{"collection":"Bible & Christianity","html_url":"https://unchartedknowledge.5gfusion.net/browse/bib/vul/ecc012.htm","path":"bib/vul/ecc012.htm","source_url":"https://sacred-texts.com/bib/vul/ecc012.htm","text":"1\u00a0[Memento Creatoris tui in diebus juventutis tu\u00e6,\n antequam veniat tempus afflictionis,\n et appropinquent anni de quibus dicas:\n Non mihi placent;\n2\u00a0antequam tenebrescat sol, et lumen, et luna, et stell\u00e6,\n et revertantur nubes post pluviam;\n3\u00a0quando commovebuntur custodes domus,\n et nutabunt viri fortissimi,\n et otios\u00e6 erunt molentes in minuto numero,\n et tenebrescent videntes per foramina;\n4\u00a0et claudent ostia in platea,\n in humilitate vocis molentis,\n et consurgent ad vocem volucris,\n et obsurdescent omnes fili\u00e6 carminis:\n5\u00a0excelsa quoque timebunt, et formidabunt in via.\n Florebit amygdalus, impinguabitur locusta,\n et dissipabitur capparis,\n quoniam ibit homo in domum \u00e6ternitatis su\u00e6,\n et circuibunt in platea plangentes.\n6\u00a0Antequam rumpatur funiculus argenteus,\n et recurrat vitta aurea,\n et conteratur hydria super fontem,\n et confringatur rota super cisternam,\n7\u00a0et revertatur pulvis in terram suam unde erat,\n et spiritus redeat ad Deum, qui dedit illum.\n8\u00a0Vanitas vanitatum, dixit Ecclesiastes,\n et omnia vanitas.]\n \n9\u00a0[Cumque esset sapientissimus Ecclesiastes,\n docuit populum, et enarravit qu\u00e6 fecerat;\n et investigans composuit parabolas multas.\n10\u00a0Qu\u00e6sivit verba utilia,\n et conscripsit sermones rectissimos ac veritate plenos.\n11\u00a0Verba sapientium sicut stimuli,\n et quasi clavi in altum defixi,\n qu\u00e6 per magistrorum consilium data sunt a pastore uno.\n12\u00a0His amplius, fili mi, ne requiras.\n Faciendi plures libros nullus est finis;\n frequensque meditatio, carnis afflictio est.\n13\u00a0Finem loquendi pariter omnes audiamus.\n Deum time, et mandata ejus observa:\n hoc est enim omnis homo,\n14\u00a0et cuncta qu\u00e6 fiunt adducet Deus in judicium\n pro omni errato, sive bonum, sive malum illud sit.]","title":"Vulgate: Ecclesiastes: Ecclesiastes Chapter 12","type":"page"}