{"collection":"Bible & Christianity","html_url":"https://unchartedknowledge.5gfusion.net/browse/bib/vul/est002.htm","path":"bib/vul/est002.htm","source_url":"https://sacred-texts.com/bib/vul/est002.htm","text":"1 His ita gestis, postquam regis Assueri indignatio deferbuerat, recordatus est Vasthi, et qu\u00e6 fecisset, vel qu\u00e6 passa esset:\n2 dixeruntque pueri regis ac ministri ejus: Qu\u00e6rantur regi puell\u00e6 virgines ac specios\u00e6,\n3 et mittantur qui considerent per universas provincias puellas speciosas et virgines: et adducant eas ad civitatem Susan, et tradant eas in domum feminarum sub manu Egei eunuchi, qui est pr\u00e6positus et custos mulierum regiarum: et accipiant mundum muliebrem, et cetera ad usus necessaria.\n4 Et qu\u00e6cumque inter omnes oculis regis placuerit, ipsa regnet pro Vasthi. Placuit sermo regi: et ita, ut suggesserant, jussit fieri.\n5 Erat vir Jud\u00e6us in Susan civitate, vocabulo Mardoch\u00e6us filius Jair, filii Semei, filii Cis, de stirpe Jemini,\n6 qui translatus fuerat de Jerusalem eo tempore quo Jechoniam regem Juda Nabuchodonosor rex Babylonis transtulerat,\n7 qui fuit nutritius fili\u00e6 fratris sui Ediss\u00e6, qu\u00e6 altero nomine vocabatur Esther, et utrumque parentem amiserat: pulchra nimis, et decora facie. Mortuisque patre ejus ac matre, Mardoch\u00e6us sibi eam adoptavit in filiam.\n8 Cumque percrebruisset regis imperium, et juxta mandatum illius mult\u00e6 pulchr\u00e6 virgines adducerentur Susan, et Egeo traderentur eunucho, Esther quoque inter ceteras puellas ei tradita est, ut servaretur in numero feminarum.\n9 Qu\u00e6 placuit ei, et invenit gratiam in conspectu illius. Et pr\u00e6cepit eunucho, ut acceleraret mundum muliebrem, et traderet ei partes suas, et septem puellas speciosissimas de domo regis, et tam ipsam quam pedissequas ejus ornaret atque excoleret.\n10 Qu\u00e6 noluit indicare ei populum et patriam suam: Mardoch\u00e6us enim pr\u00e6ceperat ei, ut de hac re omnino reticeret:\n11\u00a0qui deambulabat quotidie ante vestibulum domus, in qua elect\u00e6 virgines servabantur, curam agens salutis Esther, et scire volens quid ei accideret.\n \n12 Cum autem venisset tempus singularum per ordinem puellarum ut intrarent ad regem, expletis omnibus qu\u00e6 ad cultum muliebrem pertinebant, mensis duodecimus vertebatur: ita dumtaxat, ut sex mensibus oleo ungerentur myrrhino, et aliis sex quibusdam pigmentis et aromatibus uterentur.\n13 Ingredientesque ad regem, quidquid postulassent ad ornatum pertinens, accipiebant: et ut eis placuerat, composit\u00e6 de triclinio feminarum ad regis cubiculum transibant.\n14 Et qu\u00e6 intraverat vespere, egrediebatur mane, atque inde in secundas \u00e6des deducebatur, qu\u00e6 sub manu Susagazi eunuchi erant, qui concubinis regis pr\u00e6sidebat: nec habebat potestatem ad regem ultra redeundi, nisi voluisset rex, et eam venire jussisset ex nomine.\n15 Evoluto autem tempore per ordinem, instabat dies quo Esther filia Abihail fratris Mardoch\u00e6i, quam sibi adoptaverat in filiam, deberet intrare ad regem. Qu\u00e6 non qu\u00e6sivit muliebrem cultum, sed qu\u00e6cumque voluit Egeus eunuchus custos virginum, h\u00e6c ei ad ornatum dedit. Erat enim formosa valde, et incredibili pulchritudine: omnium oculis gratiosa et amabilis videbatur.\n16 Ducta est itaque ad cubiculum regis Assueri mense decimo, qui vocatur Tebeth, septimo anno regni ejus.\n17 Et adamavit eam rex plus quam omnes mulieres, habuitque gratiam et misericordiam coram eo super omnes mulieres: et posuit diadema regni in capite ejus, fecitque eam regnare in loco Vasthi.\n18 Et jussit convivium pr\u00e6parari permagnificum cunctis principibus et servis suis pro conjunctione et nuptiis Esther. Et dedit requiem universis provinciis, ac dona largitus est juxta magnificentiam principalem.\n19 Cumque secundo qu\u00e6rerentur virgines et congregarentur, Mardoch\u00e6us manebat ad januam regis:\n20\u00a0necdum prodiderat Esther patriam et populum suum, juxta mandatum ejus. Quidquid enim ille pr\u00e6cipiebat, observabat Esther: et ita cuncta faciebat ut eo tempore solita erat, quo eam parvulam nutriebat.\n \n21 Eo igitur tempore, quo Mardoch\u00e6us ad regis januam morabatur, irati sunt Bagathan et Thares duo eunuchi regis, qui janitores erant, et in primo palatii limine pr\u00e6sidebant: volueruntque insurgere in regem, et occidere eum.\n22 Quod Mardoch\u00e6um non latuit, statimque nuntiavit regin\u00e6 Esther: et illa regi ex nomine Mardoch\u00e6i, qui ad se rem detulerat.\n23 Qu\u00e6situm est, et inventum: et appensus est uterque eorum in patibulo. Mandatumque est historiis, et annalibus traditum coram rege.","title":"Vulgate: Esther: Esther Chapter 2","type":"page"}