{"collection":"Bible & Christianity","html_url":"https://unchartedknowledge.5gfusion.net/browse/bib/vul/ch2033.htm","path":"bib/vul/ch2033.htm","source_url":"https://sacred-texts.com/bib/vul/ch2033.htm","text":"1 Duodecim annorum erat Manasses cum regnare c\u0153pisset, et quinquaginta quinque annis regnavit in Jerusalem.\n2 Fecit autem malum coram Domino, juxta abominationes gentium quas subvertit Dominus coram filiis Isra\u00ebl:\n3 et conversus instauravit excelsa qu\u00e6 demolitus fuerat Ezechias pater ejus: construxitque aras Baalim, et fecit lucos, et adoravit omnem militiam c\u00e6li, et coluit eam.\n4 \u00c6dificavit quoque altaria in domo Domini, de qua dixerat Dominus: In Jerusalem erit nomen meum in \u00e6ternum.\n5 \u00c6dificavit autem ea cuncto exercitui c\u00e6li in duobus atriis domus Domini.\n6 Transireque fecit filios suos per ignem in valle Benennom: observabat somnia, sectabatur auguria, maleficis artibus inserviebat, habebat secum magos et incantatores, multaque mala operatus est coram Domino ut irritaret eum.\n7 Sculptile quoque et conflatile signum posuit in domo Dei, de qua locutus est Deus ad David, et ad Salomonem filium ejus, dicens: In domo hac, et in Jerusalem quam elegi de cunctis tribubus Isra\u00ebl, ponam nomen meum in sempiternum.\n8 Et moveri non faciam pedem Isra\u00ebl de terra quam tradidi patribus eorum: ita dumtaxat si custodierint facere qu\u00e6 pr\u00e6cepi eis, cunctamque legem, et c\u00e6remonias atque judicia, per manum Moysi.\n9 Igitur Manasses seduxit Judam, et habitatores Jerusalem, ut facerent malum super omnes gentes quas subverterat Dominus a facie filiorum Isra\u00ebl.\n10 Locutusque est Dominus ad eum, et ad populum illius, et attendere noluerunt.\n11\u00a0Idcirco superinduxit eis principes exercitus regis Assyriorum: ceperuntque Manassen, et vinctum catenis atque compedibus duxerunt in Babylonem.\n \n12 Qui postquam coangustatus est, oravit Dominum Deum suum: et egit p\u0153nitentiam valde coram Deo patrum suorum.\n13 Deprecatusque est eum, et obsecravit intente: et exaudivit orationem ejus, reduxitque eum Jerusalem in regnum suum, et cognovit Manasses quod Dominus ipse esset Deus.\n14 Post h\u00e6c \u00e6dificavit murum extra civitatem David ad occidentem Gihon in convalle, ab introitu port\u00e6 piscium per circuitum usque ad Ophel, et exaltavit illum vehementer: constituitque principes exercitus in cunctis civitatibus Juda munitis:\n15 et abstulit deos alienos, et simulacrum de domo Domini: aras quoque, quas fecerat in monte domus Domini et in Jerusalem: et projecit omnia extra urbem.\n16 Porro instauravit altare Domini, et immolavit super illud victimas, et pacifica, et laudem: pr\u00e6cepitque Jud\u00e6 ut serviret Domino Deo Isra\u00ebl.\n17 Attamen adhuc populus immolabat in excelsis Domino Deo suo.\n18 Reliqua autem gestorum Manasse, et obsecratio ejus ad Deum suum, verba quoque videntium qui loquebantur ad eum in nomine Domini Dei Isra\u00ebl, continentur in sermonibus regum Isra\u00ebl.\n19 Oratio quoque ejus et exauditio, et cuncta peccata atque contemptus, loca etiam in quibus \u00e6dificavit excelsa, et fecit lucos et statuas antequam ageret p\u0153nitentiam, scripta sunt in sermonibus Hozai.\n20\u00a0Dormivit ergo Manasses cum patribus suis, et sepelierunt eum in domo sua: regnavitque pro eo filius ejus Amon.\n \n21 Viginti duorum annorum erat Amon cum regnare c\u0153pisset, et duobus annis regnavit in Jerusalem.\n22 Fecitque malum in conspectu Domini, sicut fecerat Manasses pater ejus: et cunctis idolis qu\u00e6 Manasses fuerat fabricatus, immolavit atque servivit.\n23 Et non est reveritus faciem Domini, sicut reveritus est Manasses pater ejus, et multo majora deliquit.\n24 Cumque conjurassent adversus eum servi sui, interfecerunt eum in domo sua.\n25 Porro reliqua populi multitudo, c\u00e6sis iis qui Amon percusserant, constituit regem Josiam filium ejus pro eo.","title":"Vulgate: 2 Chronicles: 2 Chronicles Chapter 33","type":"page"}