{"collection":"Bible & Christianity","html_url":"https://unchartedknowledge.5gfusion.net/browse/bib/vul/es1003.htm","path":"bib/vul/es1003.htm","source_url":"https://sacred-texts.com/bib/vul/es1003.htm","text":"3:1 rex Darius fecit cenam magnam omnibus vernaculis suis et omnibus magistratibus Mediae et Persis\n3:2 et omnibus purpuratis et praetoribus et consulibus et praefectis sub illo, ab India usque Aethiopiam centum viginti septem provinciis.\n3:3 et cum manducassent et bibissent et satiati revertebantur, tunc Darius rex ascendit in cubiculo suo et dormivit et expergefactu\n3:4 tunc illi tres iuvenes, corporis custodes qui custodiebant corpus regis, dixerunt alter altero:\n3:5 dicamus unusquisque nostrum sermonem, qui praecellat; et cuiuscumque apparuerit sermo sapientior alterius, dabit illi Darius rex dona magna et epinicia magna,\n3:6 purpura cooperiri et in auro bibere et super aurum dormire et currum aureo freno et cidarim byssinam et torquem circa collum,\n3:7 et secundo loco sedebit a Dario propter sapientiam suam et cognatus Darii vocabitur.\n3:8 tunc scribentes singuli suum verbum signaverunt et posuerunt subtus cervical Darii regis.\n3:9 et dixerunt: cum surrexerit rex, dabunt illi scripta sua; et quodcumque iudicaverit rex et tres magistratus Persidis, quoniam verbum eius sapientius est, ipsi dabitur victoria sicut scriptum est.\n3:10 unus scripsit: fortius est vinum.\n3:11 alius scripsit: fortior est rex.\n3:12 tertius autem scripsit: fortiores sunt mulieres, super omnia autem vincit veritas.\n3:13 et cum surrexisset rex, acceperunt scripta sua et dederunt illi et legit.\n3:14 et mittens vocavit omnes magistratus Persarum et Medorum et purpuratos et praetores et praefectos.\n3:15 et sederunt in consilio et lecta sunt scripta coram ipsis.\n3:16 et dixit: vocate adulescentes, et ipsi indicabunt verba sua, et vocati sunt et introierunt.\n3:17 et dixit illis: indicate nobis de his quae scripta sunt. et coepit prior, qui dixerat de fortitudine vini,\n3:18 et dixit: viri, quam praevalet vinum! omnibus hominibus qui bibunt illud seducit mentem.\n3:19 itemque regis et orfani facit mentem unam, item servi ac liberi, pauperis et divitis.\n3:20 et omnem mentem convertit in securitatem et iucunditatem, et non meminit omnem tristitiam et debitum.\n3:21 et omnia praecordia facit honesta, et non meminit regem nec magistratum, et omnia per talenta facit loqui.\n3:22 et non meminerunt cum biberint amicitiam nec fraternitatem, sed post non multum sumunt gladios.\n3:23 et cum a vino merserint et surrexerint, non meminerunt quae gesserunt.\n3:24 o viri, non praecellit vinum quod sic cogit facere? et tacuit hoc dicto.","title":"Vulgate: 1 Esdras: 1 Esdras Chapter 3","type":"page"}