{"collection":"Bible & Christianity","html_url":"https://unchartedknowledge.5gfusion.net/browse/bib/vul/ecc002.htm","path":"bib/vul/ecc002.htm","source_url":"https://sacred-texts.com/bib/vul/ecc002.htm","text":"1\u00a0[Dixi ego in corde meo: Vadam,\n et affluam deliciis, et fruar bonis;\n et vidi quod hoc quoque esset vanitas.\n2\u00a0Risum reputavi errorem,\n et gaudio dixi: Quid frustra deciperis?\n3\u00a0Cogitavi in corde meo abstrahere a vino carnem meam,\n ut animam meam transferrem ad sapientiam,\n devitaremque stultitiam,\n donec viderem quid esset utile filiis hominum,\n quo facto opus est sub sole numero dierum vit\u00e6 su\u00e6.\n4\u00a0Magnificavi opera mea,\n \u00e6dificavi mihi domos,\n et plantavi vineas;\n5\u00a0feci hortos et pomaria,\n et consevi ea cuncti generis arboribus;\n6\u00a0et exstruxi mihi piscinas aquarum,\n ut irrigarem silvam lignorum germinantium.\n7\u00a0Possedi servos et ancillas,\n multamque familiam habui:\n armenta quoque, et magnos ovium greges,\n ultra omnes qui fuerunt ante me in Jerusalem;\n8\u00a0coacervavi mihi argentum et aurum,\n et substantias regum ac provinciarum;\n feci mihi cantores et cantatrices,\n et delicias filiorum hominum,\n scyphos, et urceos in ministerio ad vina fundenda;\n9\u00a0et supergressus sum opibus\n omnes qui ante me fuerunt in Jerusalem:\n sapientia quoque perseveravit mecum.\n10\u00a0Et omnia qu\u00e6 desideraverunt oculi mei\n non negavi eis,\n nec prohibui cor meum quin omni voluptate frueretur,\n et oblectaret se in his qu\u00e6 pr\u00e6paraveram;\n et hanc ratus sum partem meam si uterer labore meo.\n11\u00a0Cumque me convertissem ad universa opera qu\u00e6 fecerant manus me\u00e6,\n et ad labores in quibus frustra sudaveram,\n vidi in omnibus vanitatem et afflictionem animi,\n et nihil permanere sub sole.]\n \n12\u00a0[Transivi ad contemplandam sapientiam,\n erroresque, et stultitiam.\n (Quid est, inquam, homo,\n ut sequi possit regem, factorem suum?)\n13\u00a0Et vidi quod tantum pr\u00e6cederet sapientia stultitiam,\n quantum differt lux a tenebris.\n14\u00a0Sapientis oculi in capite ejus;\n stultus in tenebris ambulat:\n et didici quod unus utriusque esset interitus.\n15\u00a0Et dixi in corde meo:\n Si unus et stulti et meus occasus erit,\n quid mihi prodest quod majorem sapienti\u00e6 dedi operam?\n Locutusque cum mente mea,\n animadverti quod hoc quoque esset vanitas.\n16\u00a0Non enim erit memoria sapientis similiter ut stulti in perpetuum,\n et futura tempora oblivione cuncta pariter operient:\n moritur doctus similiter ut indoctus.\n17\u00a0Et idcirco t\u00e6duit me vit\u00e6 me\u00e6,\n videntem mala universa esse sub sole,\n et cuncta vanitatem et afflictionem spiritus.]\n \n18\u00a0[Rursus detestatus sum omnem industriam meam,\n qua sub sole studiosissime laboravi,\n habiturus h\u00e6redem post me,\n19\u00a0quem ignoro utrum sapiens an stultus futurus sit,\n et dominabitur in laboribus meis,\n quibus desudavi et sollicitus fui:\n et est quidquam tam vanum?\n20\u00a0Unde cessavi,\n renuntiavitque cor meum ultra laborare sub sole.\n21\u00a0Nam cum alius laboret in sapientia,\n et doctrina, et sollicitudine,\n homini otioso qu\u00e6sita dimittit;\n et hoc ergo vanitas et magnum malum.\n22\u00a0Quid enim proderit homini de universo labore suo,\n et afflictione spiritus,\n qua sub sole cruciatus est?\n23\u00a0Cuncti dies ejus doloribus et \u00e6rumnis pleni sunt,\n nec per noctem mente requiescit.\n Et hoc nonne vanitas est?\n24\u00a0Nonne melius est comedere et bibere,\n et ostendere anim\u00e6 su\u00e6 bona de laboribus suis?\n et hoc de manu Dei est.\n25\u00a0Quis ita devorabit et deliciis affluet ut ego?\n26\u00a0Homini bono in conspectu suo\n dedit Deus sapientiam, et scientiam, et l\u00e6titiam;\n peccatori autem dedit afflictionem et curam superfluam,\n ut addat, et congreget,\n et tradat ei qui placuit Deo;\n sed et hoc vanitas est, et cassa sollicitudo mentis.]","title":"Vulgate: Ecclesiastes: Ecclesiastes Chapter 2","type":"page"}