{"collection":"Bible & Christianity","html_url":"https://unchartedknowledge.5gfusion.net/browse/bib/vul/deu025.htm","path":"bib/vul/deu025.htm","source_url":"https://sacred-texts.com/bib/vul/deu025.htm","text":"1 Si fuerit causa inter aliquos, et interpellaverint judices: quem justum esse perspexerint, illi justiti\u00e6 palmam dabunt: quem impium, condemnabunt impietatis.\n2 Sin autem eum, qui peccavit, dignum viderint plagis: prosternent, et coram se facient verberari. Pro mensura peccati erit et plagarum modus:\n3 ita dumtaxat, ut quadragenarium numerum non excedant: ne f\u0153de laceratus ante oculos tuos abeat frater tuus.\n4\u00a0Non ligabis os bovis terentis in area fruges tuas.\n \n5 Quando habitaverint fratres simul, et unus ex eis absque liberis mortuus fuerit, uxor defuncti non nubet alteri: sed accipiet eam frater ejus, et suscitabit semen fratris sui:\n6 et primogenitum ex ea filium nomine illius appellabit, ut non deleatur nomen ejus ex Isra\u00ebl.\n7 Sin autem noluerit accipere uxorem fratris sui, qu\u00e6 ei lege debetur, perget mulier ad portam civitatis, et interpellabit majores natu, dicetque: Non vult frater viri mei suscitare nomen fratris sui in Isra\u00ebl, nec me in conjugem sumere.\n8 Statimque accersiri eum facient, et interrogabunt. Si responderit: Nolo eam uxorem accipere:\n9 accedet mulier ad eum coram senioribus, et tollet calceamentum de pede ejus, spuetque in faciem illius, et dicet: Sic fiet homini, qui non \u00e6dificat domum fratris sui.\n10\u00a0Et vocabitur nomen illius in Isra\u00ebl, Domus discalceati.\n \n11 Si habuerint inter se jurgium viri duo, et unus contra alterum rixari c\u0153perit, volensque uxor alterius eruere virum suum de manu fortioris, miseritque manum, et apprehenderit verenda ejus:\n12\u00a0abscides manum illius, nec flecteris super eam ulla misericordia.\n \n13 Non habebis in sacculo diversa pondera, majus et minus:\n14 nec erit in domo tua modius major, et minor.\n15 Pondus habebis justum et verum, et modius \u00e6qualis et verus erit tibi: ut multo vivas tempore super terram, quam Dominus Deus tuus dederit tibi.\n16\u00a0Abominatur enim Dominus tuus eum qui facit h\u00e6c, et aversatur omnem injustitiam.\n \n17 Memento qu\u00e6 fecerit tibi Amalec in via quando egrediebaris ex \u00c6gypto:\n18 quomodo occurrerit tibi, et extremos agminis tui, qui lassi residebant, ceciderit, quando tu eras fame et labore confectus: et non timuerit Deum.\n19 Cum ergo Dominus Deus tuus dederit tibi requiem, et subjecerit cunctas per circuitum nationes in terra, quam tibi pollicitus est: delebis nomen ejus sub c\u00e6lo. Cave ne obliviscaris.","title":"Vulgate: Deuteronomy: Deuteronomy Chapter 25","type":"page"}