{"collection":"Bible & Christianity","html_url":"https://unchartedknowledge.5gfusion.net/browse/bib/vul/est005.htm","path":"bib/vul/est005.htm","source_url":"https://sacred-texts.com/bib/vul/est005.htm","text":"1 Die autem tertio induta est Esther regalibus vestimentis, et stetit in atrio domus regi\u00e6, quod erat interius, contra basilicam regis: at ille sedebat super solium suum in consistorio palatii contra ostium domus.\n2 Cumque vidisset Esther reginam stantem, placuit oculis ejus, et extendit contra eam virgam auream, quam tenebat manu: qu\u00e6 accedens, osculata est summitatem virg\u00e6 ejus.\n3 Dixitque ad eam rex: Quid vis, Esther regina? qu\u00e6 est petitio tua? etiam si dimidiam partem regni petieris, dabitur tibi.\n4 At illa respondit: Si regi placet, obsecro ut venias ad me hodie, et Aman tecum, ad convivium quod paravi.\n5 Statimque rex: Vocate, inquit, cito Aman ut Esther obediat voluntati. Venerunt itaque rex et Aman ad convivium, quod eis regina paraverat.\n6 Dixitque ei rex, postquam vinum biberat abundanter: Quid petis ut detur tibi? et pro qua re postulas? etiam si dimidiam partem regni mei petieris, impetrabis.\n7 Cui respondit Esther: Petitio mea, et preces sunt ist\u00e6:\n8\u00a0si inveni in conspectu regis gratiam, et si regi placet ut det mihi quod postulo, et meam impleat petitionem: veniat rex et Aman ad convivium quod paravi eis, et cras aperiam regi voluntatem meam.\n \n9 Egressus est itaque illo die Aman l\u00e6tus et alacer. Cumque vidisset Mardoch\u00e6um sedentem ante fores palatii, et non solum non assurrexisse sibi, sed nec motum quidem de loco sessionis su\u00e6, indignatus est valde:\n10 et dissimulata ira reversus in domum suam, convocavit ad se amicos suos, et Zares uxorem suam,\n11 et exposuit illis magnitudinem divitiarum suarum, filiorumque turbam, et quanta eum gloria super omnes principes et servos suos rex elevasset.\n12 Et post h\u00e6c ait: Regina quoque Esther nullum alium vocavit ad convivium cum rege pr\u00e6ter me: apud quam etiam cras cum rege pransurus sum.\n13 Et cum h\u00e6c omnia habeam, nihil me habere puto, quamdiu videro Mardoch\u00e6um Jud\u00e6um sedentem ante fores regias.\n14 Responderuntque ei Zares uxor ejus, et ceteri amici: Jube parari excelsam trabem, habentem altitudinis quinquaginta cubitos, et dic mane regi ut appendatur super eam Mardoch\u00e6us, et sic ibis cum rege l\u00e6tus ad convivium. Placuit ei consilium, et jussit excelsam parari crucem.","title":"Vulgate: Esther: Esther Chapter 5","type":"page"}