{"collection":"Bible & Christianity","html_url":"https://unchartedknowledge.5gfusion.net/browse/bib/vul/ch1013.htm","path":"bib/vul/ch1013.htm","source_url":"https://sacred-texts.com/bib/vul/ch1013.htm","text":"1 Iniit autem consilium David cum tribunis, et centurionibus, et universis principibus,\n2 et ait ad omnem c\u0153tum Isra\u00ebl: Si placet vobis, et a Domino Deo nostro egreditur sermo quem loquor, mittamus ad fratres nostros reliquos in universas regiones Isra\u00ebl, et ad sacerdotes et Levitas qui habitant in suburbanis urbium, ut congregentur ad nos,\n3 et reducamus arcam Dei nostri ad nos: non enim requisivimus eam in diebus Saul.\n4 Et respondit universa multitudo ut ita fieret: placuerat enim sermo omni populo.\n5 Congregavit ergo David cunctum Isra\u00ebl, a Sihor \u00c6gypti usque dum ingrediaris Emath, ut adduceret arcam Dei de Cariathiarim.\n6 Et ascendit David, et omnis vir Isra\u00ebl, ad collem Cariathiarim, qui est in Juda, ut afferret inde arcam Domini Dei sedentis super cherubim, ubi invocatum est nomen ejus.\n7 Imposueruntque arcam Dei super plaustrum novum, de domo Abinadab: Oza autem, et frater ejus minabant plaustrum.\n8 Porro David, et universus Isra\u00ebl, ludebant coram Deo omni virtute in canticis, et in citharis, et psalteriis, et tympanis, et cymbalis, et tubis.\n9 Cum autem pervenisset ad aream Chidon, tetendit Oza manum suam, ut sustentaret arcam: bos quippe lasciviens paululum inclinaverat eam.\n10 Iratus est itaque Dominus contra Ozam, et percussit eum, eo quod tetigisset arcam: et mortuus est ibi coram Domino.\n11 Contristatusque est David, eo quod divisisset Dominus Ozam: vocavitque locum illum Divisio Oz\u00e6, usque in pr\u00e6sentem diem.\n12 Et timuit Deum tunc temporis, dicens: Quomodo possum ad me introducere arcam Dei?\n13 et ob hanc causam non adduxit eam ad se, hoc est, in civitatem David, sed avertit in domum Obededom Geth\u00e6i.\n14 Mansit ergo arca Dei in domo Obededom tribus mensibus: et benedixit Dominus domui ejus, et omnibus qu\u00e6 habebat.","title":"Vulgate: 1 Chronicles: 1 Chronicles Chapter 13","type":"page"}