{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu019.htm","path":"bib/vul/deu019.htm","source_url":"https://sacred-texts.com/bib/vul/deu019.htm","text":"1 Cum disperdiderit Dominus Deus tuus gentes, quarum tibi traditurus est terram, et possederis eam, habitaverisque in urbibus ejus et in \u00e6dibus:\n2 tres civitates separabis tibi in medio terr\u00e6, quam Dominus Deus tuus dabit tibi in possessionem,\n3 sternens diligenter viam: et in tres \u00e6qualiter partes totam terr\u00e6 tu\u00e6 provinciam divides: ut habeat e vicino qui propter homicidium profugus est, quo possit evadere.\n4 H\u00e6c erit lex homicid\u00e6 fugientis, cujus vita servanda est: qui percusserit proximum suum nesciens, et qui heri et nudiustertius nullum contra eum odium habuisse comprobatur:\n5 sed abiisse cum eo simpliciter in silvam ad ligna c\u00e6denda, et in succisione lignorum securis fugerit manu, ferrumque lapsum de manubrio amicum ejus percusserit, et occiderit: hic ad unam supradictarum urbium confugiet, et vivet:\n6 ne forsitan proximus ejus, cujus effusus est sanguis, dolore stimulatus, persequatur, et apprehendat eum si longior via fuerit, et percutiat animam ejus, qui non est reus mortis: quia nullum contra eum, qui occisus est, odium prius habuisse monstratur.\n7 Idcirco pr\u00e6cipio tibi, ut tres civitates \u00e6qualis inter se spatii dividas.\n8 Cum autem dilataverit Dominus Deus tuus terminos tuos, sicut juravit patribus tuis, et dederit tibi cunctam terram, quam eis pollicitus est\n9 (si tamen custodieris mandata ejus, et feceris, qu\u00e6 hodie pr\u00e6cipio tibi, ut diligas Dominum Deum tuum, et ambules in viis ejus omni tempore), addes tibi tres alias civitates, et supradictarum trium urbium numerum duplicabis:\n10 ut non effundatur sanguis innoxius in medio terr\u00e6, quam Dominus Deus tuus dabit tibi possidendam, ne sis sanguinis reus.\n11 Si quis autem, odio habens proximum suum, insidiatus fuerit vit\u00e6 ejus, surgensque percusserit illum, et mortuus fuerit, fugeritque ad unam de supradictis urbibus,\n12 mittent seniores civitatis illius, et arripient eum de loco effugii, tradentque in manu proximi, cujus sanguis effusus est, et morietur.\n13 Non miseraberis ejus, et auferes innoxium sanguinem de Isra\u00ebl, ut bene sit tibi.\n14\u00a0Non assumes, et transferes terminos proximi tui, quos fixerunt priores in possessione tua, quam Dominus Deus tuus dabit tibi in terra quam acceperis possidendam.\n \n15 Non stabit testis unus contra aliquem, quidquid illud peccati, et facinoris fuerit: sed in ore duorum aut trium testium stabit omne verbum.\n16 Si steterit testis mendax contra hominem, accusans eum pr\u00e6varicationis,\n17 stabunt ambo, quorum causa est, ante Dominum in conspectu sacerdotum et judicum qui fuerint in diebus illis.\n18 Cumque diligentissime perscrutantes, invenerint falsum testem dixisse contra fratrem suum mendacium,\n19 reddent ei sicut fratri suo facere cogitavit, et auferes malum de medio tui:\n20 ut audientes ceteri timorem habeant, et nequaquam talia audeant facere.\n21 Non misereberis ejus, sed animam pro anima, oculum pro oculo, dentem pro dente, manum pro manu, pedem pro pede exiges.","title":"Vulgate: Deuteronomy: Deuteronomy Chapter 19","type":"page"}