{"collection":"Bible & Christianity","html_url":"https://unchartedknowledge.5gfusion.net/browse/bib/vul/ephes.htm","path":"bib/vul/ephes.htm","source_url":"https://sacred-texts.com/bib/vul/ephes.htm","text":"1:1 Paulus apostolus Christi Iesu per voluntatem Dei sanctis omnibus qui sunt Ephesi et fidelibus in Christo Iesu\n1:2 gratia vobis et pax a Deo Patre nostro et Domino Iesu Christo\n1:3 benedictus Deus et Pater Domini nostri Iesu Christi qui benedixit nos in omni benedictione spiritali in caelestibus in Christo\n1:4 sicut elegit nos in ipso ante mundi constitutionem ut essemus sancti et inmaculati in conspectu eius in caritate\n1:5 qui praedestinavit nos in adoptionem filiorum per Iesum Christum in ipsum secundum propositum voluntatis suae\n1:6 in laudem gloriae gratiae suae in qua gratificavit nos in dilecto\n1:7 in quo habemus redemptionem per sanguinem eius remissionem peccatorum secundum divitias gratiae eius\n1:8 quae superabundavit in nobis in omni sapientia et prudentia\n1:9 ut notum faceret nobis sacramentum voluntatis suae secundum bonum placitum eius quod proposuit in eo\n1:10 in dispensationem plenitudinis temporum instaurare omnia in Christo quae in caelis et quae in terra sunt in ipso\n1:11 in quo etiam sorte vocati sumus praedestinati secundum propositum eius qui omnia operatur secundum consilium voluntatis suae\n1:12 ut simus in laudem gloriae eius qui ante speravimus in Christo\n1:13 in quo et vos cum audissetis verbum veritatis evangelium salutis vestrae in quo et credentes signati estis Spiritu promissionis Sancto\n1:14 qui est pignus hereditatis nostrae in redemptionem adquisitionis in laudem gloriae ipsius\n1:15 propterea et ego audiens fidem vestram quae est in Domino Iesu et dilectionem in omnes sanctos\n1:16 non cesso gratias agens pro vobis memoriam vestri faciens in orationibus meis\n1:17 ut Deus Domini nostri Iesu Christi Pater gloriae det vobis spiritum sapientiae et revelationis in agnitione eius\n1:18 inluminatos oculos cordis vestri ut sciatis quae sit spes vocationis eius quae divitiae gloriae hereditatis eius in sanctis\n1:19 et quae sit supereminens magnitudo virtutis eius in nos qui credidimus secundum operationem potentiae virtutis eius\n1:20 quam operatus est in Christo suscitans illum a mortuis et constituens ad dexteram suam in caelestibus\n1:21 supra omnem principatum et potestatem et virtutem et dominationem et omne nomen quod nominatur non solum in hoc saeculo sed et in futuro\n1:22 et omnia subiecit sub pedibus eius et ipsum dedit caput supra omnia ecclesiae\n1:23 quae est corpus ipsius plenitudo eius qui omnia in omnibus adimpletur\n2:1 et vos cum essetis mortui delictis et peccatis vestris\n2:2 in quibus aliquando ambulastis secundum saeculum mundi huius secundum principem potestatis aeris huius spiritus qui nunc operatur in filios diffidentiae\n2:3 in quibus et nos omnes aliquando conversati sumus in desideriis carnis nostrae facientes voluntates carnis et cogitationum et eramus natura filii irae sicut et ceteri\n2:4 Deus autem qui dives est in misericordia propter nimiam caritatem suam qua dilexit nos\n2:5 et cum essemus mortui peccatis convivificavit nos Christo gratia estis salvati\n2:6 et conresuscitavit et consedere fecit in caelestibus in Christo Iesu\n2:7 ut ostenderet in saeculis supervenientibus abundantes divitias gratiae suae in bonitate super nos in Christo Iesu\n2:8 gratia enim estis salvati per fidem et hoc non ex vobis Dei enim donum est\n2:9 non ex operibus ut ne quis glorietur\n2:10 ipsius enim sumus factura creati in Christo Iesu in operibus bonis quae praeparavit Deus ut in illis ambulemus\n2:11 propter quod memores estote quod aliquando vos gentes in carne qui dicimini praeputium ab ea quae dicitur circumcisio in carne manufacta\n2:12 quia eratis illo in tempore sine Christo alienati a conversatione Israhel et hospites testamentorum promissionis spem non habentes et sine Deo in mundo\n2:13 nunc autem in Christo Iesu vos qui aliquando eratis longe facti estis prope in sanguine Christi\n2:14 ipse est enim pax nostra qui fecit utraque unum et medium parietem maceriae solvens inimicitiam in carne sua\n2:15 legem mandatorum decretis evacuans ut duos condat in semet ipsum in unum novum hominem faciens pacem\n2:16 et reconciliet ambos in uno corpore Deo per crucem interficiens inimicitiam in semet ipso\n2:17 et veniens evangelizavit pacem vobis qui longe fuistis et pacem his qui prope\n2:18 quoniam per ipsum habemus accessum ambo in uno Spiritu ad Patrem\n2:19 ergo iam non estis hospites et advenae sed estis cives sanctorum et domestici Dei\n2:20 superaedificati super fundamentum apostolorum et prophetarum ipso summo angulari lapide Christo Iesu\n2:21 in quo omnis aedificatio constructa crescit in templum sanctum in Domino\n2:22 in quo et vos coaedificamini in habitaculum Dei in Spiritu\n3:1 huius rei gratia ego Paulus vinctus Christi Iesu pro vobis gentibus\n3:2 si tamen audistis dispensationem gratiae Dei quae data est mihi in vobis\n3:3 quoniam secundum revelationem notum mihi factum est sacramentum sicut supra scripsi in brevi\n3:4 prout potestis legentes intellegere prudentiam meam in mysterio Christi\n3:5 quod aliis generationibus non est agnitum filiis hominum sicuti nunc revelatum est sanctis apostolis eius et prophetis in Spiritu\n3:6 esse gentes coheredes et concorporales et conparticipes promissionis in Christo Iesu per evangelium\n3:7 cuius factus sum minister secundum donum gratiae Dei quae data est mihi secundum operationem virtutis eius\n3:8 mihi omnium sanctorum minimo data est gratia haec in gentibus evangelizare ininvestigabiles divitias Christi\n3:9 et inluminare omnes quae sit dispensatio sacramenti absconditi a saeculis in Deo qui omnia creavit\n3:10 ut innotescat principibus et potestatibus in caelestibus per ecclesiam multiformis sapientia Dei\n3:11 secundum praefinitionem saeculorum quam fecit in Christo Iesu Domino nostro\n3:12 in quo habemus fiduciam et accessum in confidentia per fidem eius\n3:13 propter quod peto ne deficiatis in tribulationibus meis pro vobis quae est gloria vestra\n3:14 huius rei gratia flecto genua mea ad Patrem Domini nostri Iesu Christi\n3:15 ex quo omnis paternitas in caelis et in terra nominatur\n3:16 ut det vobis secundum divitias gloriae suae virtute corroborari per Spiritum eius in interiore homine\n3:17 habitare Christum per fidem in cordibus vestris in caritate radicati et fundati\n3:18 ut possitis conprehendere cum omnibus sanctis quae sit latitudo et longitudo et sublimitas et profundum\n3:19 scire etiam supereminentem scientiae caritatem Christi ut impleamini in omnem plenitudinem Dei\n3:20 ei autem qui potens est omnia facere superabundanter quam petimus aut intellegimus secundum virtutem quae operatur in nobis\n3:21 ipsi gloria in ecclesia et in Christo Iesu in omnes generationes saeculi saeculorum amen\n4:1 obsecro itaque vos ego vinctus in Domino ut digne ambuletis vocatione qua vocati estis\n4:2 cum omni humilitate et mansuetudine cum patientia subportantes invicem in caritate\n4:3 solliciti servare unitatem spiritus in vinculo pacis\n4:4 unum corpus et unus spiritus sicut vocati estis in una spe vocationis vestrae\n4:5 unus Dominus una fides unum baptisma\n4:6 unus Deus et Pater omnium qui super omnes et per omnia et in omnibus nobis\n4:7 unicuique autem nostrum data est gratia secundum mensuram donationis Christi\n4:8 propter quod dicit ascendens in altum captivam duxit captivitatem dedit dona hominibus\n4:9 quod autem ascendit quid est nisi quia et descendit primum in inferiores partes terrae\n4:10 qui descendit ipse est et qui ascendit super omnes caelos ut impleret omnia\n4:11 et ipse dedit quosdam quidem apostolos quosdam autem prophetas alios vero evangelistas alios autem pastores et doctores\n4:12 ad consummationem sanctorum in opus ministerii in aedificationem corporis Christi\n4:13 donec occurramus omnes in unitatem fidei et agnitionis Filii Dei in virum perfectum in mensuram aetatis plenitudinis Christi\n4:14 ut iam non simus parvuli fluctuantes et circumferamur omni vento doctrinae in nequitia hominum in astutia ad circumventionem erroris\n4:15 veritatem autem facientes in caritate crescamus in illo per omnia qui est caput Christus\n4:16 ex quo totum corpus conpactum et conexum per omnem iuncturam subministrationis secundum operationem in mensuram uniuscuiusque membri augmentum corporis facit in aedificationem sui in caritate\n4:17 hoc igitur dico et testificor in Domino ut iam non ambuletis sicut gentes ambulant in vanitate sensus sui\n4:18 tenebris obscuratum habentes intellectum alienati a vita Dei per ignorantiam quae est in illis propter caecitatem cordis ipsorum\n4:19 qui desperantes semet ipsos tradiderunt inpudicitiae in operationem inmunditiae omnis in avaritia\n4:20 vos autem non ita didicistis Christum\n4:21 si tamen illum audistis et in ipso edocti estis sicut est veritas in Iesu\n4:22 deponere vos secundum pristinam conversationem veterem hominem qui corrumpitur secundum desideria erroris\n4:23 renovamini autem spiritu mentis vestrae\n4:24 et induite novum hominem qui secundum Deum creatus est in iustitia et sanctitate veritatis\n4:25 propter quod deponentes mendacium loquimini veritatem unusquisque cum proximo suo quoniam sumus invicem membra\n4:26 irascimini et nolite peccare sol non occidat super iracundiam vestram\n4:27 nolite locum dare diabolo\n4:28 qui furabatur iam non furetur magis autem laboret operando manibus quod bonum est ut habeat unde tribuat necessitatem patienti\n4:29 omnis sermo malus ex ore vestro non procedat sed si quis bonus ad aedificationem oportunitatis ut det gratiam audientibus\n4:30 et nolite contristare Spiritum Sanctum Dei in quo signati estis in die redemptionis\n4:31 omnis amaritudo et ira et indignatio et clamor et blasphemia tollatur a vobis cum omni malitia\n4:32 estote autem invicem benigni misericordes donantes invicem sicut et Deus in Christo donavit nobis\n5:1 estote ergo imitatores Dei sicut filii carissimi\n5:2 et ambulate in dilectione sicut et Christus dilexit nos et tradidit se ipsum pro nobis oblationem et hostiam Deo in odorem suavitatis\n5:3 fornicatio autem et omnis inmunditia aut avaritia nec nominetur in vobis sicut decet sanctos\n5:4 aut turpitudo aut stultiloquium aut scurrilitas quae ad rem non pertinent sed magis gratiarum actio\n5:5 hoc enim scitote intellegentes quod omnis fornicator aut inmundus aut avarus quod est idolorum servitus non habet hereditatem in regno Christi et Dei\n5:6 nemo vos seducat inanibus verbis propter haec enim venit ira Dei in filios diffidentiae\n5:7 nolite ergo effici participes eorum\n5:8 eratis enim aliquando tenebrae nunc autem lux in Domino ut filii lucis ambulate\n5:9 fructus enim lucis est in omni bonitate et iustitia et veritate\n5:10 probantes quid sit beneplacitum Deo\n5:11 et nolite communicare operibus infructuosis tenebrarum magis autem et redarguite\n5:12 quae enim in occulto fiunt ab ipsis turpe est et dicere\n5:13 omnia autem quae arguuntur a lumine manifestantur omne enim quod manifestatur lumen est\n5:14 propter quod dicit surge qui dormis et exsurge a mortuis et inluminabit tibi Christus\n5:15 videte itaque fratres quomodo caute ambuletis non quasi insipientes sed ut sapientes\n5:16 redimentes tempus quoniam dies mali sunt\n5:17 propterea nolite fieri inprudentes sed intellegentes quae sit voluntas Domini\n5:18 et nolite inebriari vino in quo est luxuria sed implemini Spiritu\n5:19 loquentes vobismet ipsis in psalmis et hymnis et canticis spiritalibus cantantes et psallentes in cordibus vestris Domino\n5:20 gratias agentes semper pro omnibus in nomine Domini nostri Iesu Christi Deo et Patri\n5:21 subiecti invicem in timore Christi\n5:22 mulieres viris suis subditae sint sicut Domino\n5:23 quoniam vir caput est mulieris sicut Christus caput est ecclesiae ipse salvator corporis\n5:24 sed ut ecclesia subiecta est Christo ita et mulieres viris suis in omnibus\n5:25 viri diligite uxores sicut et Christus dilexit ecclesiam et se ipsum tradidit pro ea\n5:26 ut illam sanctificaret mundans lavacro aquae in verbo\n5:27 ut exhiberet ipse sibi gloriosam ecclesiam non habentem maculam aut rugam aut aliquid eiusmodi sed ut sit sancta et inmaculata\n5:28 ita et viri debent diligere uxores suas ut corpora sua qui suam uxorem diligit se ipsum diligit\n5:29 nemo enim umquam carnem suam odio habuit sed nutrit et fovet eam sicut et Christus ecclesiam\n5:30 quia membra sumus corporis eius de carne eius et de ossibus eius\n5:31 propter hoc relinquet homo patrem et matrem suam et adherebit uxori suae et erunt duo in carne una\n5:32 sacramentum hoc magnum est ego autem dico in Christo et in ecclesia\n5:33 verumtamen et vos singuli unusquisque suam uxorem sicut se ipsum diligat uxor autem ut timeat virum\n6:1 filii oboedite parentibus vestris in Domino hoc enim est iustum\n6:2 honora patrem tuum et matrem quod est mandatum primum in promissione\n6:3 ut bene sit tibi et sis longevus super terram\n6:4 et patres nolite ad iracundiam provocare filios vestros sed educate illos in disciplina et correptione Domini\n6:5 servi oboedite dominis carnalibus cum timore et tremore in simplicitate cordis vestri sicut Christo\n6:6 non ad oculum servientes quasi hominibus placentes sed ut servi Christi facientes voluntatem Dei ex animo\n6:7 cum bona voluntate servientes sicut Domino et non hominibus\n6:8 scientes quoniam unusquisque quodcumque fecerit bonum hoc percipiet a Domino sive servus sive liber\n6:9 et domini eadem facite illis remittentes minas scientes quia et illorum et vester Dominus est in caelis et personarum acceptio non est apud eum\n6:10 de cetero fratres confortamini in Domino et in potentia virtutis eius\n6:11 induite vos arma Dei ut possitis stare adversus insidias diaboli\n6:12 quia non est nobis conluctatio adversus carnem et sanguinem sed adversus principes et potestates adversus mundi rectores tenebrarum harum contra spiritalia nequitiae in caelestibus\n6:13 propterea accipite armaturam Dei ut possitis resistere in die malo et omnibus perfectis stare\n6:14 state ergo succincti lumbos vestros in veritate et induti loricam iustitiae\n6:15 et calciati pedes in praeparatione evangelii pacis\n6:16 in omnibus sumentes scutum fidei in quo possitis omnia tela nequissimi ignea extinguere\n6:17 et galeam salutis adsumite et gladium Spiritus quod est verbum Dei\n6:18 per omnem orationem et obsecrationem orantes omni tempore in Spiritu et in ipso vigilantes in omni instantia et obsecratione pro omnibus sanctis\n6:19 et pro me ut detur mihi sermo in apertione oris mei cum fiducia notum facere mysterium evangelii\n6:20 pro quo legatione fungor in catena ita ut in ipso audeam prout oportet me loqui\n6:21 ut autem et vos sciatis quae circa me sunt quid agam omnia nota vobis faciet Tychicus carissimus frater et fidelis minister in Domino\n6:22 quem misi ad vos in hoc ipsum ut cognoscatis quae circa nos sunt et consoletur corda vestra\n6:23 pax fratribus et caritas cum fide a Deo Patre et Domino Iesu Christo\n6:24 gratia cum omnibus qui diligunt Dominum nostrum Iesum Christum in incorruptione","title":"Paul to the Ephesians","type":"page"}