{"collection":"Bible & Christianity","html_url":"https://unchartedknowledge.5gfusion.net/browse/bib/vul/ch1015.htm","path":"bib/vul/ch1015.htm","source_url":"https://sacred-texts.com/bib/vul/ch1015.htm","text":"1 Fecit quoque sibi domos in civitate David: et \u00e6dificavit locum arc\u00e6 Dei, tetenditque ei tabernaculum.\n2 Tunc dixit David: Illicitum est ut a quocumque portetur arca Dei nisi a Levitis, quos elegit Dominus ad portandum eam, et ad ministrandum sibi usque in \u00e6ternum.\n3 Congregavitque universum Isra\u00ebl in Jerusalem, ut afferretur arca Dei in locum suum, quem pr\u00e6paraverat ei:\n4 necnon et filios Aaron, et Levitas.\n5 De filiis Caath, Uriel princeps fuit, et fratres ejus centum viginti.\n6 De filiis Merari, Asaia princeps: et fratres ejus ducenti viginti.\n7 De filiis Gersom, Jo\u00ebl princeps: et fratres ejus centum triginta.\n8 De filiis Elisaphan, Semeias princeps: et fratres ejus ducenti.\n9 De filiis Hebron, Eliel princeps: et fratres ejus octoginta.\n10 De filiis Oziel, Aminadab princeps: et fratres ejus centum duodecim.\n11 Vocavitque David Sadoc et Abiathar sacerdotes, et Levitas, Uriel, Asaiam, Jo\u00ebl, Semeiam, Eliel, et Aminadab:\n12 et dixit ad eos: Vos, qui estis principes familiarum Leviticarum, sanctificamini cum fratribus vestris, et afferte arcam Domini Dei Isra\u00ebl ad locum qui ei pr\u00e6paratus est:\n13 ne ut a principio, quia non eratis pr\u00e6sentes, percussit nos Dominus; sic et nunc fiat, illicitum quid nobis agentibus.\n14 Sanctificati sunt ergo sacerdotes et Levit\u00e6 ut portarent arcam Domini Dei Isra\u00ebl.\n15 Et tulerunt filii Levi arcam Dei, sicut pr\u00e6ceperat Moyses juxta verbum Domini, humeris suis in vectibus.\n16 Dixitque David principibus Levitarum, ut constituerent de fratribus suis cantores in organis musicorum, nablis videlicet, et lyris, et cymbalis, ut resonaret in excelsis sonitus l\u00e6titi\u00e6.\n17 Constitueruntque Levitas: Heman filium Jo\u00ebl, et de fratribus ejus Asaph filium Barachi\u00e6: de filiis vero Merari, fratribus eorum: Ethan filium Casai\u00e6.\n18 Et cum eis fratres eorum: in secundo ordine, Zachariam, et Ben, et Jaziel, et Semiramoth, et Jahiel, et Ani, Eliab, et Banaiam, et Maasiam, et Mathathiam, et Eliphalu, et Maceniam, et Obededom, et Jehiel, janitores.\n19 Porro cantores, Heman, Asaph, et Ethan, in cymbalis \u00e6neis concrepantes.\n20 Zacharias autem, et Oziel, et Semiramoth, et Jahiel, et Ani, et Eliab, et Maasias, et Banaias in nablis arcana cantabant.\n21 Porro Mathathias, et Eliphalu, et Macenias, et Obededom, et Jehiel, et Ozaziu, in citharis pro octava canebant epinicion.\n22 Chonenias autem princeps Levitarum, propheti\u00e6 pr\u00e6erat, ad pr\u00e6cinendam melodiam: erat quippe valde sapiens.\n23 Et Barachias, et Elcana, janitores arc\u00e6.\n24\u00a0Porro Sebenias, et Josaphat, et Nathana\u00ebl, et Amasai, et Zacharias, et Banaias, et Eliezer sacerdotes, clangebant tubis coram arca Dei: et Obededom et Jehias erant janitores arc\u00e6.\n \n25 Igitur David, et omnes majores natu Isra\u00ebl, et tribuni, ierunt ad deportandam arcam f\u0153deris Domini de domo Obededom cum l\u00e6titia.\n26 Cumque adjuvisset Deus Levitas qui portabant arcam f\u0153deris Domini, immolabantur septem tauri, et septem arietes.\n27 Porro David erat indutus stola byssina, et universi Levit\u00e6 qui portabant arcam, cantoresque, et Chonenias princeps propheti\u00e6 inter cantores: David autem etiam indutus erat ephod lineo.\n28 Universusque Isra\u00ebl deducebant arcam f\u0153deris Domini in jubilo, et sonitu buccin\u00e6, et tubis, et cymbalis, et nablis, et citharis concrepantes.\n29 Cumque pervenisset arca f\u0153deris Domini usque ad civitatem David, Michol filia Saul prospiciens per fenestram vidit regem David saltantem atque ludentem, et despexit eum in corde suo.","title":"Vulgate: 1 Chronicles: 1 Chronicles Chapter 15","type":"page"}