{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu024.htm","path":"bib/vul/deu024.htm","source_url":"https://sacred-texts.com/bib/vul/deu024.htm","text":"1 Si acceperit homo uxorem, et habuerit eam, et non invenerit gratiam ante oculos ejus propter aliquam f\u0153ditatem: scribet libellum repudii, et dabit in manu illius, et dimittet eam de domo sua.\n2 Cumque egressa alterum maritum duxerit,\n3 et ille quoque oderit eam, dederitque ei libellum repudii, et dimiserit de domo sua, vel certe mortuus fuerit:\n4\u00a0non poterit prior maritus recipere eam in uxorem: quia polluta est, et abominabilis facta est coram Domino: ne peccare facias terram tuam, quam Dominus Deus tuus tradiderit tibi possidendam.\n \n5 Cum acceperit homo nuper uxorem, non procedet ad bellum, nec ei quippiam necessitatis injungetur public\u00e6, sed vacabit absque culpa domi su\u00e6, ut uno anno l\u00e6tetur cum uxore sua.\n6 Non accipies loco pignoris inferiorem, et superiorem molam: quia animam suam opposuit tibi.\n7 Si deprehensus fuerit homo sollicitans fratrem suum de filiis Isra\u00ebl, et vendito eo acceperit pretium, interficietur, et auferes malum de medio tui.\n8 Observa diligenter ne incurras plagam lepr\u00e6, sed facies qu\u00e6cumque docuerint te sacerdotes Levitici generis, juxta id quod pr\u00e6cepi eis, et imple sollicite.\n9 Mementote qu\u00e6 fecerit Dominus Deus vester Mari\u00e6 in via cum egrederemini de \u00c6gypto.\n10 Cum repetes a proximo tuo rem aliquam, quam debet tibi, non ingredieris domum ejus ut pignus auferas:\n11 sed stabis foris, et ille tibi proferet quod habuerit.\n12 Sin autem pauper est, non pernoctabit apud te pignus,\n13 sed statim reddes ei ante solis occasum: ut dormiens in vestimento suo, benedicat tibi, et habeas justitiam coram Domino Deo tuo.\n14 Non negabis mercedem indigentis, et pauperis fratris tui, sive adven\u00e6, qui tecum moratur in terra, et intra portas tuas est:\n15 sed eadem die reddes ei pretium laboris sui ante solis occasum, quia pauper est, et ex eo sustentat animam suam: ne clamet contra te ad Dominum, et reputetur tibi in peccatum.\n16\u00a0Non occidentur patres pro filiis, neque filii pro patribus, sed unusquisque pro peccato suo morietur.\n \n17 Non pervertes judicium adven\u00e6 et pupilli, nec auferes pignoris loco vidu\u00e6 vestimentum.\n18 Memento quod servieris in \u00c6gypto, et eruerit te Dominus Deus tuus inde. Idcirco pr\u00e6cipio tibi ut facias hanc rem.\n19 Quando messueris segetem in agro tuo, et oblitus manipulum reliqueris, non reverteris, ut tollas illum: sed advenam, et pupillum, et viduam auferre patieris, ut benedicat tibi Dominus Deus tuus in omni opere manuum tuarum.\n20 Si fruges collegeris olivarum, quidquid remanserit in arboribus, non reverteris ut colligas: sed relinques adven\u00e6, pupillo, ac vidu\u00e6.\n21 Si vindemiaveris vineam tuam, non colliges remanentes racemos: sed cedent in usus adven\u00e6, pupilli, ac vidu\u00e6.\n22 Memento quod et tu servieris in \u00c6gypto, et idcirco pr\u00e6cipio tibi ut facias hanc rem.","title":"Vulgate: Deuteronomy: Deuteronomy Chapter 24","type":"page"}