{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu011.htm","path":"bib/vul/deu011.htm","source_url":"https://sacred-texts.com/bib/vul/deu011.htm","text":"1 Ama itaque Dominum Deum tuum, et observa pr\u00e6cepta ejus et c\u00e6remonias, judicia atque mandata, omni tempore.\n2 Cognoscite hodie qu\u00e6 ignorant filii vestri, qui non viderunt disciplinam Domini Dei vestri, magnalia ejus et robustam manum, extentumque brachium,\n3 signa et opera qu\u00e6 fecit in medio \u00c6gypti Pharaoni regi, et univers\u00e6 terr\u00e6 ejus,\n4 omnique exercitui \u00c6gyptiorum, et equis ac curribus: quomodo operuerint eos aqu\u00e6 maris Rubri, cum vos persequerentur, et deleverit eos Dominus usque in pr\u00e6sentem diem:\n5 vobisque qu\u00e6 fecerit in solitudine donec veniretis ad hunc locum:\n6\u00a0et Dathan atque Abiron filiis Eliab, qui fuit filius Ruben: quos aperto ore suo terra absorbuit, cum domibus et tabernaculis, et universa substantia eorum, quam habebant in medio Isra\u00ebl.\n \n7 Oculi vestri viderunt opera Domini magna qu\u00e6 fecit,\n8 ut custodiatis universa mandata illius, qu\u00e6 ego hodie pr\u00e6cipio vobis, et possitis introire, et possidere terram, ad quam ingredimini,\n9 multoque in ea vivatis tempore: quam sub juramento pollicitus est Dominus patribus vestris, et semini eorum, lacte et melle manantem.\n10 Terra enim, ad quam ingrederis possidendam, non est sicut terra \u00c6gypti, de qua existi, ubi jacto semine in hortorum morem aqu\u00e6 ducuntur irrigu\u00e6:\n11 sed montuosa est et campestris, de c\u00e6lo expectans pluvias,\n12 quam Dominus Deus tuus semper invisit, et oculi illius in ea sunt a principio anni usque ad finem ejus.\n13 Si ergo obedieritis mandatis meis, qu\u00e6 ego hodie pr\u00e6cipio vobis, ut diligatis Dominum Deum vestrum, et serviatis ei in toto corde vestro, et in tota anima vestra:\n14 dabit pluviam terr\u00e6 vestr\u00e6 temporaneam et serotinam, ut colligatis frumentum, et vinum, et oleum,\n15 f\u0153numque ex agris ad pascenda jumenta, et ut ipsi comedatis ac saturemini.\n16 Cavete ne forte decipiatur cor vestrum, et recedatis a Domino, serviatisque diis alienis, et adoretis eos:\n17 iratusque Dominus claudat c\u00e6lum, et pluvi\u00e6 non descendant, nec terra det germen suum, pereatisque velociter de terra optima, quam Dominus daturus est vobis.\n18 Ponite h\u00e6c verba mea in cordibus et in animis vestris, et suspendite ea pro signo in manibus, et inter oculos vestros collocate.\n19 Docete filios vestros ut illa meditentur: quando sederis in domo tua, et ambulaveris in via, et accubueris atque surrexeris.\n20 Scribes ea super postes et januas domus tu\u00e6,\n21\u00a0ut multiplicentur dies tui, et filiorum tuorum in terra, quam juravit Dominus patribus tuis, ut daret eis quamdiu c\u00e6lum imminet terr\u00e6.\n \n22 Si enim custodieritis mandata qu\u00e6 ego pr\u00e6cipio vobis, et feceritis ea, ut diligatis Dominum Deum vestrum, et ambuletis in omnibus viis ejus, adh\u00e6rentes ei,\n23 disperdet Dominus omnes gentes istas ante faciem vestram, et possidebitis eas, qu\u00e6 majores et fortiores vobis sunt.\n24 Omnis locus, quem calcaverit pes vester, vester erit. A deserto, et a Libano, a flumine magno Euphrate usque ad mare occidentale erunt termini vestri.\n25 Nullus stabit contra vos: terrorem vestrum et formidinem dabit Dominus Deus vester super omnem terram quam calcaturi estis, sicut locutus est vobis.\n26 En propono in conspectu vestro hodie benedictionem et maledictionem:\n27 benedictionem, si obedieritis mandatis Domini Dei vestri, qu\u00e6 ego hodie pr\u00e6cipio vobis:\n28 maledictionem, si non obedieritis mandatis Domini Dei vestri, sed recesseritis de via, quam ego nunc ostendo vobis, et ambulaveritis post deos alienos, quos ignoratis.\n29 Cum vero introduxerit te Dominus Deus tuus in terram, ad quam pergis habitandam, pones benedictionem super montem Garizim, maledictionem super montem Hebal:\n30 qui sunt trans Jordanem, post viam qu\u00e6 vergit ad solis occubitum in terra Chanan\u00e6i, qui habitat in campestribus contra Galgalam, qu\u00e6 est juxta vallem tendentem et intrantem procul.\n31 Vos enim transibitis Jordanem, ut possideatis terram quam Dominus Deus vester daturus est vobis, ut habeatis et possideatis illam.\n32 Videte ergo ut impleatis c\u00e6remonias atque judicia, qu\u00e6 ego hodie ponam in conspectu vestro.","title":"Vulgate: Deuteronomy: Deuteronomy Chapter 11","type":"page"}