{"collection":"Bible & Christianity","html_url":"https://unchartedknowledge.5gfusion.net/browse/bib/vul/dan001.htm","path":"bib/vul/dan001.htm","source_url":"https://sacred-texts.com/bib/vul/dan001.htm","text":"1 Anno tertio regni Joakim regis Juda, venit Nabuchodonosor, rex Babylonis, in Jerusalem, et obsedit eam:\n2 et tradidit Dominus in manu ejus Joakim, regem Juda, et partem vasorum domus Dei: et asportavit ea in terram Sennaar in domum dei sui, et vasa intulit in domum thesauri dei sui.\n3 Et ait rex Asphenez pr\u00e6posito eunuchorum ut introduceret de filiis Isra\u00ebl, et de semine regio et tyrannorum,\n4 pueros in quibus nulla esset macula, decoros forma, et eruditos omni sapientia, cautos scientia, et doctos disciplina, et qui possent stare in palatio regis, ut doceret eos litteras et linguam Chald\u00e6orum.\n5 Et constituit eis rex annonam per singulos dies de cibis suis, et de vino unde bibebat ipse, ut enutriti tribus annis, postea starent in conspectu regis.\n6 Fuerunt ergo inter eos de filiis Juda, Daniel, Ananias, Misa\u00ebl, et Azarias.\n7 Et imposuit eis pr\u00e6positus eunuchorum nomina: Danieli, Baltassar; Anani\u00e6, Sidrach; Misa\u00ebli, Misach; et Azari\u00e6, Abdenago.\n8 Proposuit autem Daniel in corde suo ne pollueretur de mensa regis, neque de vino potus ejus: et rogavit eunuchorum pr\u00e6positum ne contaminaretur.\n9 Dedit autem Deus Danieli gratiam et misericordiam in conspectu principis eunuchorum.\n10 Et ait princeps eunuchorum ad Danielem: Timeo ego dominum meum regem, qui constituit vobis cibum et potum: qui si viderit vultus vestros macilentiores pr\u00e6 ceteris adolescentibus co\u00e6vis vestris, condemnabitis caput meum regi.\n11 Et dixit Daniel ad Malasar, quem constituerat princeps eunuchorum super Danielem, Ananiam, Misa\u00eblem, et Azariam:\n12 Tenta nos, obsecro, servos tuos, diebus decem, et dentur nobis legumina ad vescendum, et aqua ad bibendum:\n13 et contemplare vultus nostros, et vultus puerorum, qui vescuntur cibo regio: et sicut videris, facies cum servis tuis.\n14 Qui, audito sermone hujuscemodi, tentavit eos diebus decem.\n15 Post dies autem decem, apparuerunt vultus eorum meliores, et corpulentiores pr\u00e6 omnibus pueris, qui vescebantur cibo regio.\n16 Porro Malasar tollebat cibaria, et vinum potus eorum: dabatque eis legumina.\n17 Pueris autem his dedit Deus scientiam et disciplinam, in omni libro et sapientia: Danieli autem intelligentiam omnium visionum et somniorum.\n18 Completis itaque diebus, post quos dixerat rex ut introducerentur, introduxit eos pr\u00e6positus eunuchorum in conspectu Nabuchodonosor.\n19 Cumque eis locutus fuisset rex, non sunt inventi tales de universis, ut Daniel, Ananias, Misa\u00ebl, et Azarias: et steterunt in conspectu regis.\n20 Et omne verbum sapienti\u00e6 et intellectus, quod sciscitatus est ab eis rex, invenit in eis decuplum super cunctos ariolos et magos qui erant in universo regno ejus.\n21 Fuit autem Daniel usque ad annum primum Cyri regis.","title":"Vulgate: Daniel: Daniel Chapter 1","type":"page"}