{"collection":"Bible & Christianity","html_url":"https://unchartedknowledge.5gfusion.net/browse/bib/vul/dan004.htm","path":"bib/vul/dan004.htm","source_url":"https://sacred-texts.com/bib/vul/dan004.htm","text":"1 Ego Nabuchodonosor quietus eram in domo mea, et florens in palatio meo:\n2 somnium vidi, quod perterruit me: et cogitationes me\u00e6 in strato meo, et visiones capitis mei conturbaverunt me.\n3 Et per me propositum est decretum ut introducerentur in conspectu meo cuncti sapientes Babylonis, et ut solutionem somnii indicarent mihi.\n4 Tunc ingrediebantur arioli, magi, Chald\u00e6i, et aruspices, et somnium narravi in conspectu eorum: et solutionem ejus non indicaverunt mihi,\n5 donec collega ingressus est in conspectu meo Daniel, cui nomen Baltassar secundum nomen dei mei, qui habet spiritum deorum sanctorum in semetipso: et somnium coram ipso locutus sum.\n6 Baltassar, princeps ariolorum, quoniam ego scio quod spiritum sanctorum deorum habeas in te, et omne sacramentum non est impossibile tibi: visiones somniorum meorum, quas vidi, et solutionem earum narra.\n7 Visio capitis mei in cubili meo: videbam, et ecce arbor in medio terr\u00e6, et altitudo ejus nimia.\n8 Magna arbor, et fortis, et proceritas ejus contingens c\u00e6lum: aspectus illius erat usque ad terminos univers\u00e6 terr\u00e6.\n9 Folia ejus pulcherrima, et fructus ejus nimius: et esca universorum in ea. Subter eam habitabant animalia et besti\u00e6, et in ramis ejus conversabantur volucres c\u00e6li: et ex ea vescebatur omnis caro.\n10 Videbam in visione capitis mei super stratum meum, et ecce vigil, et sanctus, de c\u00e6lo descendit.\n11 Clamavit fortiter, et sic ait: Succidite arborem, et pr\u00e6cidite ramos ejus: excutite folia ejus, et dispergite fructus ejus: fugiant besti\u00e6, qu\u00e6 subter eam sunt, et volucres de ramis ejus.\n12 Verumtamen germen radicum ejus in terra sinite, et alligetur vinculo ferreo et \u00e6reo in herbis qu\u00e6 foris sunt, et rore c\u00e6li tingatur, et cum feris pars ejus in herba terr\u00e6.\n13 Cor ejus ab humano commutetur, et cor fer\u00e6 detur ei: et septem tempora mutentur super eum.\n14 In sententia vigilum decretum est, et sermo sanctorum, et petitio: donec cognoscant viventes quoniam dominatur Excelsus in regno hominum, et cuicumque voluerit, dabit illud, et humillimum hominem constituet super eum.\n15 Hoc somnium vidi ego Nabuchodonosor rex: tu ergo Baltassar interpretationem narra festinus, quia omnes sapientes regni mei non queunt solutionem edicere mihi: tu autem potes, quia spiritus deorum sanctorum in te est.\n16 Tunc Daniel, cujus nomen Baltassar, c\u0153pit intra semetipsum tacitus cogitare quasi una hora: et cogitationes ejus conturbabant eum. Respondens autem rex, ait: Baltassar, somnium et interpretatio ejus non conturbent te. Respondit Baltassar, et dixit: Domine mi, somnium his, qui te oderunt, et interpretatio ejus hostibus tuis sit.\n17 Arborem, quam vidisti sublimem atque robustam, cujus altitudo pertingit ad c\u00e6lum, et aspectus illius in omnem terram;\n18 et rami ejus pulcherrimi, et fructus ejus nimius, et esca omnium in ea, subter eam habitantes besti\u00e6 agri, et in ramis ejus commorantes aves c\u00e6li:\n19 tu es rex, qui magnificatus es, et invaluisti: et magnitudo tua crevit, et pervenit usque ad c\u00e6lum, et potestas tua in terminos univers\u00e6 terr\u00e6.\n20 Quod autem vidit rex vigilem, et sanctum descendere de c\u00e6lo, et dicere: Succidite arborem, et dissipate illam, attamen germen radicum ejus in terra dimittite, et vinciatur ferro et \u00e6re in herbis foris, et rore c\u00e6li conspergatur, et cum feris sit pabulum ejus, donec septem tempora mutentur super eum:\n21 h\u00e6c est interpretatio sententi\u00e6 Altissimi, qu\u00e6 pervenit super dominum meum regem,\n22 Ejicient te ab hominibus, et cum bestiis ferisque erit habitatio tua, et f\u0153num ut bos comedes, et rore c\u00e6li infunderis: septem quoque tempora mutabuntur super te, donec scias quod dominetur Excelsus super regnum hominum, et cuicumque voluerit, det illud.\n23 Quod autem pr\u00e6cepit ut relinqueretur germen radicum ejus, id est arboris: regnum tuum tibi manebit postquam cognoveris potestatem esse c\u00e6lestem.\n24\u00a0Quam ob rem, rex, consilium meum placeat tibi, et peccata tua eleemosynis redime, et iniquitates tuas misericordiis pauperum: forsitan ignoscet delictis tuis.\n \n25 Omnia h\u00e6c venerunt super Nabuchodonosor regem.\n26 Post finem mensium duodecim, in aula Babylonis deambulabat.\n27 Responditque rex, et ait: Nonne h\u00e6c est Babylon magna, quam ego \u00e6dificavi in domum regni, in robore fortitudinis me\u00e6, et in gloria decoris mei?\n28 Cumque sermo adhuc esset in ore regis, vox de c\u00e6lo ruit: Tibi dicitur, Nabuchodonosor rex: Regnum tuum transibit a te,\n29 et ab hominibus ejicient te, et cum bestiis et feris erit habitatio tua: f\u0153num quasi bos comedes, et septem tempora mutabuntur super te, donec scias quod dominetur Excelsus in regno hominum, et cuicumque voluerit, det illud.\n30\u00a0Eadem hora sermo completus est super Nabuchodonosor, et ex hominibus abjectus est, et f\u0153num ut bos comedit, et rore c\u00e6li corpus ejus infectum est, donec capilli ejus in similitudinem aquilarum crescerent, et ungues ejus quasi avium.\n \n31 Igitur post finem dierum, ego Nabuchodonosor oculos meos ad c\u00e6lum levavi, et sensus meus redditus est mihi: et Altissimo benedixi, et viventem in sempiternum laudavi et glorificavi: quia potestas ejus potestas sempiterna, et regnum ejus in generationem et generationem.\n32 Et omnes habitatores terr\u00e6 apud eum in nihilum reputati sunt: juxta voluntatem enim suam facit tam in virtutibus c\u00e6li quam in habitatoribus terr\u00e6: et non est qui resistat manui ejus, et dicat ei: Quare fecisti?\n33 In ipso tempore sensus meus reversus est ad me, et ad honorem regni mei, decoremque perveni: et figura mea reversa est ad me, et optimates mei et magistratus mei requisierunt me, et in regno meo restitutus sum: et magnificentia amplior addita est mihi.\n34 Nunc igitur, ego Nabuchodonosor laudo, et magnifico, et glorifico regem c\u00e6li: quia omnia opera ejus vera, et vi\u00e6 ejus judicia, et gradientes in superbia potest humiliare.","title":"Vulgate: Daniel: Daniel Chapter 4","type":"page"}