{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu015.htm","path":"bib/vul/deu015.htm","source_url":"https://sacred-texts.com/bib/vul/deu015.htm","text":"1 Septimo anno facies remissionem,\n2 qu\u00e6 hoc ordine celebrabitur. Cui debetur aliquid ab amico vel proximo ac fratre suo, repetere non poterit, quia annus remissionis est Domini.\n3 A peregrino et advena exiges: civem et propinquum repetendi non habebis potestatem.\n4 Et omnino indigens et mendicus non erit inter vos: ut benedicat tibi Dominus Deus tuus in terra, quam traditurus est tibi in possessionem.\n5 Si tamen audieris vocem Domini Dei tui, et custodieris universa qu\u00e6 jussit, et qu\u00e6 ego hodie pr\u00e6cipio tibi, benedicet tibi, ut pollicitus est.\n6\u00a0F\u0153nerabis gentibus multis, et ipse a nullo accipies mutuum. Dominaberis nationibus plurimis, et tui nemo dominabitur.\n \n7 Si unus de fratribus tuis, qui morantur intra portas civitatis tu\u00e6 in terra quam Dominus Deus tuus daturus est tibi, ad paupertatem venerit, non obdurabis cor tuum, nec contrahes manum,\n8 sed aperies eam pauperi, et dabis mutuum, quo eum indigere perspexeris.\n9 Cave ne forte subrepat tibi impia cogitatio, et dicas in corde tuo: Appropinquat septimus annus remissionis: et avertas oculos tuos a paupere fratre tuo, nolens ei quod postulat mutuum commodare: ne clamet contra te ad Dominum, et fiat tibi in peccatum.\n10 Sed dabis ei: nec ages quippiam callide in ejus necessitatibus sublevandis, ut benedicat tibi Dominus Deus tuus in omni tempore, et in cunctis ad qu\u00e6 manum miseris.\n11\u00a0Non deerunt pauperes in terra habitationis tu\u00e6: idcirco ego pr\u00e6cipio tibi, ut aperias manum fratri tuo egeno et pauperi, qui tecum versatur in terra.\n \n12 Cum tibi venditus fuerit frater tuus Hebr\u00e6us aut Hebr\u00e6a, et sex annis servierit tibi, in septimo anno dimittes eum liberum:\n13 et quem libertate donaveris, nequaquam vacuum abire patieris:\n14 sed dabis viaticum de gregibus, et de area, et torculari tuo, quibus Dominus Deus tuus benedixerit tibi.\n15 Memento quod et ipse servieris in terra \u00c6gypti, et liberaverit te Dominus Deus tuus, et idcirco ego nunc pr\u00e6cipio tibi.\n16 Sin autem dixerit: Nolo egredi: eo quod diligat te, et domum tuam, et bene sibi apud te esse sentiat:\n17 assumes subulam, et perforabis aurem ejus in janua domus tu\u00e6, et serviet tibi usque in \u00e6ternum. Ancill\u00e6 quoque similiter facies.\n18\u00a0Non avertas ab eis oculos tuos, quando dimiseris eos liberos, quoniam juxta mercedem mercenarii per sex annos servivit tibi: ut benedicat tibi Dominus Deus tuus in cunctis operibus qu\u00e6 agis.\n \n19 De primogenitis, qu\u00e6 nascuntur in armentis, et in ovibus tuis, quidquid est sexus masculini, sanctificabis Domino Deo tuo. Non operaberis in primogenito bovis, et non tondebis primogenita ovium.\n20 In conspectu Domini Dei tui comedes ea per annos singulos in loco quem elegerit Dominus, tu et domus tua.\n21 Sin autem habuerit maculam, vel claudum fuerit, vel c\u00e6cum, aut in aliqua parte deforme vel debile, non immolabitur Domino Deo tuo:\n22 sed intra portas urbis tu\u00e6 comedes illud: tam mundus quam immundus similiter vescentur eis, quasi caprea et cervo.\n23 Hoc solum observabis, ut sanguinem eorum non comedas, sed effundes in terram quasi aquam.","title":"Vulgate: Deuteronomy: Deuteronomy Chapter 15","type":"page"}