{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu007.htm","path":"bib/vul/deu007.htm","source_url":"https://sacred-texts.com/bib/vul/deu007.htm","text":"1 Cum introduxerit te Dominus Deus tuus in terram, quam possessurus ingredieris, et deleverit gentes multas coram te, Heth\u00e6um, et Gergez\u00e6um, et Amorrh\u00e6um, Chanan\u00e6um, et Pherez\u00e6um, et Hev\u00e6um, et Jebus\u00e6um, septem gentes multo majoris numeri quam tu es, et robustiores te:\n2 tradideritque eas Dominus Deus tuus tibi, percuties eas usque ad internecionem. Non inibis cum eis f\u0153dus, nec misereberis earum,\n3 neque sociabis cum eis conjugia. Filiam tuam non dabis filio ejus, nec filiam illius accipies filio tuo:\n4 quia seducet filium tuum, ne sequatur me, et ut magis serviat diis alienis: irasceturque furor Domini, et delebit te cito.\n5 Quin potius h\u00e6c facietis eis: aras eorum subvertite, et confringite statuas, lucosque succidite, et sculptilia comburite:\n6\u00a0quia populus sanctus es Domino Deo tuo.\n Te elegit Dominus Deus tuus, ut sis ei populus peculiaris de cunctis populis, qui sunt super terram.\n7 Non quia cunctas gentes numero vincebatis, vobis junctus est Dominus, et elegit vos, cum omnibus sitis populis pauciores:\n8 sed quia dilexit vos Dominus, et custodivit juramentum, quod juravit patribus vestris: eduxitque vos in manu forti, et redemit de domo servitutis, de manu Pharaonis regis \u00c6gypti.\n9 Et scies, quia Dominus Deus tuus, ipse est Deus fortis et fidelis, custodiens pactum et misericordiam diligentibus se, et his qui custodiunt pr\u00e6cepta ejus in mille generationes:\n10 et reddens odientibus se statim, ita ut disperdat eos, et ultra non differat, protinus eis restituens quod merentur.\n11\u00a0Custodi ergo pr\u00e6cepta et c\u00e6remonias atque judicia, qu\u00e6 ego mando tibi hodie ut facias.\n \n12 Si postquam audieris h\u00e6c judicia, custodieris ea, et feceris, custodiet et Dominus Deus tuus pactum tibi, et misericordiam quam juravit patribus tuis:\n13 et diliget te, ac multiplicabit, benedicetque fructui ventris tui, et fructui terr\u00e6 tu\u00e6, frumento tuo, atque vindemi\u00e6, oleo, et armentis, gregibus ovium tuarum super terram, pro qua juravit patribus tuis ut daret eam tibi.\n14 Benedictus eris inter omnes populos. Non erit apud te sterilis utriusque sexus, tam in hominibus quam in gregibus tuis.\n15 Auferet Dominus a te omnem languorem: et infirmitates \u00c6gypti pessimas, quas novisti, non inferet tibi, sed cunctis hostibus tuis.\n16\u00a0Devorabis omnes populos, quos Dominus Deus tuus daturus est tibi. Non parcet eis oculus tuus, nec servies diis eorum, ne sint in ruinam tui.\n \n17 Si dixeris in corde tuo: Plures sunt gentes ist\u00e6 quam ego: quomodo potero delere eas?\n18 noli metuere, sed recordare qu\u00e6 fecerit Dominus Deus tuus Pharaoni, et cunctis \u00c6gyptiis,\n19 plagas maximas, quas viderunt oculi tui, et signa atque portenta, manumque robustam, et extentum brachium, ut educeret te Dominus Deus tuus: sic faciet cunctis populis, quos metuis.\n20 Insuper et crabrones mittet Dominus Deus tuus in eos, donec deleat omnes atque disperdat qui te fugerint, et latere potuerint.\n21 Non timebis eos, quia Dominus Deus tuus in medio tui est, Deus magnus et terribilis:\n22 ipse consumet nationes has in conspectu tuo paulatim atque per partes. Non poteris eas delere pariter: ne forte multiplicentur contra te besti\u00e6 terr\u00e6.\n23 Dabitque eos Dominus Deus tuus in conspectu tuo: et interficiet illos, donec penitus deleantur.\n24 Tradetque reges eorum in manus tuas, et disperdes nomina eorum sub c\u00e6lo: nullus poterit resistere tibi, donec conteras eos.\n25 Sculptilia eorum igne combures: non concupisces argentum et aurum, de quibus facta sunt, neque assumes ex eis tibi quidquam, ne offendas, propterea quia abominatio est Domini tui:\n26 nec inferes quippiam ex idolo in domum tuam, ne fias anathema, sicut et illud est. Quasi spurcitiam detestaberis, et velut inquinamentum ac sordes abominationi habebis, quia anathema est.","title":"Vulgate: Deuteronomy: Deuteronomy Chapter 7","type":"page"}