{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu016.htm","path":"bib/vul/deu016.htm","source_url":"https://sacred-texts.com/bib/vul/deu016.htm","text":"1 Observa mensem novarum frugum, et verni primum temporis, ut facias Phase Domino Deo tuo: quoniam in isto mense eduxit te Dominus Deus tuus de \u00c6gypto nocte.\n2 Immolabisque Phase Domino Deo tuo de ovibus, et de bobus, in loco quem elegerit Dominus Deus tuus, ut habitet nomen ejus ibi.\n3 Non comedes in eo panem fermentatum: septem diebus comedes absque fermento afflictionis panem, quoniam in pavore egressus es de \u00c6gypto: ut memineris diei egressionis tu\u00e6 de \u00c6gypto, omnibus diebus vit\u00e6 tu\u00e6.\n4 Non apparebit fermentum in omnibus terminis tuis septem diebus, et non remanebit de carnibus ejus, quod immolatum est vespere in die primo, usque mane.\n5 Non poteris immolare Phase in qualibet urbium tuarum, quas Dominus Deus tuus daturus est tibi,\n6 sed in loco quem elegerit Dominus Deus tuus, ut habitet nomen ejus ibi: immolabis Phase vespere ad solis occasum, quando egressus es de \u00c6gypto.\n7 Et coques, et comedes in loco quem elegerit Dominus Deus tuus, maneque consurgens vades in tabernacula tua.\n8\u00a0Sex diebus comedes azyma: et in die septima, quia collecta est Domini Dei tui, non facies opus.\n \n9 Septem hebdomadas numerabis tibi ab ea die qua falcem in segetem miseris.\n10 Et celebraris diem festum hebdomadarum Domino Deo tuo, oblationem spontaneam manus tu\u00e6, quam offeres juxta benedictionem Domini Dei tui:\n11 et epulaberis coram Domino Deo tuo, tu, filius tuus et filia tua, servus tuus et ancilla tua, et Levites qui est intra portas tuas, advena ac pupillus et vidua, qui morantur vobiscum: in loco quem elegerit Dominus Deus tuus, ut habitet nomen ejus ibi.\n12\u00a0Et recordaberis quoniam servus fueris in \u00c6gypto: custodiesque ac facies qu\u00e6 pr\u00e6cepta sunt.\n \n13 Solemnitatem quoque tabernaculorum celebrabis per septem dies, quando collegeris de area et torculari fruges tuas:\n14 et epulaberis in festivitate tua, tu, filius tuus et filia, servus tuus et ancilla, Levites quoque et advena, pupillus et vidua qui intra portas tuas sunt.\n15 Septem diebus Domino Deo tuo festa celebrabis in loco quem elegerit Dominus: benedicetque tibi Dominus Deus tuus in cunctis frugibus tuis, et in omni opere manuum tuarum, erisque in l\u00e6titia.\n16 Tribus vicibus per annum apparebit omne masculinum tuum in conspectu Domini Dei tui in loco quem elegerit: in solemnitate azymorum, in solemnitate hebdomadarum, et in solemnitate tabernaculorum. Non apparebit ante Dominum vacuus:\n17\u00a0sed offeret unusquisque secundum quod habuerit juxta benedictionem Domini Dei sui, quam dederit ei.\n \n18 Judices et magistros constitues in omnibus portis tuis, quas Dominus Deus tuus dederit tibi, per singulas tribus tuas: ut judicent populum justo judicio,\n19 nec in alteram partem declinent. Non accipies personam, nec munera: quia munera exc\u00e6cant oculos sapientum, et mutant verba justorum.\n20\u00a0Juste quod justum est persequeris: ut vivas, et possideas terram, quam Dominus Deus tuus dederit tibi.\n \n21 Non plantabis lucum, et omnem arborem juxta altare Domini Dei tui.\n22 Nec facies tibi, neque constitues statuam: qu\u00e6 odit Dominus Deus tuus.","title":"Vulgate: Deuteronomy: Deuteronomy Chapter 16","type":"page"}