{"collection":"Bible & Christianity","html_url":"https://unchartedknowledge.5gfusion.net/browse/bib/vul/ch2004.htm","path":"bib/vul/ch2004.htm","source_url":"https://sacred-texts.com/bib/vul/ch2004.htm","text":"1 Fecit quoque altare \u00e6neum viginti cubitorum longitudinis, et viginti cubitorum latitudinis, et decem cubitorum altitudinis.\n2 Mare etiam fusile decem cubitis a labio usque ad labium, rotundum per circuitum: quinque cubitos habebat altitudinis, et funiculus triginta cubitorum ambiebat gyrum ejus.\n3 Similitudo quoque boum erat subter illud, et decem cubitis qu\u00e6dam extrinsecus c\u00e6latur\u00e6, quasi duobus versibus alvum maris circuibant. Boves autem erant fusiles:\n4 et ipsum mare super duodecim boves impositum erat, quorum tres respiciebant ad aquilonem, et alii tres ad occidentem: porro tres alii meridiem, et tres qui reliqui erant, orientem, habentes mare superpositum: posteriora autem boum erant intrinsecus sub mari.\n5 Porro vastitas ejus habebat mensuram palmi, et labium illius erat quasi labium calicis, vel repandi lilii: capiebatque tria millia metretas.\n6 Fecit quoque conchas decem: et posuit quinque a dextris, et quinque a sinistris, ut lavarent in eis omnia qu\u00e6 in holocaustum oblaturi erant: porro in mari sacerdotes lavabantur.\n7 Fecit autem et candelabra aurea decem secundum speciem qua jussa erant fieri: et posuit ea in templo, quinque a dextris, et quinque a sinistris.\n8 Necnon et mensas decem: et posuit eas in templo, quinque a dextris, et quinque a sinistris: phialas quoque aureas centum.\n9 Fecit etiam atrium sacerdotum, et basilicam grandem: et ostia in basilica, qu\u00e6 texit \u00e6re.\n10 Porro mare posuit in latere dextro contra orientem ad meridiem.\n11 Fecit autem Hiram lebetes, et creagras, et phialas: et complevit omne opus regis in domo Dei:\n12 hoc est, columnas duas, et epistylia, et capita, et quasi qu\u00e6dam retiacula, qu\u00e6 capita tegerent super epistylia.\n13 Malogranata quoque quadringenta, et retiacula duo ita ut bini ordines malogranatorum singulis retiaculis jungerentur, qu\u00e6 protegerent epistylia, et capita columnarum.\n14 Bases etiam fecit, et conchas, quas superposuit basibus:\n15 mare unum, boves quoque duodecim sub mari,\n16 et lebetes, et creagras, et phialas. Omnia vasa fecit Salomoni Hiram pater ejus in domo Domini ex \u00e6re mundissimo.\n17 In regione Jordanis, fudit ea rex in argillosa terra inter Sochot et Saredatha.\n18 Erat autem multitudo vasorum innumerabilis, ita ut ignoraretur pondus \u00e6ris.\n19 Fecitque Salomon omnia vasa domus Dei, et altare aureum, et mensas, et super eas panes propositionis:\n20 candelabra quoque cum lucernis suis ut lucerent ante oraculum juxta ritum ex auro purissimo:\n21 et florentia qu\u00e6dam, et lucernas, et forcipes aureos: omnia de auro mundissimo facta sunt.\n22 Thymiateria quoque, et thuribula, et phialas, et mortariola ex auro purissimo. Et ostia c\u00e6lavit templi interioris, id est, in Sancta sanctorum: et ostia templi forinsecus aurea. Sicque completum est omne opus quod fecit Salomon in domo Domini.","title":"Vulgate: 2 Chronicles: 2 Chronicles Chapter 4","type":"page"}