{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu022.htm","path":"bib/vul/deu022.htm","source_url":"https://sacred-texts.com/bib/vul/deu022.htm","text":"1 Non videbis bovem fratris tui, aut ovem errantem, et pr\u00e6teribis: sed reduces fratri tuo,\n2 etiamsi non est propinquus frater tuus, nec nosti eum: duces in domum tuam, et erunt apud te quamdiu qu\u00e6rat ea frater tuus, et recipiat.\n3 Similiter facies de asino, et de vestimento, et de omni re fratris tui, qu\u00e6 perierit: si inveneris eam, ne negligas quasi alienam.\n4\u00a0Si videris asinum fratris tui aut bovem cecidisse in via, non despicies, sed sublevabis cum eo.\n \n5 Non induetur mulier veste virili, nec vir utetur veste feminea: abominabilis enim apud Deum est qui facit h\u00e6c.\n6 Si ambulans per viam, in arbore vel in terra nidum avis inveneris, et matrem pullis vel ovis desuper incubantem: non tenebis eam cum filiis,\n7 sed abire patieris, captos tenens filios: ut bene sit tibi, et longo vivas tempore.\n8 Cum \u00e6dificaveris domum novam, facies murum tecti per circuitum: ne effundatur sanguis in domo tua, et sis reus labente alio, et in pr\u00e6ceps ruente.\n9 Non seres vineam tuam altero semine: ne et sementis quam sevisti, et qu\u00e6 nascuntur ex vinea, pariter sanctificentur.\n10 Non arabis in bove simul et asino.\n11 Non indueris vestimento, quod ex lana linoque contextum est.\n12\u00a0Funiculos in fimbriis facies per quatuor angulos pallii tui, quo operieris.\n \n13 Si duxerit vir uxorem, et postea odio habuerit eam,\n14 qu\u00e6sieritque occasiones quibus dimittat eam, objiciens ei nomen pessimum, et dixerit: Uxorem hanc accepi, et ingressus ad eam non inveni virginem:\n15 tollent eam pater et mater ejus, et ferent secum signa virginitatis ejus ad seniores urbis qui in porta sunt:\n16 et dicet pater: Filiam meam dedi huic uxorem: quam quia odit,\n17 imponit ei nomen pessimum, ut dicat: Non inveni filiam tuam virginem: et ecce h\u00e6c sunt signa virginitatis fili\u00e6 me\u00e6. Expandent vestimentum coram senioribus civitatis:\n18 apprehendentque senes urbis illius virum, et verberabunt illum,\n19 condemnantes insuper centum siclis argenti, quos dabit patri puell\u00e6, quoniam diffamavit nomen pessimum super virginem Isra\u00ebl: habebitque eam uxorem, et non poterit dimittere eam omnibus diebus vit\u00e6 su\u00e6.\n20 Quod si verum est quod objicit, et non est in puella inventa virginitas,\n21 ejicient eam extra fores domus patris sui, et lapidibus obruent viri civitatis illius, et morietur: quoniam fecit nefas in Isra\u00ebl, ut fornicaretur in domo patris sui: et auferes malum de medio tui.\n22\u00a0Si dormierit vir cum uxore alterius, uterque morietur, id est, adulter et adultera: et auferes malum de Isra\u00ebl.\n \n23 Si puellam virginem desponderit vir, et invenerit eam aliquis in civitate, et concubuerit cum ea,\n24 educes utrumque ad portam civitatis illius, et lapidibus obruentur: puella, quia non clamavit, cum esset in civitate: vir, quia humiliavit uxorem proximi sui: et auferes malum de medio tui.\n25 Sin autem in agro repererit vir puellam, qu\u00e6 desponsata est, et apprehendens concubuerit cum ea, ipse morietur solus:\n26 puella nihil patietur, nec est rea mortis: quoniam sicut latro consurgit contra fratrem suum, et occidit animam ejus, ita et puella perpessa est.\n27 Sola erat in agro: clamavit, et nullus affuit qui liberaret eam.\n28 Si invenerit vir puellam virginem, qu\u00e6 non habet sponsum, et apprehendens concubuerit cum illa, et res ad judicium venerit:\n29 dabit qui dormivit cum ea, patri puell\u00e6 quinquaginta siclos argenti, et habebit eam uxorem, quia humiliavit illam: non poterit dimittere eam cunctis diebus vit\u00e6 su\u00e6.\n30 Non accipiet homo uxorem patris sui, nec revelabit operimentum ejus.","title":"Vulgate: Deuteronomy: Deuteronomy Chapter 22","type":"page"}