{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu021.htm","path":"bib/vul/deu021.htm","source_url":"https://sacred-texts.com/bib/vul/deu021.htm","text":"1 Quando inventum fuerit in terra, quam Dominus Deus tuus daturus est tibi, hominis cadaver occisi, et ignorabitur c\u00e6dis reus,\n2 egredientur majores natu, et judices tui, et metientur a loco cadaveris singularum per circuitum spatia civitatum:\n3 et quam viciniorem ceteris esse perspexerint, seniores civitatis illius tollent vitulam de armento, qu\u00e6 non traxit jugum, nec terram scidit vomere,\n4 et ducent eam ad vallem asperam atque saxosam, qu\u00e6 numquam arata est, nec sementem recepit: et c\u00e6dent in ea cervices vitul\u00e6:\n5 accedentque sacerdotes filii Levi, quos elegerit Dominus Deus tuus ut ministrent ei, et benedicant in nomine ejus, et ad verbum eorum omne negotium, et quidquid mundum, vel immundum est, judicetur.\n6 Et venient majores natu civitatis illius ad interfectum, lavabuntque manus suas super vitulam, qu\u00e6 in valle percussa est,\n7 et dicent: Manus nostr\u00e6 non effuderunt sanguinem hunc, nec oculi viderunt:\n8 propitius esto populo tuo Isra\u00ebl, quem redemisti, Domine, et ne reputes sanguinem innocentem in medio populi tui Isra\u00ebl. Et auferetur ab eis reatus sanguinis:\n9\u00a0tu autem alienus eris ab innocentis cruore, qui fusus est, cum feceris quod pr\u00e6cepit Dominus.\n \n10 Si egressus fueris ad pugnam contra inimicos tuos, et tradiderit eos Dominus Deus tuus in manu tua, captivosque duxeris,\n11 et videris in numero captivorum mulierem pulchram, et adamaveris eam, voluerisque habere uxorem,\n12 introduces eam in domum tuam: qu\u00e6 radet c\u00e6sariem, et circumcidet ungues,\n13 et deponet vestem, in qua capta est: sedensque in domo tua, flebit patrem et matrem suam uno mense: et postea intrabis ad eam, dormiesque cum illa, et erit uxor tua.\n14\u00a0Si autem postea non sederit animo tuo, dimittes eam liberam, nec vendere poteris pecunia, nec opprimere per potentiam: quia humiliasti eam.\n \n15 Si habuerit homo uxores duas, unam dilectam, et alteram odiosam, genuerintque ex eo liberos, et fuerit filius odios\u00e6 primogenitus,\n16 volueritque substantiam inter filios suos dividere, non poterit filium dilect\u00e6 facere primogenitum, et pr\u00e6ferre filio odios\u00e6:\n17\u00a0sed filium odios\u00e6 agnoscet primogenitum, dabitque ei de his qu\u00e6 habuerit cuncta duplicia: iste est enim principium liberorum ejus, et huic debentur primogenita.\n \n18 Si genuerit homo filium contumacem et protervum, qui non audiat patris aut matris imperium, et co\u00ebrcitus obedire contempserit:\n19 apprehendent eum, et ducent ad seniores civitatis illius, et ad portam judicii,\n20 dicentque ad eos: Filius noster iste protervus et contumax est: monita nostra audire contemnit, comessationibus vacat, et luxuri\u00e6 atque conviviis:\n21\u00a0lapidibus eum obruet populus civitatis, et morietur, ut auferatis malum de medio vestri, et universus Isra\u00ebl audiens pertimescat.\n \n22 Quando peccaverit homo quod morte plectendum est, et adjudicatus morti appensus fuerit in patibulo:\n23 non permanebit cadaver ejus in ligno, sed in eadem die sepelietur: quia maledictus a Deo est qui pendet in ligno: et nequaquam contaminabis terram tuam, quam Dominus Deus tuus dederit tibi in possessionem.","title":"Vulgate: Deuteronomy: Deuteronomy Chapter 21","type":"page"}