{"collection":"Bible & Christianity","html_url":"https://unchartedknowledge.5gfusion.net/browse/bib/vul/ch1027.htm","path":"bib/vul/ch1027.htm","source_url":"https://sacred-texts.com/bib/vul/ch1027.htm","text":"1 Filii autem Isra\u00ebl secundum numerum suum, principes familiarum, tribuni, et centuriones, et pr\u00e6fecti, qui ministrabant regi juxta turmas suas, ingredientes et egredientes per singulos menses in anno, viginti quatuor millibus singuli pr\u00e6erant.\n2 Prim\u00e6 turm\u00e6 in primo mense Jesboam pr\u00e6erat filius Zabdiel, et sub eo viginti quatuor millia;\n3 de filiis Phares, princeps cunctorum principum in exercitu mense primo.\n4 Secundi mensis habebat turmam Dudia Ahohites, et post se alter nomine Macelloth, qui regebat partem exercitus viginti quatuor millium.\n5 Dux quoque turm\u00e6 terti\u00e6 in mense tertio erat Banaias filius Jojad\u00e6 sacerdos: et in divisione sua viginti quatuor millia.\n6 Ipse est Banaias fortissimus inter triginta, et super triginta: pr\u00e6erat autem turm\u00e6 ipsius Amizabad filius ejus.\n7 Quartus, mense quarto, Asahel frater Joab, et Zabadias filius ejus post eum: et in turma ejus viginti quatuor millia.\n8 Quintus, mense quinto, princeps Samaoth Jezerites: et in turma ejus viginti quatuor millia.\n9 Sextus, mense sexto, Hira filius Acces Thecuites: et in turma ejus viginti quatuor millia.\n10 Septimus, mense septimo, Helles Phallonites de filiis Ephraim: et in turma ejus viginti quatuor millia.\n11 Octavus, mense octavo, Sobochai Husathites de stirpe Zarahi: et in turma ejus viginti quatuor millia.\n12 Nonus, mense nono, Abiezer Anathothites de filiis Jemini: et in turma ejus viginti quatuor millia.\n13 Decimus, mense decimo, Marai, et ipse Netophathites de stirpe Zarai: et in turma ejus viginti quatuor millia.\n14 Undecimus, mense undecimo, Banaias Pharathonites de filiis Ephraim: et in turma ejus viginti quatuor millia.\n15 Duodecimus, mense duodecimo, Holdai Netophathites, de stirpe Gothoniel: et in turma ejus viginti quatuor millia.\n16 Porro tribubus pr\u00e6erant Isra\u00ebl, Rubenitis, dux Eliezer filius Zechri: Simeonitis, dux Saphatias filius Maacha:\n17 Levitis, Hasabias filius Camuel: Aaronitis, Sadoc:\n18 Juda, Eliu frater David: Issachar, Amri filius Micha\u00ebl.\n19 Zabulonitis, Jesmaias filius Abdi\u00e6: Nephthalitibus, Jerimoth filius Ozriel:\n20 filiis Ephraim, Osee filius Ozaziu: dimidi\u00e6 tribui Manasse, Jo\u00ebl filius Phadai\u00e6:\n21 et dimidi\u00e6 tribui Manasse in Galaad, Jaddo filius Zachari\u00e6: Benjamin autem, Jasiel filius Abner:\n22 Dan vero, Ezrihel filius Jeroham: hi principes filiorum Isra\u00ebl.\n23 Noluit autem David numerare eos a viginti annis inferius: quia dixerat Dominus ut multiplicaret Isra\u00ebl quasi stellas c\u00e6li.\n24\u00a0Joab filius Sarvi\u00e6 c\u0153perat numerare, nec complevit: quia super hoc ira irruerat in Isra\u00ebl, et idcirco numerus eorum qui fuerant recensiti, non est relatus in fastos regis David.\n \n25 Super thesauros autem regis fuit Azmoth filius Adiel: his autem thesauris, qui erant in urbibus, et in vicis, et in turribus, pr\u00e6sidebat Jonathan filius Ozi\u00e6.\n26 Operi autem rustico, et agricolis qui exercebant terram, pr\u00e6erat Ezri filius Chelub:\n27 vinearumque cultoribus, Semeias Romathites: cellis autem vinariis, Zabdias Aphonites.\n28 Nam super oliveta et ficeta qu\u00e6 erant in campestribus, Balanam Gederites: super apothecas autem olei, Joas.\n29 Porro armentis qu\u00e6 pascebantur in Saron, pr\u00e6positus fuit Setrai Saronites: et super boves in vallibus, Saphat filius Adli:\n30 super camelos vero, Ubil Ismahelites: et super asinos, Jadias Meronathites:\n31 super oves quoque, Jaziz Agareus: omnes hi, principes substanti\u00e6 regis David.\n32 Jonathan autem patruus David, consiliarius, vir prudens et litteratus: ipse et Jahiel filius Hachamoni erant cum filiis regis.\n33 Achitophel etiam consiliarius regis, et Chusai Arachites amicus regis.\n34 Post Achitophel fuit Jojada filius Banai\u00e6, et Abiathar. Princeps autem exercitus regis erat Joab.","title":"Vulgate: 1 Chronicles: 1 Chronicles Chapter 27","type":"page"}