{"collection":"Bible & Christianity","html_url":"https://unchartedknowledge.5gfusion.net/browse/bib/vul/ch2032.htm","path":"bib/vul/ch2032.htm","source_url":"https://sacred-texts.com/bib/vul/ch2032.htm","text":"1 Post qu\u00e6 et hujuscemodi veritatem, venit Sennacherib rex Assyriorum, et ingressus Judam, obsedit civitates munitas, volens eas capere.\n2 Quod cum vidisset Ezechias, venisse scilicet Sennacherib, et totum belli impetum verti contra Jerusalem,\n3 inito cum principibus consilio, virisque fortissimis, ut obturarent capita fontium qui erant extra urbem: et hoc omnium decernente sententia,\n4 congregavit plurimam multitudinem, et obturaverunt cunctos fontes, et rivum qui fluebat in medio terr\u00e6, dicentes: Ne veniant reges Assyriorum, et inveniant aquarum abundantiam.\n5 \u00c6dificavit quoque, agens industrie, omnem murum qui fuerat dissipatus, et exstruxit turres desuper, et forinsecus alterum murum: instauravitque Mello in civitate David, et fecit universi generis armaturam et clypeos:\n6 constituitque principes bellatorum in exercitu, et convocavit universos in platea port\u00e6 civitatis, ac locutus est ad cor eorum, dicens:\n7 Viriliter agite, et confortamini: nolite timere, nec paveatis regem Assyriorum, et universam multitudinem qu\u00e6 est cum eo: multo enim plures nobiscum sunt, quam cum illo.\n8\u00a0Cum illo enim est brachium carneum: nobiscum Dominus Deus noster, qui auxiliator est noster, pugnatque pro nobis. Confortatusque est populus hujuscemodi verbis Ezechi\u00e6 regis Juda.\n \n9 Qu\u00e6 postquam gesta sunt, misit Sennacherib rex Assyriorum servos suos in Jerusalem (ipse enim cum universo exercitu obsidebat Lachis) ad Ezechiam regem Juda, et ad omnem populum qui erat in urbe, dicens:\n10 H\u00e6c dicit Sennacherib rex Assyriorum: In quo habentes fiduciam sedetis obsessi in Jerusalem?\n11 num Ezechias decipit vos, ut tradat morti in fame et siti, affirmans quod Dominus Deus vester liberet vos de manu regis Assyriorum?\n12 Numquid non iste est Ezechias, qui destruxit excelsa illius, et altaria, et pr\u00e6cepit Juda et Jerusalem, dicens: Coram altari uno adorabitis, et in ipso comburetis incensum?\n13 an ignoratis qu\u00e6 ego fecerim, et patres mei, cunctis terrarum populis? numquid pr\u00e6valuerunt dii gentium, omniumque terrarum, liberare regionem suam de manu mea?\n14 Quis est de universis diis gentium, quas vastaverunt patres mei, qui potuerit eruere populum suum de manu mea, ut possit etiam Deus vester eruere vos de hac manu?\n15 non vos ergo decipiat Ezechias, nec vana persuasione deludat, neque credatis ei. Si enim nullus potuit deus cunctarum gentium atque regnorum liberare populum suum de manu mea, et de manu patrum meorum, consequenter nec Deus vester poterit eruere vos de manu mea.\n16 Sed et alia multa locuti sunt servi ejus contra Dominum Deum, et contra Ezechiam servum ejus.\n17 Epistolas quoque scripsit plenas blasphemi\u00e6 in Dominum Deum Isra\u00ebl, et locutus est adversus eum: Sicut dii gentium ceterarum non potuerunt liberare populum suum de manu mea, sic et Deus Ezechi\u00e6 eruere non poterit populum suum de manu ista.\n18 Insuper et clamore magno, lingua judaica, contra populum qui sedebat in muris Jerusalem, personabat, ut terreret eos, et caperet civitatem.\n19 Locutusque est contra Deum Jerusalem, sicut adversum deos populorum terr\u00e6, opera manuum hominum.\n20 Oraverunt igitur Ezechias rex, et Isaias filius Amos prophetes, adversum hanc blasphemiam, ac vociferati sunt usque in c\u00e6lum.\n21 Et misit Dominus angelum, qui percussit omnem virum robustum, et bellatorem, et principem exercitus regis Assyriorum: reversusque est cum ignominia in terram suam. Cumque ingressus esset domum dei sui, filii qui egressi fuerant de utero ejus interfecerunt eum gladio.\n22 Salvavitque Dominus Ezechiam et habitatores Jerusalem de manu Sennacherib regis Assyriorum, et de manu omnium, et pr\u00e6stitit eis quietem per circuitum.\n23\u00a0Multi etiam deferebant hostias et sacrificia Domino in Jerusalem, et munera Ezechi\u00e6 regi Juda: qui exaltatus est post h\u00e6c coram cunctis gentibus.\n \n24 In diebus illis \u00e6grotavit Ezechias usque ad mortem, et oravit Dominum: exaudivitque eum, et dedit ei signum.\n25 Sed non juxta beneficia qu\u00e6 acceperat, retribuit, quia elevatum est cor ejus: et facta est contra eum ira, et contra Judam et Jerusalem.\n26 Humiliatusque est postea, eo quod exaltatum fuisset cor ejus, tam ipse quam habitatores Jerusalem: et idcirco non venit super eos ira Domini in diebus Ezechi\u00e6.\n27 Fuit autem Ezechias dives, et inclytus valde, et thesauros sibi plurimos congregavit argenti, et auri, et lapidis pretiosi, aromatum, et armorum universi generis, et vasorum magni pretii.\n28 Apothecas quoque frumenti, vini, et olei, et pr\u00e6sepia omnium jumentorum, caulasque pecorum,\n29 et urbes \u00e6dificavit sibi: habebat quippe greges ovium et armentorum innumerabiles, eo quod dedisset ei Dominus substantiam multam nimis.\n30 Ipse est Ezechias, qui obturavit superiorem fontem aquarum Gihon, et avertit eas subter ad occidentem urbis David: in omnibus operibus suis fecit prospere qu\u00e6 voluit.\n31 Attamen in legatione principum Babylonis, qui missi fuerant ad eum ut interrogarent de portento quod acciderat super terram, dereliquit eum Deus ut tentaretur, et nota fierent omnia qu\u00e6 erant in corde ejus.\n32 Reliqua autem sermonum Ezechi\u00e6, et misericordiarum ejus, scripta sunt in visione Isai\u00e6 filii Amos prophet\u00e6, et in libro regum Juda et Isra\u00ebl.\n33 Dormivitque Ezechias cum patribus suis, et sepelierunt eum super sepulchra filiorum David: et celebravit ejus exequias universus Juda, et omnes habitatores Jerusalem: regnavitque Manasses filius ejus pro eo.","title":"Vulgate: 2 Chronicles: 2 Chronicles Chapter 32","type":"page"}