{"collection":"Bible & Christianity","html_url":"https://unchartedknowledge.5gfusion.net/browse/bib/vul/co1006.htm","path":"bib/vul/co1006.htm","source_url":"https://sacred-texts.com/bib/vul/co1006.htm","text":"1 Audet aliquis vestrum habens negotium adversus alterum, judicari apud iniquos, et non apud sanctos?\n2 an nescitis quoniam sancti de hoc mundo judicabunt? et si in vobis judicabitur mundus, indigni estis qui de minimis judicetis?\n3 Nescitis quoniam angelos judicabimus? quanto magis s\u00e6cularia?\n4 S\u00e6cularia igitur judicia si habueritis: contemptibiles, qui sunt in ecclesia, illos constituite ad judicandum.\n5 Ad verecundiam vestram dico. Sic non est inter vos sapiens quisquam, qui possit judicare inter fratrem suum?\n6 Sed frater cum fratre judicio contendit: et hoc apud infideles?\n7 Jam quidem omnino delictum est in vobis, quod judicia habetis inter vos. Quare non magis injuriam accipitis? quare non magis fraudem patimini?\n8\u00a0Sed vos injuriam facitis, et fraudatis: et hoc fratribus.\n \n9 An nescitis quia iniqui regnum Dei non possidebunt? Nolite errare: neque fornicarii, neque idolis servientes, neque adulteri,\n10 neque molles, neque masculorum concubitores, neque fures, neque avari, neque ebriosi, neque maledici, neque rapaces regnum Dei possidebunt.\n11 Et h\u00e6c quidam fuistis: sed abluti estis, sed sanctificati estis, sed justificati estis in nomine Domini nostri Jesu Christi, et in Spiritu Dei nostri.\n12 Omnia mihi licent, sed non omnia expediunt: omnia mihi licent, sed ego sub nullis redigar potestate.\n13 Esca ventri, et venter escis: Deus autem et hunc et has destruet: corpus autem non fornicationi, sed Domino: et Dominus corpori.\n14 Deus vero et Dominum suscitavit: et nos suscitabit per virtutem suam.\n15 Nescitis quoniam corpora vestra membra sunt Christi? Tollens ergo membra Christi, faciam membra meretricis? Absit.\n16 An nescitis quoniam qui adh\u00e6ret meretrici, unum corpus efficitur? Erunt enim (inquit) duo in carne una.\n17 Qui autem adh\u00e6ret Domino, unus spiritus est.\n18 Fugite fornicationem. Omne peccatum, quodcumque fecerit homo, extra corpus est: qui autem fornicatur, in corpus suum peccat.\n19 An nescitis quoniam membra vestra, templum sunt Spiritus Sancti, qui in vobis est, quem habetis a Deo, et non estis vestri?\n20 Empti enim estis pretio magno. Glorificate, et portate Deum in corpore vestro.","title":"Vulgate: 1 Corinthians: 1 Corinthians Chapter 6","type":"page"}