{"collection":"Bible & Christianity","html_url":"https://unchartedknowledge.5gfusion.net/browse/bib/vul/co2003.htm","path":"bib/vul/co2003.htm","source_url":"https://sacred-texts.com/bib/vul/co2003.htm","text":"1 Incipimus iterum nosmetipsos commendare? aut numquid egemus (sicut quidam) commendatitiis epistolis ad vos, aut ex vobis?\n2 Epistola nostra vos estis, scripta in cordibus nostris, qu\u00e6 scitur, et legitur ab omnibus hominibus:\n3\u00a0manifestati quod epistola estis Christi, ministrata a nobis, et scripta non atramento, sed Spiritu Dei vivi: non in tabulis lapideis, sed in tabulis cordis carnalibus.\n \n4 Fiduciam autem talem habemus per Christum ad Deum:\n5 non quod sufficientes simus cogitare aliquid a nobis, quasi ex nobis: sed sufficientia nostra ex Deo est:\n6 qui et idoneos nos fecit ministros novi testamenti: non littera, sed Spiritu: littera enim occidit, Spiritus autem vivificat.\n7 Quod si ministratio mortis litteris deformata in lapidibus fuit in gloria, ita ut non possent intendere filii Isra\u00ebl in faciem Moysi propter gloriam vultus ejus, qu\u00e6 evacuatur:\n8 quomodo non magis ministratio Spiritus erit in gloria?\n9 Nam si ministratio damnationis gloria est: multo magis abundat ministerium justiti\u00e6 in gloria.\n10 Nam nec glorificatum est, quod claruit in hac parte, propter excellentem gloriam.\n11\u00a0Si enim quod evacuatur, per gloriam est: multo magis quod manet, in gloria est.\n \n12 Habentes igitur talem spem, multa fiducia utimur:\n13 et non sicut Moyses ponebat velamen super faciem suam, ut non intenderent filii Isra\u00ebl in faciem ejus, quod evacuatur,\n14 sed obtusi sunt sensus eorum. Usque in hodiernum enim diem, idipsum velamen in lectione veteris testamenti manet non revelatum (quoniam in Christo evacuatur),\n15 sed usque in hodiernum diem, cum legitur Moyses, velamen positum est super cor eorum.\n16 Cum autem conversus fuerit ad Dominum, auferetur velamen.\n17 Dominus autem Spiritus est: ubi autem Spiritus Domini, ibi libertas.\n18 Nos vero omnes, revelata facie gloriam Domini speculantes, in eamdem imaginem transformamur a claritate in claritatem, tamquam a Domini Spiritu.","title":"Vulgate: 2 Corinthians: 2 Corinthians Chapter 3","type":"page"}