum Saul.\n30 Porro de filiis Ephraim viginti millia octingenti, fortissimi robore, viri nominati in cognationibus suis.\n31 Et ex dimidia tribu Manasse, decem et octo millia, singuli per nomina sua, venerunt ut constituerent regem David.\n32 De filiis quoque Issachar viri eruditi, qui noverant singula tempora ad pr\u00e6cipiendum quid facere deberet Isra\u00ebl, principes ducenti: omnis autem reliqua tribus eorum consilium sequebatur.\n33 Porro de Zabulon qui egrediebantur ad pr\u00e6lium, et stabant in acie instructi armis bellicis, quinquaginta millia venerunt in auxilium, non in corde duplici.\n34 Et de Nephthali, principes mille, et cum eis instructi clypeo et hasta, triginta et septem millia.\n35 De Dan etiam pr\u00e6parati ad pr\u00e6lium, viginti octo millia sexcenti.\n36 Et de Aser egredientes ad pugnam, et in acie provocantes, quadraginta millia.\n37 Trans Jordanem autem de filiis Ruben, et de Gad, et dimidia parte tribus Manasse, instructi armis bellicis, centum viginti millia.\n38 Omnes isti viri bellatores expediti ad pugnandum, corde perfecto venerunt in Hebron, ut constituerent regem David super universum Isra\u00ebl: sed et omnes reliqui ex Isra\u00ebl uno corde erant, ut rex fieret David.\n39 Fueruntque ibi apud David tribus diebus comedentes et bibentes: pr\u00e6paraverant enim eis fratres sui.\n40 Sed et qui juxta eos erant, usque ad Issachar, et Zabulon, et Nephthali, afferebant panes in asinis, et camelis, et mulis, et bobus ad vescendum: farinam, palathas, uvam passam, vinum, oleum, boves, arietes ad omnem copiam: gaudium quippe erat in Isra\u00ebl.","title":"Vulgate: 1 Chronicles: 1 Chronicles Chapter 12","type":"page"}