{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu023.htm","path":"bib/vul/deu023.htm","source_url":"https://sacred-texts.com/bib/vul/deu023.htm","text":"1 Non intravit eunuchus, attritis vel amputatis testiculis et abscisso veretro, ecclesiam Domini.\n2 Non ingredietur mamzer, hoc est, de scorto natus, in ecclesiam Domini, usque ad decimam generationem.\n3 Ammonites et Moabites etiam post decimam generationem non intrabunt ecclesiam Domini in \u00e6ternum:\n4 quia noluerunt vobis occurrere cum pane et aqua in via quando egressi estis de \u00c6gypto: et quia conduxerunt contra te Balaam filium Beor de Mesopotamia Syri\u00e6, ut malediceret tibi:\n5 et noluit Dominus Deus tuus audire Balaam, vertitque maledictionem ejus in benedictionem tuam, eo quod diligeret te.\n6 Non facies cum eis pacem, nec qu\u00e6ras eis bona cunctis diebus vit\u00e6 tu\u00e6 in sempiternum.\n7 Non abominaberis Idum\u00e6um, quia frater tuus est: nec \u00c6gyptium, quia advena fuisti in terra ejus.\n8\u00a0Qui nati fuerint ex eis, tertia generatione intrabunt in ecclesiam Domini.\n \n9 Quando egressus fueris adversus hostes tuos in pugnam, custodies te ab omni re mala.\n10 Si fuerit inter vos homo, qui nocturno pollutus sit somnio, egredietur extra castra,\n11 et non revertetur, priusquam ad vesperam lavetur aqua: et post solis occasum regredietur in castra.\n12 Habebis locum extra castra, ad quem egrediaris ad requisita natur\u00e6,\n13 gerens paxillum in balteo: cumque sederis, fodies per circuitum, et egesta humo operies\n14\u00a0quo revelatus es: Dominus enim Deus tuus ambulat in medio castrorum, ut eruat te, et tradat tibi inimicos tuos: et sint castra tua sancta, et nihil in eis appareat f\u0153ditatis, ne derelinquat te.\n \n15 Non trades servum domino suo, qui ad te confugerit.\n16 Habitabit tecum in loco, qui ei placuerit, et in una urbium tuarum requiescet: ne contristes eum.\n17 Non erit meretrix de filiabus Isra\u00ebl, nec scortator de filiis Isra\u00ebl.\n18 Non offeres mercedem prostibuli, nec pretium canis in domo Domini Dei tui, quidquid illud est quod voveris: quia abominatio est utrumque apud Dominum Deum tuum.\n19 Non f\u0153nerabis fratri tuo ad usuram pecuniam, nec fruges, nec quamlibet aliam rem:\n20 sed alieno. Fratri autem tuo absque usura id quo indiget, commodabis: ut benedicat tibi Dominus Deus tuus in omni opere tuo in terra, ad quam ingredieris possidendam.\n21 Cum votum voveris Domino Deo tuo, non tardabis reddere: quia requiret illud Dominus Deus tuus, et si moratus fueris, reputabitur tibi in peccatum.\n22 Si nolueris polliceri, absque peccato eris.\n23 Quod autem semel egressum est de labiis tuis, observabis, et facies sicut promisisti Domino Deo tuo, et propria voluntate et ore tuo locutus es.\n24 Ingressus vineam proximi tui, comede uvas, quantum tibi placuerit: foras autem ne efferas tecum.\n25 Si intraveris in segetem amici tui, franges spicas, et manu conteres: falce autem non metes.","title":"Vulgate: Deuteronomy: Deuteronomy Chapter 23","type":"page"}