{"collection":"Bible & Christianity","html_url":"https://unchartedknowledge.5gfusion.net/browse/bib/vul/ecc003.htm","path":"bib/vul/ecc003.htm","source_url":"https://sacred-texts.com/bib/vul/ecc003.htm","text":"1\u00a0[Omnia tempus habent,\n et suis spatiis transeunt universa sub c\u00e6lo.\n2\u00a0Tempus nascendi, et tempus moriendi;\n tempus plantandi, et tempus evellendi quod plantatum est.\n3\u00a0Tempus occidendi, et tempus sanandi;\n tempus destruendi, et tempus \u00e6dificandi.\n4\u00a0Tempus flendi, et tempus ridendi;\n tempus plangendi, et tempus saltandi.\n5\u00a0Tempus spargendi lapides, et tempus colligendi,\n tempus amplexandi, et tempus longe fieri ab amplexibus.\n6\u00a0Tempus acquirendi, et tempus perdendi;\n tempus custodiendi, et tempus abjiciendi.\n7\u00a0Tempus scindendi, et tempus consuendi;\n tempus tacendi, et tempus loquendi.\n8\u00a0Tempus dilectionis, et tempus odii;\n tempus belli, et tempus pacis.]\n \n9\u00a0[Quid habet amplius homo de labore suo?\n10\u00a0Vidi afflictionem quam dedit Deus filiis hominum,\n ut distendantur in ea.\n11\u00a0Cuncta fecit bona in tempore suo,\n et mundum tradidit disputationi eorum,\n ut non inveniat homo opus\n quod operatus est Deus ab initio usque ad finem.\n12\u00a0Et cognovi quod non esset melius nisi l\u00e6tari,\n et facere bene in vita sua;\n13\u00a0omnis enim homo qui comedit et bibit,\n et videt bonum de labore suo,\n hoc donum Dei est.\n14\u00a0Didici quod omnia opera qu\u00e6 fecit Deus perseverent in perpetuum;\n non possumus eis quidquam addere, nec auferre,\n qu\u00e6 fecit Deus ut timeatur.\n15\u00a0Quod factum est, ipsum permanet;\n qu\u00e6 futura sunt jam fuerunt,\n et Deus instaurat quod abiit.]\n \n16\u00a0[Vidi sub sole in loco judicii impietatem,\n et in loco justiti\u00e6 iniquitatem:\n17\u00a0et dixi in corde meo:\n Justum et impium judicabit Deus,\n et tempus omnis rei tunc erit.\n18\u00a0Dixi in corde meo de filiis hominum,\n ut probaret eos Deus,\n et ostenderet similes esse bestiis.\n19\u00a0Idcirco unus interitus est hominis et jumentorum,\n et \u00e6qua utriusque conditio.\n Sicut moritur homo,\n sic et illa moriuntur.\n Similiter spirant omnia,\n et nihil habet homo jumento amplius:\n cuncta subjacent vanitati,\n20\u00a0et omnia pergunt ad unum locum.\n De terra facta sunt,\n et in terram pariter revertuntur.\n21\u00a0Quis novit si spiritus filiorum Adam ascendat sursum,\n et si spiritus jumentorum descendat deorsum?\n22\u00a0Et deprehendi nihil esse melius\n quam l\u00e6tari hominem in opere suo,\n et hanc esse partem illius.\n Quis enim eum adducet ut post se futura cognoscat?]","title":"Vulgate: Ecclesiastes: Ecclesiastes Chapter 3","type":"page"}