{"collection":"Bible & Christianity","html_url":"https://unchartedknowledge.5gfusion.net/browse/bib/vul/ecc011.htm","path":"bib/vul/ecc011.htm","source_url":"https://sacred-texts.com/bib/vul/ecc011.htm","text":"1\u00a0[Mitte panem tuum super transeuntes aquas,\n quia post tempora multa invenies illum.\n2\u00a0Da partem septem necnon et octo,\n quia ignoras quid futurum sit mali super terram.\n3\u00a0Si replet\u00e6 fuerint nubes,\n imbrem super terram effundent.\n Si ceciderit lignum ad austrum aut ad aquilonem,\n in quocumque loco ceciderit, ibi erit.\n4\u00a0Qui observat ventum non seminat;\n et qui considerat nubes numquam metet.\n5\u00a0Quomodo ignoras qu\u00e6 sit via spiritus,\n et qua ratione compingantur ossa in ventre pr\u00e6gnantis,\n sic nescis opera Dei,\n qui fabricator est omnium.\n6\u00a0Mane semina semen tuum,\n et vespere ne cesset manus tua:\n quia nescis quid magis oriatur, hoc aut illud;\n et si utrumque simul, melius erit.]\n \n7\u00a0[Dulce lumen,\n et delectabile est oculis videre solem.\n8\u00a0Si annis multis vixerit homo,\n et in his omnibus l\u00e6tatus fuerit,\n meminisse debet tenebrosi temporis, et dierum multorum,\n qui cum venerint, vanitatis arguentur pr\u00e6terita.\n9\u00a0L\u00e6tare ergo, juvenis, in adolescentia tua,\n et in bono sit cor tuum in diebus juventutis tu\u00e6:\n et ambula in viis cordis tui,\n et in intuitu oculorum tuorum,\n et scito quod pro omnibus his adducet te Deus in judicium.\n10\u00a0Aufer iram a corde tuo,\n et amove malitiam a carne tua:\n adolescentia enim et voluptas vana sunt.]","title":"Vulgate: Ecclesiastes: Ecclesiastes Chapter 11","type":"page"}