{"collection":"Bible & Christianity","html_url":"https://unchartedknowledge.5gfusion.net/browse/bib/vul/dan003.htm","path":"bib/vul/dan003.htm","source_url":"https://sacred-texts.com/bib/vul/dan003.htm","text":"1 Nabuchodonosor rex fecit statuam auream, altitudine cubitorum sexaginta, latitudine cubitorum sex, et statuit eam in campo Dura, provinci\u00e6 Babylonis.\n2 Itaque Nabuchodonosor rex misit ad congregandos satrapas, magistratus, et judices, duces, et tyrannos, et pr\u00e6fectos, omnesque principes regionum, ut convenirent ad dedicationem statu\u00e6 quam erexerat Nabuchodonosor rex.\n3 Tunc congregati sunt satrap\u00e6, magistratus, et judices, duces, et tyranni, et optimates, qui erant in potestatibus constituti, et universi principes regionum, ut convenirent ad dedicationem statu\u00e6, quam erexerat Nabuchodonosor rex. Stabant autem in conspectu statu\u00e6, quam posuerat Nabuchodonosor rex:\n4 et pr\u00e6co clamabat valenter: Vobis dicitur populis, tribubus, et linguis:\n5 in hora qua audieritis sonitum tub\u00e6, et fistul\u00e6, et cithar\u00e6, sambuc\u00e6, et psalterii, et symphoni\u00e6, et universi generis musicorum, cadentes adorate statuam auream, quam constituit Nabuchodonosor rex.\n6 Si quis autem non prostratus adoraverit, eadem hora mittetur in fornacem ignis ardentis.\n7\u00a0Post h\u00e6c igitur, statim ut audierunt omnes populi sonitum tub\u00e6, fistul\u00e6, et cithar\u00e6, sambuc\u00e6, et psalterii, et symphoni\u00e6, et omnis generis musicorum, cadentes omnes populi, tribus, et lingu\u00e6 adoraverunt statuam auream, quam constituerat Nabuchodonosor rex.\n \n8 Statimque in ipso tempore accedentes viri Chald\u00e6i accusaverunt Jud\u00e6os:\n9 dixeruntque Nabuchodonosor regi: Rex, in \u00e6ternum vive!\n10 tu, rex, posuisti decretum, ut omnis homo, qui audierit sonitum tub\u00e6, fistul\u00e6, et cithar\u00e6, sambuc\u00e6, et psalterii, et symphoni\u00e6, et universi generis musicorum, prosternat se, et adoret statuam auream:\n11 si quis autem non procidens adoraverit, mittatur in fornacem ignis ardentis.\n12 Sunt ergo viri Jud\u00e6i, quos constituisti super opera regionis Babylonis, Sidrach, Misach, et Abdenago: viri isti contempserunt, rex, decretum tuum: deos tuos non colunt, et statuam auream, quam erexisti, non adorant.\n13 Tunc Nabuchodonosor, in furore et in ira, pr\u00e6cepit ut adducerentur Sidrach, Misach, et Abdenago: qui confestim adducti sunt in conspectu regis.\n14 Pronuntiansque Nabuchodonosor rex, ait eis: Verene Sidrach, Misach, et Abdenago, deos meos non colitis, et statuam auream, quam constitui, non adoratis?\n15 nunc ergo si estis parati, quacumque hora audieritis sonitum tub\u00e6, fistul\u00e6, cithar\u00e6, sambuc\u00e6, et psalterii, et symphoni\u00e6, omnisque generis musicorum, prosternite vos, et adorate statuam, quam feci: quod si non adoraveritis, eadem hora mittemini in fornacem ignis ardentis: et quis est Deus, qui eripiet vos de manu mea?\n16 Respondentes Sidrach, Misach, et Abdenago, dixerunt regi Nabuchodonosor: Non oportet nos de hac re respondere tibi.\n17 Ecce enim Deus noster, quem colimus, potest eripere nos de camino ignis ardentis, et de manibus tuis, o rex, liberare.\n18 Quod si noluerit, notum sit tibi, rex, quia deos tuos non colimus, et statuam auream, quam erexisti, non adoramus.\n19 Tunc Nabuchodonosor repletus est furore, et aspectus faciei illius immutatus est super Sidrach, Misach, et Abdenago: et pr\u00e6cepit ut succenderetur fornax septuplum quam succendi consueverat.\n20 Et viris fortissimis de exercitu suo jussit ut ligatis pedibus Sidrach, Misach, et Abdenago, mitterent eos in fornacem ignis ardentis.\n21 Et confestim viri illi vincti, cum braccis suis, et tiaris, et calceamentis, et vestibus, missi sunt in medium fornacis ignis ardentis:\n22 nam jussio regis urgebat. Fornax autem succensa erat nimis: porro viros illos, qui miserant Sidrach, Misach, et Abdenago, interfecit flamma ignis.\n23\u00a0Viri autem hi tres, id est, Sidrach, Misach, et Abdenago, ceciderunt in medio camino ignis ardentis, colligati.\n \n24 Et ambulabant in medio flamm\u00e6, laudantes Deum, et benedicentes Domino.\n25 Stans autem Azarias oravit sic, aperiensque os suum in medio ignis, ait:\n26\u00a0[Benedictus es, Domine Deus patrum nostrorum,\n et laudabile, et gloriosum nomen tuum in s\u00e6cula:\n27\u00a0quia justus es in omnibus, qu\u00e6 fecisti nobis,\n et universa opera tua vera, et vi\u00e6 tu\u00e6 rect\u00e6,\n et omnia judicia tua vera.\n28\u00a0Judicia enim vera fecisti\n juxta omnia, qu\u00e6 induxisti super nos,\n et super civitatem sanctam patrum nostrorum Jerusalem:\n quia in veritate et in judicio induxisti omnia h\u00e6c\n propter peccata nostra.\n29\u00a0Peccavimus enim, et inique egimus recedentes a te,\n et deliquimus in omnibus:\n30\u00a0et pr\u00e6cepta tua non audivimus,\n nec observavimus,\n nec fecimus sicut pr\u00e6ceperas nobis\n ut bene nobis esset.\n31\u00a0Omnia ergo, qu\u00e6 induxisti super nos,\n et universa qu\u00e6 fecisti nobis,\n in vero judicio fecisti;\n32\u00a0et tradidisti nos in manibus inimicorum nostrorum iniquorum,\n et pessimorum, pr\u00e6varicatorumque,\n et regi injusto, et pessimo ultra omnem terram.\n33\u00a0Et nunc non possumus aperire os:\n confusio, et opprobrium facti sumus servis tuis,\n et his qui colunt te.\n34\u00a0Ne, qu\u00e6sumus, tradas nos in perpetuum propter nomen tuum,\n et ne dissipes testamentum tuum:\n35\u00a0neque auferas misericordiam tuam a nobis,\n propter Abraham, dilectum tuum,\n et Isaac, servum tuum,\n et Isra\u00ebl, sanctum tuum,\n36\u00a0quibus locutus es pollicens quod multiplicares semen eorum\n sicut stellas c\u00e6li,\n et sicut arenam qu\u00e6 est in littore maris;\n37\u00a0quia, Domine, imminuti sumus plus quam omnes gentes,\n sumusque humiles in universa terra hodie\n propter peccata nostra.\n38\u00a0Et non est in tempore hoc princeps, et dux, et propheta,\n neque holocaustum, neque sacrificium,\n neque oblatio, neque incensum,\n neque locus primitiarum coram te,\n39\u00a0ut possimus invenire misericordiam tuam,\n sed in animo contrito, et spiritu humilitatis suscipiamur.\n40\u00a0Sicut in holocausto arietum, et taurorum,\n et sicut in millibus agnorum pinguium,\n sic fiat sacrificium nostrum in conspectu tuo hodie, ut placeat tibi,\n quoniam non est confusio confidentibus in te.\n41\u00a0Et nunc sequimur te in toto corde;\n et timemus te, et qu\u00e6rimus faciem tuam.\n42\u00a0Nec confundas nos,\n sed fac nobiscum juxta mansuetudinem tuam,\n et secundum multitudinem misericordi\u00e6 tu\u00e6.\n43\u00a0Et erue nos in mirabilibus tuis,\n et da gloriam nomini tuo, Domine;\n44\u00a0et confundantur omnes qui ostendunt servis tuis mala:\n confundantur in omni potentia tua,\n et robur eorum conteratur:\n45\u00a0et sciant quia tu es Dominus Deus solus,\n et gloriosus super orbem terrarum.]\n46 Et non cessabant qui miserant eos ministri regis succendere fornacem, naphtha, et stuppa, et pice, et malleolis,\n47 et effundebatur flamma super fornacem cubitis quadraginta novem:\n48 et erupit, et incendit quos reperit juxta fornacem de Chald\u00e6is.\n49 Angelus autem Domini descendit cum Azaria, et sociis ejus in fornacem: et excussit flammam ignis de fornace,\n50 et fecit medium fornacis quasi ventum roris flantem, et non tetigit eos omnino ignis, neque contristavit, nec quidquam molesti\u00e6 intulit.\n51 Tunc hi tres quasi ex uno ore laudabant, et glorificabant, et benedicebant Deum in fornace, dicentes:\n52\u00a0[Benedictus es, Domine Deus patrum nostrorum:\n et laudabilis, et gloriosus, et superexaltatus in s\u00e6cula.\n Et benedictum nomen glori\u00e6 tu\u00e6 sanctum:\n et laudabile, et superexaltatum in omnibus s\u00e6culis.\n53\u00a0Benedictus es in templo sancto glori\u00e6 tu\u00e6:\n et superlaudabilis, et supergloriosus in s\u00e6cula.\n54\u00a0Benedictus es in throno regni tui:\n et superlaudabilis, et superexaltatus in s\u00e6cula.\n55\u00a0Benedictus es, qui intueris abyssos, et sedes super cherubim:\n et laudabilis, et superexaltatus in s\u00e6cula.\n56\u00a0Benedictus es in firmamento c\u00e6li:\n et laudabilis et gloriosus in s\u00e6cula.\n57\u00a0Benedicite, omnia opera Domini, Domino:\n laudate et superexaltate eum in s\u00e6cula.\n58\u00a0Benedicite, angeli Domini, Domino:\n laudate et superexaltate eum in s\u00e6cula.\n59\u00a0Benedicite, c\u00e6li, Domino:\n laudate et superexaltate eum in s\u00e6cula.\n60\u00a0Benedicite, aqu\u00e6 omnes, qu\u00e6 super c\u00e6los sunt, Domino:\n laudate et superexaltate eum in s\u00e6cula.\n61\u00a0Benedicite, omnes virtutes Domini, Domino:\n laudate et superexaltate eum in s\u00e6cula.\n62\u00a0Benedicite, sol et luna, Domino:\n laudate et superexaltate eum in s\u00e6cula.\n63\u00a0Benedicite, stell\u00e6 c\u00e6li, Domino:\n laudate et superexaltate eum in s\u00e6cula.\n64\u00a0Benedicite, omnis imber et ros, Domino:\n laudate et superexaltate eum in s\u00e6cula.\n65\u00a0Benedicite, omnes spiritus Dei, Domino:\n laudate et superexaltate eum in s\u00e6cula.\n66\u00a0Benedicite, ignis et \u00e6stus, Domino:\n laudate et superexaltate eum in s\u00e6cula.\n67\u00a0Benedicite, frigus et \u00e6stus, Domino:\n laudate et superexaltate eum in s\u00e6cula.\n68\u00a0Benedicite, rores et pruina, Domino:\n laudate et superexaltate eum in s\u00e6cula.\n69\u00a0Benedicite, gelu et frigus, Domino:\n laudate et superexaltate eum in s\u00e6cula.\n70\u00a0Benedicite, glacies et nives, Domino:\n laudate et superexaltate eum in s\u00e6cula.\n71\u00a0Benedicite, noctes et dies, Domino\n laudate et superexaltate eum in s\u00e6cula.\n72\u00a0Benedicite, lux et tenebr\u00e6, Domino:\n laudate et superexaltate eum in s\u00e6cula.\n73\u00a0Benedicite, fulgura et nubes, Domino:\n laudate et superexaltate eum in s\u00e6cula.\n74\u00a0Benedicat terra Dominum:\n laudet et superexaltet eum in s\u00e6cula.\n75\u00a0Benedicite, montes et colles, Domino:\n laudate et superexaltate eum in s\u00e6cula.\n76\u00a0Benedicite, universa germinantia in terra, Domino:\n laudate et superexaltate eum in s\u00e6cula.\n77\u00a0Benedicite, fontes, Domino:\n laudate et superexaltate eum in s\u00e6cula.\n78\u00a0Benedicite, maria et flumina, Domino:\n laudate et superexaltate eum in s\u00e6cula.\n79\u00a0Benedicite, cete, et omnia qu\u00e6 moventur in aquis, Domino:\n laudate et superexaltate eum in s\u00e6cula.\n80\u00a0Benedicite, omnes volucres c\u00e6li, Domino:\n laudate et superexaltate eum in s\u00e6cula.\n81\u00a0Benedicite, omnes besti\u00e6 et pecora, Domino:\n laudate et superexaltate eum in s\u00e6cula.\n82\u00a0Benedicite, filii hominum, Domino:\n laudate et superexaltate eum in s\u00e6cula.\n83\u00a0Benedicat Isra\u00ebl Dominum:\n laudet et superexaltet eum in s\u00e6cula.\n84\u00a0Benedicite, sacerdotes Domini, Domino:\n laudate et superexaltate eum in s\u00e6cula.\n85\u00a0Benedicite, servi Domini, Domino:\n laudate et superexaltate eum in s\u00e6cula.\n86\u00a0Benedicite, spiritus et anim\u00e6 justorum, Domino:\n laudate et superexaltate eum in s\u00e6cula.\n87\u00a0Benedicite, sancti et humiles corde, Domino:\n laudate et superexaltate eum in s\u00e6cula.\n88\u00a0Benedicite, Anania, Azaria, Misa\u00ebl, Domino:\n laudate et superexaltate eum in s\u00e6cula:\n quia eruit nos de inferno,\n et salvos fecit de manu mortis:\n et liberavit nos de medio ardentis flamm\u00e6,\n et de medio ignis eruit nos.\n89\u00a0Confitemini Domino, quoniam bonus:\n quoniam in s\u00e6culum misericordia ejus.\n90\u00a0Benedicite, omnes religiosi, Domino Deo deorum:\n laudate et confitemini ei, quia in omnia s\u00e6cula misericordia ejus.]\n \n91 Tunc Nabuchodonosor rex obstupuit, et surrexit propere, et ait optimatibus suis: Nonne tres viros misimus in medium ignis compeditos? Qui respondentes regi, dixerunt: Vere, rex.\n92 Respondit, et ait: Ecce ego video quatuor viros solutos, et ambulantes in medio ignis, et nihil corruptionis in eis est, et species quarti similis filio Dei.\n93 Tunc accessit Nabuchodonosor ad ostium fornacis ignis ardentis, et ait: Sidrach, Misach, et Abdenago, servi Dei excelsi, egredimini, et venite. Statimque egressi sunt Sidrach, Misach, et Abdenago de medio ignis.\n94 Et congregati satrap\u00e6, et magistratus, et judices, et potentes regis contemplabantur viros illos, quoniam nihil potestatis habuisset ignis in corporibus eorum, et capillus capitis eorum non esset adustus, et sarabala eorum non fuissent immutata, et odor ignis non transisset per eos.\n95 Et erumpens Nabuchodonosor, ait: Benedictus Deus eorum, Sidrach videlicet, Misach, et Abdenago: qui misit angelum suum, et eruit servos suos, qui crediderunt in eum: et verbum regis immutaverunt, et tradiderunt corpora sua ne servirent, et ne adorarent omnem deum, excepto Deo suo.\n96 A me ergo positum est hoc decretum: ut omnis populus, tribus, et lingua, qu\u00e6cumque locuta fuerit blasphemiam contra Deum Sidrach, Misach, et Abdenago, dispereat, et domus ejus vastetur: neque enim est alius deus, qui possit ita salvare.\n97\u00a0Tunc rex promovit Sidrach, Misach, et Abdenago in provincia Babylonis.\n \n98 Nabuchodonosor rex, omnibus populis, gentibus, et linguis, qui habitant in universa terra, pax vobis multiplicetur.\n99 Signa, et mirabilia fecit apud me Deus excelsus. Placuit ergo mihi pr\u00e6dicare\n100 signa ejus, quia magna sunt: et mirabilia ejus, quia fortia: et regnum ejus regnum sempiternum, et potestas ejus in generationem et generationem.","title":"Vulgate: Daniel: Daniel Chapter 3","type":"page"}