{"collection":"Bible & Christianity","html_url":"https://unchartedknowledge.5gfusion.net/browse/bib/vul/ch2020.htm","path":"bib/vul/ch2020.htm","source_url":"https://sacred-texts.com/bib/vul/ch2020.htm","text":"1 Post h\u00e6c congregati sunt filii Moab et filii Ammon, et cum eis de Ammonitis, ad Josaphat, ut pugnarent contra eum.\n2 Veneruntque nuntii, et indicaverunt Josaphat, dicentes: Venit contra te multitudo magna de his locis qu\u00e6 trans mare sunt, et de Syria: et ecce consistunt in Asasonthamar, qu\u00e6 est Engaddi.\n3 Josaphat autem timore perterritus, totum se contulit ad rogandum Dominum, et pr\u00e6dicavit jejunium universo Juda.\n4 Congregatusque est Judas ad deprecandum Dominum: sed et omnes de urbibus suis venerunt ad obsecrandum eum.\n5 Cumque stetisset Josaphat in medio c\u0153tu Juda et Jerusalem, in domo Domini ante atrium novum,\n6 ait: Domine Deus patrum nostrorum, tu es Deus in c\u00e6lo, et dominaris cunctis regnis gentium: in manu tua est fortitudo et potentia, nec quisquam tibi potest resistere.\n7 Nonne tu, Deus noster, interfecisti omnes habitatores terr\u00e6 hujus coram populo tuo Isra\u00ebl, et dedisti eam semini Abraham amici tui in sempiternum?\n8 Habitaveruntque in ea, et exstruxerunt in illa sanctuarium nomini tuo, dicentes:\n9 Si irruerint super nos mala, gladius judicii, pestilentia, et fames, stabimus coram domo hac in conspectu tuo, in qua invocatum est nomen tuum: et clamabimus ad te in tribulationibus nostris, et exaudies, salvosque facies.\n10 Nunc igitur, ecce filii Ammon, et Moab, et mons Seir, per quos non concessisti Isra\u00ebl ut transirent quando egrediebantur de \u00c6gypto, sed declinaverunt ab eis, et non interfecerunt illos,\n11 e contrario agunt, et nituntur ejicere nos de possessione quam tradidisti nobis.\n12\u00a0Deus noster, ergo non judicabis eos? in nobis quidem non est tanta fortitudo, ut possimus huic multitudini resistere, qu\u00e6 irruit super nos. Sed cum ignoremus quid agere debeamus, hoc solum habemus residui, ut oculos nostros dirigamus ad te.\n \n13 Omnis vero Juda stabat coram Domino cum parvulis, et uxoribus, et liberis suis.\n14 Erat autem Jahaziel filius Zachari\u00e6 filii Banai\u00e6 filii Jehiel filii Mathani\u00e6, Levites de filiis Asaph, super quem factus est spiritus Domini, in medio turb\u00e6,\n15 et ait: Attendite, omnis Juda, et qui habitatis Jerusalem, et tu, rex Josaphat: h\u00e6c dicit Dominus vobis: Nolite timere, nec paveatis hanc multitudinem: non est enim vestra pugna, sed Dei.\n16 Cras descendetis contra eos: ascensuri enim sunt per clivum nomine Sis, et invenietis illos in summitate torrentis qui est contra solitudinem Jeruel.\n17 Non eritis vos qui dimicabitis, sed tantummodo confidenter state, et videbitis auxilium Domini super vos, o Juda et Jerusalem: nolite timere, nec paveatis: cras egrediemini contra eos, et Dominus erit vobiscum.\n18 Josaphat ergo, et Juda, et omnes habitatores Jerusalem ceciderunt proni in terram coram Domino, et adoraverunt eum.\n19\u00a0Porro Levit\u00e6 de filiis Caath et de filiis Core laudabant Dominum Deum Isra\u00ebl voce magna in excelsum.\n \n20 Cumque mane surrexissent, egressi sunt per desertum Thecue: profectisque eis, stans Josaphat in medio eorum, dixit: Audite me, viri Juda, et omnes habitatores Jerusalem: credite in Domino Deo vestro, et securi eritis: credite prophetis ejus, et cuncta evenient prospera.\n21 Deditque consilium populo, et statuit cantores Domini ut laudarent eum in turmis suis, et antecederent exercitum, ac voce consona dicerent: Confitemini Domino quoniam in \u00e6ternum misericordia ejus.\n22 Cumque c\u0153pissent laudes canere, vertit Dominus insidias eorum in semetipsos, filiorum scilicet Ammon, et Moab, et montis Seir, qui egressi fuerant ut pugnarent contra Judam: et percussi sunt.\n23 Namque filii Ammon et Moab consurrexerunt adversum habitatores montis Seir, ut interficerent et delerent eos: cumque hoc opere perpetrassent, etiam in semetipsos versi, mutuis concidere vulneribus.\n24 Porro Juda, cum venisset ad speculam qu\u00e6 respicit solitudinem, vidit procul omnem late regionem plenam cadaveribus, nec superesse quemquam qui necem potuisset evadere.\n25 Venit ergo Josaphat, et omnis populus cum eo, ad detrahenda spolia mortuorum: inveneruntque inter cadavera variam supellectilem, vestes quoque, et vasa pretiosissima, et diripuerunt ita ut omnia portare non possent, nec per tres dies spolia auferre pr\u00e6 pr\u00e6d\u00e6 magnitudine.\n26 Die autem quarto congregati sunt in Valle benedictionis: etenim quoniam ibi benedixerant Domino, vocaverunt locum illum Vallis benedictionis usque in pr\u00e6sentem diem.\n27 Reversusque est omnis vir Juda, et habitatores Jerusalem, et Josaphat ante eos, in Jerusalem cum l\u00e6titia magna, eo quod dedisset eis Dominus gaudium de inimicis suis.\n28 Ingressique sunt in Jerusalem cum psalteriis, et citharis, et tubis in domum Domini.\n29 Irruit autem pavor Domini super universa regna terrarum cum audissent quod pugnasset Dominus contra inimicos Isra\u00ebl.\n30\u00a0Quievitque regnum Josaphat, et pr\u00e6buit ei Deus pacem per circuitum.\n \n31 Regnavit igitur Josaphat super Judam, et erat triginta quinque annorum cum regnare c\u0153pisset: viginti autem et quinque annis regnavit in Jerusalem, et nomen matris ejus Azuba filia Selahi.\n32 Et ambulavit in via patris suis Asa, nec declinavit ab ea, faciens qu\u00e6 placita erant coram Domino.\n33 Verumtamen excelsa non abstulit, et adhuc populus non direxerat cor suum ad Dominum Deum patrum suorum.\n34 Reliqua autem gestorum Josaphat priorum et novissimorum scripta sunt in verbis Jehu filii Hanani, qu\u00e6 digessit in libros regum Isra\u00ebl.\n35 Post h\u00e6c iniit amicitias Josaphat rex Juda cum Ochozia rege Isra\u00ebl, cujus opera fuerunt impiissima.\n36 Et particeps fuit ut facerent naves qu\u00e6 irent in Tharsis: feceruntque classem in Asiongaber.\n37 Prophetavit autem Eliezer filius Dodau de Maresa ad Josaphat, dicens: Quia habuisti f\u0153dus cum Ochozia, percussit Dominus opera tua, contrit\u00e6que sunt naves, nec potuerunt ire in Tharsis.","title":"Vulgate: 2 Chronicles: 2 Chronicles Chapter 20","type":"page"}