{"collection":"Bible & Christianity","html_url":"https://unchartedknowledge.5gfusion.net/browse/bib/vul/co1005.htm","path":"bib/vul/co1005.htm","source_url":"https://sacred-texts.com/bib/vul/co1005.htm","text":"1 Omnino auditur inter vos fornicatio, et talis fornicatio, qualis nec inter gentes, ita ut uxorem patris sui aliquis habeat.\n2 Et vos inflati estis: et non magis luctum habuistis ut tollatur de medio vestrum qui hoc opus fecit.\n3 Ego quidem absens corpore, pr\u00e6sens autem spiritu, jam judicavi ut pr\u00e6sens eum, qui sic operatus est,\n4 in nomine Domini nostri Jesu Christi, congregatis vobis et meo spiritu, cum virtute Domini nostri Jesu,\n5\u00a0tradere hujusmodi Satan\u00e6 in interitum carnis, ut spiritus salvus sit in die Domini nostri Jesu Christi.\n \n6 Non est bona gloriatio vestra. Nescitis quia modicum fermentum totam massam corrumpit?\n7 Expurgate vetus fermentum, ut sitis nova conspersio, sicut estis azymi. Etenim Pascha nostrum immolatus est Christus.\n8 Itaque epulemur: non in fermento veteri, neque in fermento maliti\u00e6 et nequiti\u00e6: sed in azymis sinceritatis et veritatis.\n9 Scripsi in epistola: Ne commisceamini fornicariis:\n10 non utique fornicariis hujus mundi, aut avaris, aut rapacibus, aut idolis servientibus: alioquin debueratis de hoc mundo exiisse.\n11 Nunc autem scripsi vobis non commisceri: si is qui frater nominatur, est fornicator, aut avarus, aut idolis serviens, aut maledicus, aut ebriosus, aut rapax, cum ejusmodi nec cibum sumere.\n12 Quid enim mihi de iis qui foris sunt, judicare? nonne de iis qui intus sunt, vos judicatis?\n13 nam eos qui foris sunt, Deus judicabit. Auferte malum ex vobis ipsis.","title":"Vulgate: 1 Corinthians: 1 Corinthians Chapter 5","type":"page"}