{"collection":"Bible & Christianity","html_url":"https://unchartedknowledge.5gfusion.net/browse/bib/vul/ecc010.htm","path":"bib/vul/ecc010.htm","source_url":"https://sacred-texts.com/bib/vul/ecc010.htm","text":"1\u00a0[Musc\u00e6 morientes perdunt suavitatem unguenti.\n Pretiosior est sapientia et gloria,\n parva et ad tempus stultitia.\n2\u00a0Cor sapientis in dextera ejus,\n et cor stulti in sinistra illius.\n3\u00a0Sed et in via stultus ambulans,\n cum ipse insipiens sit,\n omnes stultos \u00e6stimat.\n4\u00a0Si spiritus potestatem habentis ascenderit super te,\n locum tuum ne demiseris,\n quia curatio faciet cessare peccata maxima.]\n \n5\u00a0[Est malum quod vidi sub sole,\n quasi per errorem egrediens a facie principis:\n6\u00a0positum stultum in dignitate sublimi,\n et divites sedere deorsum.\n7\u00a0Vidi servos in equis,\n et principes ambulantes super terram quasi servos.\n8\u00a0Qui fodit foveam incidet in eam,\n et qui dissipat sepem mordebit eum coluber.\n9\u00a0Qui transfert lapides affligetur in eis,\n et qui scindit ligna vulnerabitur ab eis.\n10\u00a0Si retusum fuerit ferrum,\n et hoc non ut prius, sed hebetatum fuerit,\n multo labore exacuetur,\n et post industriam sequetur sapientia.\n11\u00a0Si mordeat serpens in silentio,\n nihil eo minus habet qui occulte detrahit.\n12\u00a0Verba oris sapientis gratia,\n et labia insipientis pr\u00e6cipitabunt eum;\n13\u00a0initium verborum ejus stultitia,\n et novissimum oris illius error pessimus.\n14\u00a0Stultus verba multiplicat.\n Ignorat homo quid ante se fuerit;\n et quid post se futurum sit, quis ei poterit indicare?\n15\u00a0Labor stultorum affliget eos,\n qui nesciunt in urbem pergere.]\n \n16\u00a0[V\u00e6 tibi, terra, cujus rex puer est,\n et cujus principes mane comedunt.\n17\u00a0Beata terra cujus rex nobilis est,\n et cujus principes vescuntur in tempore suo,\n ad reficiendum, et non ad luxuriam.\n18\u00a0In pigritiis humiliabitur contignatio,\n et in infirmitate manuum perstillabit domus.\n19\u00a0In risum faciunt panem et vinum\n ut epulentur viventes;\n et pecuni\u00e6 obediunt omnia.\n20\u00a0In cogitatione tua regi ne detrahas,\n et in secreto cubiculi tui ne maledixeris diviti:\n quia et aves c\u00e6li portabunt vocem tuam,\n et qui habet pennas annuntiabit sententiam.]","title":"Vulgate: Ecclesiastes: Ecclesiastes Chapter 10","type":"page"}